Brada nanga sisa di e libi na ini wánfasi

SOWAN 1500 yari langa den Israelsma ben de a pipel di ben e tyari a nen fu Yehovah Gado. Baka dati, Yehovah bigin „poti prakseri na den sma di no de Dyu, fu puru wan pipel na den mindri di musu tyari en nen” (Tori 15:14). A pipel di a ben o teki ben o de en kotoigi. Den ben o de sma di ben o abi wán denki èn di ben o tyari densrefi na a srefi fasi, awinsi pe fu grontapu den ben o libi. Ala den sma disi ben o kon na wán fu di Yesus ben gi den bakaman fu en wan wroko fu du. A ben taki: „Fu dati ede, go na sma fu ala kondre èn meki den tron disipel. Dopu den na ini a nen fu a Tata, fu a Manpikin, èn fu a santa yeye. Leri den fu du ala san mi taigi unu fu du.”​—Mat. 28:19, 20.

² Di yu gi yusrefi abra na Yehovah èn di yu dopu, yu tron wan disipel fu Yesus Krestes. Now yu de na ini wan bigi grupu Kresten brada nanga sisa na heri grontapu di e libi na ini wánfasi, awinsi den no de fu a srefi kondre noso a srefi lo èn awinsi den gudu noso den pôti (Ps. 133:1). A sani disi e meki taki yu lobi yu brada nanga sisa di de na ini a gemeente èn taki yu e lespeki den. Sonwan fu den de fu wan tra ras noso fu wan tra kondre èn kande den no kisi a srefi skoroleri leki yu. A kan taki yu no ben gwenti moksi nanga den sortu sma dati. Ma now a lobi di yu e firi gi den leki brada nanga sisa tranga moro a lobi di sma e firi gi makandra fu di den de fu a srefi libimakandra, fu a srefi kerki, noso fu a srefi famiri.​—Mark. 10:29, 30; Kol. 3:14; 1 Petr. 1:22.

KENKI A FASI FA YU E DENKI

³ Efu a tranga gi wan sma fu no krutu trawan moro di de fu wan tra ras, fu wan politiek grupu, di no abi a srefi posisi na ini a libimakandra, noso fu tra sani ede di rutu dipi na ini en ati, dan a kan prakseri den fosi Dyu Kresten. Den ben musu tapu nanga a takru gwenti di den ben abi fu krutu iniwan sma di no ben de fu a Dyu bribi. Di Petrus yere taki a ben musu go na a oso fu Kornelius, wan legre-edeman fu Rome, dan na wan switi fasi Yehovah ben sreka Petrus gi a wroko disi.​—Tori kap. 10.

⁴ Na ini wan fisyun, Petrus ben kisi a komando fu kiri èn nyan wan tu meti di no ben de krin gi den Dyu, soleki fa Gado wet ben taki. Fu di Petrus no ben wani, meki wan sten piki en komoto fu hemel: „Yu no musu taki moro taki den sani di Gado krin, na sani di no krin” (Tori 10:15). Gado srefi du wan sani fu kenki a prakseri fu Petrus, so taki a ben o man seni en go na Kornelius di no ben de wan Dyu. Di Petrus du san Yehovah taki, a taigi den wan di ben kon makandra na ini na oso fu Kornelius: „Un sabi heri bun taki a no fiti srefisrefi gi wan Dyu fu moksi nanga sma di no de Dyu, noso fu go na den sma disi. Ma toku Gado sori mi taki mi no musu taki fu nowan sma taki a no krin, noso taki a doti. Dati meki mi ben de klariklari fu kon di sma seni kari mi” (Tori 10:28, 29). Baka dati, Petrus si krin taki Yehovah ben feni Kornelius nanga en osofamiri bun.

⁵ Saulus fu Tarsus ben de wan Fariseiman di ben kisi hei skoroleri. A ben musu abi sakafasi fu moksi now nanga sma di a no ben o bumui fosi. A ben musu gi yesi srefi na san den ben e taigi en fu du (Tori 4:13; Gal. 1:13-20; Fil. 3:4-11). A no de fu taki dati sma soleki Sergiyus Paulus, Dionisiyus, Damaris, Fileimon, Oneisimus, nanga tra sma di ben gi yesi na a bun nyunsu èn di ben tron disipel fu Yesus Krestes, ben musu tyari kenki kon na ini a fasi fa den ben e denki.​—Tori 13:6-12; 17:22, 33, 34; Fileim. 8-20.

