Verwijzing gi „Wi Kresten libi nanga a preikiwroko studie-buku”

Verwijzing gi Wi Kresten libi nanga a preikiwroko studie-buku

11-17 AUGUSTUS

GUDU NA INI GADO WORTU ODO 26

Tan fara fu „wan donsma”

it-2-O 704 ¶7

Alen

Den pisi ten fu a yari. Den tu prenspari ten fu a yari na ini a Pramisi Kondre, den kowru nanga waran pisi ten, yu kan si leki a ten te alen e fadon nanga a ten te a son e skèin (Luku Ps 32:4; Sng 2:11). Na mindri fu a mun april te go miti mindri fu a mun oktober, wan pkinso alen nomo e fadon. Na a pisi ten fu a kotiten, dan alen no e fadon so hebi. Odo 26:1 e sori taki a no ben de wan ala dei sani taki alen ben fadon na ini a kotiten (Luku 1Sa 12:17-19.). Awinsi alen ten ben doro, a no ala yuru alen ben e fadon, ma tapu son dei a son ben skèin tu (Esr 10:9, 13). Fu dati ede sma ben warderi en te den ben abi wan bun kibripresi.—Yes 4:6; 25:4; 32:2; Yob 24:8.

it-2-O 123

Malengri

Gebroiki na ini wan odo. A koni kownu Salomo ben taki: „Te wan sma e gi en eigi futu mankeri [san e meki taki a sma e kon malengri], noso te wan sma e gi ensrefi mankeri, na so a de te wan sma e meki wan donsma luku den afersi fu en.” Fu tru, wan man di e teki wan donsma fu luku den afersi fu en kan de seiker taki sani no o waka bun gi en. A kan de seiker taki a donsma o pori a wroko fu en èn dati o tyari takru bakapisi gi en.—Odo 26:6.

18-24 AUGUSTUS

GUDU NA INI GADO WORTU ODO 27

Den wini di wi e kisi te wi abi trutru mati

it-2-O 389

Birtisma

Ma, na ini den odo fu a koni Kownu Salomo wi e leisi taki a bun fu abi wan bun mati di wi kan fertrow, pe wi kan go suku yepi te dati de fanowdu. Odo e taki: „No gwe libi yu mati noso a mati fu yu p’pa èn no go na ini na oso fu yu brada te nowtu miti yu. Wan birtisma di de krosbei betre moro wan brada di de farawe” (Odo 27:10). Nanga den wortu disi a skrifiman wani meki wi ferstan taki wi musu warderi wan sma di de wan bun mati fu wi. Te nowtu de, a moro bun fu aksi a mati disi fu yepi wi na presi fu aksi wan famirman fu yepi wi. Te wan famirman de farawe fu wi dan a o de moro muilek gi en fu yepi wi, ma wi bun mati kan yepi wi moro esi bika a de krosbei fu wi.

25-31 AUGUSTUS

GUDU NA INI GADO WORTU ODO 28

San na a difrenti mindri wan ogrisma nanga wan ret’ati sma?

it-2-O 690

Retidu

Wan sma no kan tan abi so wan retidu nanga yepi fu en eigi krakti, ma soso te a abi wan tranga bribi èn e fertrow Yehovah nanga a krakti fu En di e ferlusu sma (Ps 25:21). Gado pramisi taki a o de wan „schild” nanga wan ’kibripresi’ di e hori wakti na a pasi fu den wan di e du sani na wan reti fasi (Odo 2:6-8; 10:29; Ps 41:12). Den man poti prakseri na a marki fu den, fu di den e tan du ala san den man fu Yehovah feni den bun (Ps 26:1-3; Odo 11:5; 28:18). Ma soleki fa wi si na ini a situwâsi fu Yob, dan den wan sondro fowtu kan kisi problema fu di na ogriwan e tiri èn den kan dede srefi makandra nanga den ogriwan. Yehovah ferteri wi krin taki a e poti prakseri na a libi fu den wan sondro fowtu èn a e gi wi a dyaranti taki a gudu fu den sortu sma dati o tan fu ala ten, sani o waka bun gi den ini a ten di e kon èn den o feni bun (Yob 9:20-22; Ps 37:18, 19, 37; 84:11; Odo 28:10). Wan sma no e kisi lespeki fu di a abi furu gudu, ma te a e du sani na wan retifasi, neleki fa a ben de nanga Yob (Odo 19:1; 28:6). Koloku fu den pkin di kisi a grani fu abi sowan sma leki papa (Odo 20:7), bika nanga na bun eksempre fu en, a libi wan bun nen na baka èn den pkin fu en o kisi wini fu a bun nen nanga lespeki di a ben abi.