Verwijzing gi Wi Kresten libi nanga a preikiwroko studie-buku
6-12 MEI
GUDU NA INI GADO WORTU PSALM 36-37
„No meki yu atibron nanga takru-ati sma”
Diki moro dipi
it-1-O 283
Bergi
Steifi, tranga noso hei. Bergi e prenki sani di steifi nanga sani di e tan fu ala ten (Yes 54:10; Hab 3:6; Luku sosrefi Ps 46:2). Dati meki di a psalm skrifiman taki dati a retidu fu Yehovah de leki a „bergi fu Gado”,dan kande dati ben wani taki, a retidu fu Yehovah e tan fu ala ten (Ps 36:6). Noso fu di bergi hei, meki a kan taki disi wani taki dati, a retidu fu Yehovah hei moro san libisma kan prakseri (Luku Yes 55:8, 9). Openbaring 16:20 e taki fu a ten di Yehovah ben gi a konmando fu kanti den seibi komki fu na atibron fu Gado: „nowan bergi ben de fu feni.” Disi e sori taki srefi nowan sani di poti kon so hei leki wan bergi o man kibri gi na atibron fu Gado.—Luku sosrefi Yer 4:23-26.
20-26 MEI
GUDU NA INI GADO WORTU PSALM 40-41
Fu san ede wi musu yepi trawan?
Diki moro dipi
it-1-O 1227
Yehovah
Den tori na ini Bijbel e sori krin taki na Yehovah wawan abi a reti fu tiri hemel nanga grontapu èn taki a moro prenspari sani gi en na fu santa en eigi nen. Disi kan psa soso te Gado nen kon santa dorodoro. Ma fu man du dati dan den mekisani na hemel nanga grontapu musu gi Gado nen glori. Disi wani taki dati den musu kon sabi en, lespeki a reti di Yehovah abi fu tiri hemel nanga grontapu, den musu du dati nanga den heri ati, den musu wani dini en èn den musu lobi en. Di David ben begi Yehovah na ini Psalm 40:5-10 a kon na krin taki na Yehovah wawan abi a reti fu tiri hemel nanga grontapu. (Luku fa den apostel ben fiti wan pisi fu a Psalm disi na Yesus Krestes na ini Heb 10:5-10.)
27 MEI–2 YUNI
GUDU NA INI GADO WORTU PSALM 42-44
Gebroiki den leri di wi e kisi fu Yehovah heri bun
Diki moro dipi
it-1-O 1190
Sabanadagu
Bijbel gebroiki sabanadagu na wan agersifasi furu leisi. Te Yob ben e taki fu a situwâsi di a ben de na ini, dan a ben taki a tron „wan brada fu den sabanadagu” (Yob 30:29). Di feanti ben wini a pipel fu Gado, dan a psalm skrifiman ben e sari èn kande a ben teki en gersi nanga a fetipresi pe den sabanadagu e kon makandra fu nyan den dedeskin (luku sosrefi Ps 68:23) di a taki: „Yu meki wi lasi a strei na a presi pe den sabanadagu e kon na wán” (Ps 44:19). Di Babilon lontu Yerusalem na ini a yari 607 Fosi Krestes, wan hebi angriten ben kon de èn den mama ben e handri na wan ogri-ati fasi nanga den pikin. Dati meki Yeremia ben taki dati a fasi „fa mi pipel” e handri ogri moro a fasi fa wan sabanadagu e sorgi gi en pikin.—Sar 4:3, 10.
3-9 YUNI
GUDU NA INI GADO WORTU PSALM 45-47
A Singi fu a trow fu wan kownu
it-2-O 503
Orloku
Na a kaba fu na orloku disi, freide o de na grontapu wan dusun yari langa. Psalm e taki dati „Na ala sei fu grontapu [Yehovah] e meki feti kon na wan kaba. Den bo a e broko na tu èn den lansri a e koti pisipisi. Den fetiwagi a e bron na ini faya.” A sani disi kon tru fu a fosi leisi di Gado tyari freide kon gi a kondre Israel, di a pori den fetisani fu den feanti fu en. Baka te Krestes o wini den feanti fu en na a feti fu Armagedon, heri grontapu o de na ini freide (Ps 46:8-10). Na den sma di o kisi têgo libi leki pai o de den wan di o naki „den feti-owru kon tron plugu èn den lansri kon tron grasinefi” èn den no o „leri fu feti moro.” „Bika na Yehovah srefi, iya, na a Gado di e tiri den legre taki so.”—Yes 2:4; Mik 4:3, 4.
