O ten na a yoisti ten fu taki?

1. San wi e leri fu Preikiman 3:1, 7?

SON sma lobi taki furu. Trawan no lobi taki. Soleki fa a tekst na a bigin fu na artikel disi e sori, dan wan ten de fu taki èn wan ten de fu tan tiri. (Leisi Preikiman 3:1, 7.) Ma kande wi ben o wani taki son brada nanga sisa taki moro. Èn kande wi wani taki trawan no taki so furu.

2. Suma abi a reti fu sori wi o ten wi musu taki èn fa wi musu taki?

² Na Yehovah gi libisma wan mofo fu taki (Eks. 4:10, 11; Openb. 4:11). Na ini en Wortu a e yepi wi fu frustan fa wi musu gebroiki a kado disi na wan bun fasi. Na ini na artikel disi wi o taki fu wan tu eksempre na ini Bijbel di o meki wi si o ten wi musu taki èn o ten wi musu tan tiri. Wi o si tu fa Yehovah e denki fu den sani di wi e taigi trawan. Meki wi luku fosi o ten wi musu taki.

O TEN WI MUSU TAKI?

3. Soleki fa Romesma 10:14 e sori, dan o ten wi musu taki?

³ Ala ten wi musu de klariklari fu taki fu Yehovah èn fu a Kownukondre (Mat. 24:14; leisi Romesma 10:14). Te wi e du dati, dan wi e teki na eksempre fu Yesus. Wan fu den moro prenspari reide fu san ede Yesus kon na grontapu, na fu fruteri sma fu en Papa (Yoh. 18:37). Ma wi musu hori na prakseri taki a prenspari tu fa wi e taki nanga sma. Sobun, te wi e taki nanga tra sma fu Yehovah, dan wi musu du dati „na wan safri fasi èn nanga bigi lespeki” (1 Petr. 3:15). Wi musu hori na prakseri tu fa den e firi èn san den e bribi. Te wi e du dati, dan wi no o taki nomo, ma wi o leri den wan sani èn kande wi o man doro den ati.

4. Te wi e luku san Odo 9:9 e taki, dan fa owruman kan yepi trawan?

⁴ Owruman no musu draidrai fu taki efu den e si taki wan brada noso wan sisa musu kisi rai. A no de fu taki dati den o suku a yoisti ten fu taki, so taki den no meki a sma firi syen. Kande den musu taki te den wawan de nanga a sma. Ala ten owruman musu taki na wan lespeki fasi nanga sma. Toku den musu sori den Bijbel gronprakseri di kan yepi den fu teki koni bosroiti. (Leisi Odo 9:9.) Fu san ede a prenspari so fu abi deki-ati fu taki te dati de fanowdu? Wi o luku tu eksempre. Wi o taki fu wan man di ben musu piri-ai gi den manpikin fu en èn wi o taki fu wan uma di teki a deki-ati fu go taki nanga wan man di ben o tron kownu.

5. Fu san ede wi kan taki dati Granpriester Eli no piri-ai gi den manpikin fu en leki fa a ben musu du dati?

⁵ Granpriester Eli ben abi tu manpikin di a ben lobi trutru. Ma den manpikin fu en no ben lespeki Yehovah. Den ben e dini leki priester na a tabernakel. Ma den no ben tyari densrefi na wan bun fasi, den no ben abi nowan dropu lespeki gi den ofrandi di sma ben e tyari gi Yehovah èn den ben e du hurudu srefi (1 Sam. 2:12-17, 22). A Wet fu Moses ben sori taki den manpikin fu Eli ben musu dede, ma Eli no piri-ai gi den leki fa a ben musu du dati. A libi den fu tan wroko na a tabernakel (Deut. 21:18-21). Fa Yehovah ben feni a sani di Eli du? A taigi Eli: „Yu e gi den manpikin fu yu moro grani leki mi.” Yehovah bosroiti fu kiri den tu ogri-ati man dati.​—1 Sam. 2:29, 34.

6. San wi e leri fu a tori fu Eli?

⁶ Wi kan leri wan prenspari sani fu a tori fu Eli. Efu wi kon sabi taki wan mati noso wan famiriman fu wi pasa wan wet fu Gado, dan wi musu taki nanga en fu sori en fa Yehovah e denki fu a sani di a du. Baka dati wi musu sorgu taki a go suku yepi na den owruman di Yehovah gi a frantwortu fu yepi en (Yak. 5:14). Noiti wi wani de leki Eli. Wi no wani gi wan mati noso famiriman fu wi moro grani leki Yehovah. Wi musu abi deki-ati fu taigi wan sma taki a e du wan sani di no bun. Efu wi e du dati wi o yepi a sma. Meki wi luku now fa Abigayil, wan Israel uma, ben de heri tra fasi leki Eli.

7. Fu san ede Abigayil taki nanga David?

⁷ Abigayil ben de a wefi fu Nabal, wan guduman di ben abi furu gron. Di David nanga den man fu en ben e lowe gi Kownu Saul, dan wan pisi ten den ben de nanga den skapuman fu Nabal èn den ben e kibri den skapu gi fufuruman. Yu denki taki Nabal ben de nanga tangi gi a yepi dati? Nôno. Di David seni den man fu en fu aksi Nabal fu gi den pikinso nyanyan nanga watra, Nabal ati bron èn a kosi den (1 Sam. 25:5-8, 10-12, 14). A sani disi meki taki David ben wani kiri ala man na ini na oso fu Nabal (1 Sam. 25:13, 22). Suma ben o tapu David fu du so wan bigi ogri? Abigayil ben si taki disi ben de wan ten fu taki. Dati meki a teki deki-ati èn a go fu miti den 400 man di ben abi angri, di ben ati bron èn di ben abi fetisani. Dan a taki nanga David.

8. San wi e leri fu a tori fu Abigayil?

⁸ Di Abigayil miti David, a taki nanga lespeki èn a taki na so wan fasi taki David du san a taki. Aladi a no Abigayil tyari a problema disi kon, toku a aksi David pardon. A ben sabi taki David ben de wan bun man èn taki a ben wani du san bun. A ben sabi tu taki Yehovah ben o yepi en (1 Sam. 25:24, 26, 28, 33, 34). Neleki Abigayil, wi musu abi deki-ati tu fu taki efu wi si taki wan sma o meki wan bigi fowtu (Ps. 141:5). Wi musu taki nanga lespeki, ma wi musu abi deki-ati tu. Te wi e gi wan sma a rai di den abi fanowdu, dan wi o sori taki wi na wan trutru mati.​—Odo 27:17.

9-10. San owruman musu hori na prakseri te den e gi sma rai?

⁹ Owruman musu abi deki-ati fu taki te den e si taki wan sma na ini a gemeente o meki wan bigi fowtu (Gal. 6:1). Owruman e frustan taki den na sondusma èn taki wan dei den o abi rai fanowdu tu. Toku dati no musu tapu den fu piri-ai gi den wan di abi dati fanowdu (2 Tim. 4:2; Tit. 1:9). Te den e gi wan sma rai, dan den e pruberi fu gi en leri na wan koni fasi èn nanga pasensi. Fu di den lobi den brada nanga sisa, meki den wani yepi den (Odo 13:24). Ma a moro prenspari sani gi den, na fu gi grani na Yehovah. Den e du dati te den e leri sma san Yehovah e fruwakti fu den èn te den e kibri a gemeente gi problema.​—Tori 20:28.

¹⁰ Te nanga now wi si o ten wi musu taki. Ma son leisi a moro bun fu no taki noti. Na ini den paragraaf di e kon now, wi o si o ten wi no musu taki.

O TEN WI NO MUSU TAKI?

11. Sortu agersitori Yakobus gebroiki èn fu san ede na agersitori disi fiti?

¹¹ A kan muilek fu hori wisrefi fu no taki son sani. A Bijbel skrifiman Yakobus ben gebroiki wan moi agersitori fu sori o muilek a sani disi de. A ben taki: „Efu wan sma no e sondu nanga en mofo, dan a bun dorodoro èn a man basi en heri skin tu. Efu wi e tai titei na a mofo fu asi, so taki den kan du san wi wani, dan wi e tiri den heri skin tu” (Yak. 3:2, 3). Te wan sma di e rèi wan asi e hari den titei na a mofo fu asi, a kan meki na asi go pe a wani, noso a kan meki taki a stop lon. Efu a sma lusu a titei, na asi kan bigin lon bruyabruya èn a sma nanga na asi kan kisi mankeri. Na so a de tu taki te wi no e luku bun san wi e taki, dan dati kan abi takru bakapisi. Meki wi go luku o ten a bun fu hori wisrefi fu no taki.

12. O ten a bun fu no taki?

¹² San yu e du te wan brada noso wan sisa sabi sani di a no mag fruteri trawan? Fu eksempre, efu yu miti wan sma di e libi na ini wan kondre pe lanti tapu a wroko fu wi, yu e aksi en fu fruteri yu fa a wroko e du na ini a kondre dati? A no de fu taki dati yu no wani taki ogri miti yu brada nanga sisa. Wi lobi den brada nanga sisa fu wi èn wi wani sabi fa a e go nanga den. Wi wani begi gi den èn wi wani aksi Yehovah fu gi den san den abi fanowdu. Ma na ini den situwâsi disi a bun fu no taki noso aksi noti. Efu wi e pruberi fu dwengi wan sma fu fruteri wi sani di a no mag fruteri wi, dan wi no e sori lobi gi en. Wi no e sori lobi tu gi den tra brada nanga sisa di e libi na ini a kondre dati, fu di ogri kan miti den efu a sma fruteri fa den e du a wroko. Wi de seiker taki nowan fu wi wani du wan sani di o meki en moro muilek gi den brada nanga sisa di e libi na ini kondre pe lanti tapu a wroko fu wi. Na a tra sei wan brada noso sisa di e dini na ini so wan kondre no o fruteri fa den Kotoigi drape e du a preikiwroko, fa den e hori konmakandra noso fa den e du tra sani di abi fu du nanga na anbegi.