10-16 YUNI
GUDU NA INI GADO WORTU PSALM 48-50
Papa nanga mama—Yepi yu osofamiri fu fertrow tapu na organisâsi fu Yehovah
Diki moro dipi
it-2-O 722
Gudu
Leki wan pipel di ben abi en bun, den Israelsma ben e nyan, den ben e dringi, den ben e meki prisiri (1Kw 4:20; Pr 5:18, 19), èn den gudu di den ben abi ben e kibri den gi den problema di pôti sma abi (Odo 10:15; Pr 7:12). Ma aladi a ben de a wani fu Yehovah taki den Israelsma ben o nyan bun fu a tranga wroko fu den (luku sosrefi Odo 6:6-11; 20:13; 24:33, 34), toku den no ben musu bigin fertrow tapu den gudu fu den, na presi fu fertrow tapu Yehovah, a sma di ben gi den den gudu dati (De 8:7-17; Ps 49:6-9; Odo 11:4; 18:10, 11; Yer 9:23, 24). A ben memre den sosrefi taki gudu no e tan fu alaten (Odo 23:4, 5), den no ben o man gi dati leki wan ofrandi na Gado fu man tan na libi (Ps 49:6, 7), èn a no abi nowan wini gi den dedewan (Ps 49:16, 17; Pr 5:15). Den ben kisi a warskow sosrefi fu luku bun taki den no kon gudu na wan bedrigifasi èn pori a matifasi di den abi nanga Yehovah. (Odo 28:20; luku Yer 5:26-28; 17:9-11.) Den ben kisi a deki-ati tu fu „gi Yehovah grani nanga den gudu di den abi.”—Odo 3:9.
17-23 YUNI
GUDU NA INI GADO WORTU PSALM 51-53
Sani di yu kan du fu no meki seryusu fowtu
Diki moro dipi
it-1-O 510
Dowek
Dowek ben de wan Edomsma di ben e wroko gi Kownu Saul èn a edeman fu den skapuman (1Sa 21:7; 22:9). Soleki fa a sori, dan Dowek ben de wan sma di ben teki a dyu bribi. Fu di Dowek ben musu de na fesi Yehovah na Nob, kande fu di a ben meki wan pramisi, fu di a no ben krin, noso fu di a ben kisi wan sani di ben gersi gwasi, meki a ben si fa a granpriester Akimeilek ben gi David a santa brede nanga a feti-owru fu Goliat. Bakaten, di Saul ben e taki nanga den futuboi fu en, dan a taigi den san a ben e denki. A taigi den taki den span anu makandra fu opo den srefi teige en, dan Dowek taigi en san a ben si na Nob. Baka di Saul seni kari a granpriester nanga ala den tra priester fu Nob èn a poti aksi gi Akimeilek, a taigi den srudati di ben e lon na en fesi fu kiri den priester. Ma di den no ben wani kiri den priester, Saul taigi Dowek fu kiri den priester. Wantewante Dowek kiri ala nanga ala 85 priester. Baka di Dowek du a ogri-ati sani disi, a ben de fayafaya fu pori a foto Nob, a kiri ala sma di ben e libi drape, pikin nanga bigi, den meti sosrefi.—1Sa 22:6-20.
Soleki fa den biginwortu fu Psalm 52 e sori, dan David skrifi fu Dowek taki: „Nanga yu tongo di srapu leki wan nefi, yu e taki sani di e tyari bigi problema kon. Ala yuru yu e bedrigi sma. Yu lobi san ogri moro leki san bun. Yu lobi fruteri lei moro leki fu taki sani di tru. Yu tongo di e kori sma, yu lobi taki sani fu du trawan ogri.”—Ps 52:2-4.
24-30 YUNI
GUDU NA INI GADO WORTU PSALM 54-56
Gado e horibaka gi yu
Diki moro dipi
it-2-O 1190
Sabi sani na fesi, Sreka sani na fesi
A bedrigi sani di Yudas Iskariot du na wan kon tru fu wan Bijbel profeititori, èn wan beweisi taki Yehovah nanga en manpikin kan sabi sani na fesi (Ps 41:9; 55:12, 13; 109:8; Tor 1:16-20). Toku wi no kan taki dati Gado ben taki na fesi taki Yudas ben musu du so wan sani. Den profeititori ben taki na fesi taki wan sma di Yesus ben sabi bun ben o tori en, ma den no ben taki krin suma ben o de a sma dati. Efu Gado ben o taki na fesi san Yudas ben o du, dan dati no ben o kruderi nanga san Bijbel e taki. Na apostel Paulus ben taki: „Noiti yu musu gaw fu poti yu anu na tapu wan man fu poti en na wroko. No teki prati tu na den sondu fu tra sma. Tan libi wan krin libi.” (1Ti 5:22; luku sosrefi 3:6.) Fu di Yesus ben e broko en ede di a ben musu bosroiti suma ben o de den 12 apostel fu en, meki a ben begi en Papa wan heri neti fosi a bosroiti suma a ben o teki (Lu 6:12-16). Efu Gado ben taki na fesi dati Yudas ben o tron wan bedrigiman, dan soleki fa a wet e taki, dan Gado ben o abi wan prati na ini a sondu di Yudas du.
Sobun, na a ten di Yudas ben tron wan disipel dan a gersi leki a no ben de krin fu si ete na ini en ati taki a ben de wan toriman. A gi pasi taki a ’takru rutu gro kon’ èn doti en prakseri. Leki bakapisi fu dati, a drai baka gi Gado èn a gi Didibri na okasi fu tiri en, na so a tron wan fururuman nanga bedrigiman. (Heb 12:14, 15; Yoh 13:2; Tor 1:24, 25; Yak 1:14, 15; luku YUDAS Nr. 4.) Di den firi disi kon lepi, dan Yesus srefi ben kan si dati ini na ati fu Yudas èn taki fu a sma di ben o tori en.—Yoh 13:10, 11.