13. Soleki fa Odo 11:13 e sori, dan san owruman no musu du èn fu san ede?

¹³ A prenspari taki owruman hori densrefi na san skrifi na Odo 11:13. (Leisi en.) Den e du disi te den no e panya den tori fu trawan. A sani disi kan muilek spesrutu te wan owruman trow. Wan trowpaar abi wan bun matifasi fu di den e taki furu nanga makandra. Den e fruteri makandra fa den e denki, fa den e firi èn san e gi den broko-ede. Ma wan owruman e frustan taki a no musu fruteri en wefi den inibere tori fu den brada nanga sisa fu a gemeente. Efu a ben o du dati, dan den no o frutrow en moro èn a ben o kisi porinen. Den owruman di e tyari frantwortu na ini a gemeente „no musu hoigri” (1 Tim. 3:8). Sobun, den no musu panya sma tori. Efu wan owruman lobi en frow, dan a no o fruteri en sani di a no musu sabi.

14. Fa wan wefi kan yepi en masra fu abi wan bun nen na ini a gemeente?

¹⁴ Wan wefi kan yepi en masra fu abi wan bun nen na ini a gemeente te a no e dwengi en masra fu fruteri en sani di a musu hori gi ensrefi. Te a e du disi a e horibaka gi en masra èn a e sori taki a e lespeki den brada nanga sisa di kon suku yepi na en masra. Ma san moro prenspari, na taki Yehovah o breiti nanga en fu di a e sorgu taki freide nanga wánfasi de na ini a gemeente.​—Rom. 14:19.

FA YEHOVAH E DENKI FU DEN SANI DI WI E TAKI?

15. Fa Yehovah ben denki fu den dri mati fu Yob èn fu san ede?

¹⁵ Na ini a Bijbel buku Yob wi kan si o ten wi musu taki èn fa wi musu taki. Baka di Yob kisi omeni hebi tesi baka makandra, fo man kon na en fu trowstu en èn fu gi en rai. Wan heri pisi ten den man disi no ben taki noti. Ma den sani di Elifas, Bildad nanga Sofar taki baka dati sori taki den no teki ten fu denki fa den ben kan yepi Yob. Na presi fu dati den ben prakseri fa den ben kan sori taki Yob du wan ogri. Wan tu fu den sani di den taki ben tru, ma furu fu den sani di den taki fu Yob nanga Yehovah no ben tru. Den taigi Yob taki a no ben de wan bun sma (Yob 32:1-3). Fa Yehovah ben feni disi? En ati bron nanga den dri man disi. A taki dati den du wan don sani èn den ben musu aksi Yob fu begi gi den.​—Yob 42:7-9.

16. San wi kan leri fu a takru eksempre fu Elifas, Bildad nanga Sofar?

¹⁶ Wi e leri wan tu prenspari sani fu a takru eksempre fu Elifas, Bildad nanga Sofar. Wi leri taki wi no musu krutu wi brada nanga sisa (Mat. 7:1-5). Na presi fu dati, wi musu arki den bun fosi wi taki. Soso te wi e du dati, wi o man frustan a situwâsi fu den (1 Petr. 3:8). Wan tra sani, na taki te wi e taki, dan wi musu taki na wan switi fasi èn wi musu de seiker taki san wi e taki tru (Ef. 4:25). Wi leri tu taki Yehovah e arki te wi e taki nanga makandra.

17. San wi kan leri fu na eksempre fu Elihu?

¹⁷ A di fu fo sma di go luku Yob, ben de Elihu, wan famiri fu Abraham. Elihu ben e arki di Yob nanga den dri man ben e taki nanga makandra. A de krin taki a ben e arki bun san den ben e taki, fu di a ben man gi Yob rai na wan switi fasi, èn dati yepi Yob fu kenki en denki (Yob 33:1, 6, 17). Elihu no ben wani gi grani na ensrefi noso na wan tra sma. A moro prenspari sani gi en, na taki a ben wani gi grani na Yehovah (Yob 32:21, 22; 37:23, 24). Na eksempre fu Elihu e leri wi taki wan ten de fu tan tiri èn fu arki (Yak. 1:19). Wi e leri tu taki te wi e gi wan sma rai, dan a moro prenspari sani na fu gi grani na Yehovah, a no fu gi wisrefi grani.

18. Fa wi kan sori taki wi de nanga tangi taki wi man taki?

¹⁸ Te wi e gi yesi na Bijbel rai di e sori o ten wi musu taki èn fa wi musu taki, dan wi e sori taki wi de nanga tangi taki wi man taki. Koni Kownu Salomo ben taki: „Sani di wan sma taki na a yoisti ten, de leki gowtu apra na ini solfru koba” (Odo 25:11). Te wi e arki bun te tra sma e taki èn te wi e denki fosi wi taki, dan den sani di wi o taki o de leki gowtu apra di abi furu waarde èn di moi. Dan awinsi san wi o taki, wi o gi trawan deki-ati èn Yehovah o breiti nanga wi (Odo 23:15; Ef. 4:29). Disi na a moro bun fasi fa wi kan sori warderi gi a kado disi di Gado gi wi!