TAN HORI A WÁNFASI DI WI ABI NANGA WI BRADA NANGA SISA NA HERI GRONTAPU

⁶ A no de fu taki dati a lobi fu den brada nanga sisa na ini a gemeente fu yu na wan fu den sani di hari yu kon na Yehovah nanga en organisâsi. Yu kon si a lobi di ben o sori krin suma na den tru disipel fu Yesus Krestes. Yesus ben taki: „Mi e gi unu wan nyun komando, taki un musu lobi makandra. Neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra” (Yoh. 13:34, 35). Te fu kaba, yu kisi moro warderi gi Yehovah nanga en organisâsi di yu kon frustan taki a lobi di yu e si na ini a gemeente, de tu na mindri a pipel fu Yehovah na heri grontapu. Yu srefi e si fa a Bijbel profeititori e kon tru di e taki fu a wroko di ben o du na ini den lasti dei fu tyari sma kon na wán fu anbegi Yehovah na ini freide nanga wánfasi.​—Mika 4:1-5.

⁷ Te yu prakseri den someni sani di e prati sma na ini a ten disi, dan oiti yu ben denki taki sma fu „ala kondre, lo, pipel, nanga tongo”, ben o man libi na ini wánfasi? (Openb. 7:9) Luku a difrenti na mindri den sma na ini bigi foto pe den abi ala sortu kefalek nyun sani èn den wan di e libi na ini dorpu pe sma e hori densrefi na owruten gwenti. Prakseri fa sma fu a srefi ras noso fu a srefi kondre e feti nanga makandra, soso fu di den de fu wan tra kerki. Fu di moro nanga moro sma e prakseri taki a kondre fu den bun moro tra kondre, meki a pratifasi na mindri libisma na ini politiek kon moro furu leki na iniwan ten na fesi. Te yu luku ala den sani di e tyari pratifasi kon na mindri libisma, dan a moi srefisrefi fu si taki na ini Gado organisâsi sma fu difrenti kondre, tongo, nanga grupu abi furu lobi gi makandra èn den e libi na ini freide. Disi na wan wondru di soso na Almakti Gado kan du.​—Sak. 4:6.

⁸ Ma a wánfasi dati na trutru wánfasi. Di yu gi yusrefi abra na Yehovah èn yu dopu leki wan Kotoigi fu en, dan yu srefi tron wan fu den brada noso sisa di e libi na ini wánfasi nanga den trawan. Yu e kisi wini fu a wánfasi disi èn yu abi a frantwortu sosrefi fu sorgu taki a no lasi gowe. Yu kan du disi te yu e gi yesi na den wortu fu na apostel Paulus di skrifi na Galasiasma 6:10: „Solanga wi abi na okasi, meki wi du bun gi ala sma, ma spesrutu gi den wan di abi a srefi bribi leki wi.” Wi e gi yesi na a rai disi tu: „No strei nanga makandra èn no prakseri tumusi furu fu unsrefi, ma abi sakafasi èn si trawan moro hei leki unsrefi. No poti prakseri na un eigi afersi nomo, ma poti prakseri na den afersi fu trawan tu” (Fil. 2:3, 4). Solanga wi e leri fu si wi brada nanga sisa soleki fa Yehovah e si den sondro fu luku nomo san wi ai e si, dan wi o prisiri nanga den èn wi o libi bun nanga makandra.​—Ef. 4:23, 24.

WI MUSU BROKO WI EDE NANGA MAKANDRA

⁹ Na ini wan agersitori na apostel Paulus sori taki pratifasi no musu de na ini a gemeente, ma ala sma drape musu sorgu bun gi makandra (1 Kor. 12:14-26). A kan taki wi de farawe fu sonwan fu den brada nanga sisa fu wi, ma dati no wani taki dati wi no e prakseri den. Te den e kisi frufolgu, dan wi alamala e broko wi ede nanga den. Te den e pina, te rampu miti den, te den kisi fu du nanga orloku, noso feti de na ini a kondre fu den, dan wi alamala wani du san wi man fu tranga a bribi fu den èn fu sorgu taki den kisi den sani di den abi fanowdu.​—2 Kor. 1:8-11.

¹⁰ Wi alamala musu begi gi wi brada nanga sisa ibri dei. Sonwan fu den e kisi tesi fu du sani di no bun. Trawan abi problema di ala sma sabi fu den. Ma sonwan fu wi brada nanga sisa e kisi tesi di wi no sabi. Kande sma na wrokope noso famiriman di no e dini Yehovah e gens den (Mat. 10:35, 36; 1 Tes. 2:14). Wi alamala e broko wi ede nanga den tori dati, fu di wi de wán nanga den brada nanga sisa fu wi na heri grontapu (1 Petr. 5:9). Yu abi sma tu di e wroko tranga na ini a diniwroko fu Yehovah, sma di e teki fesi na ini a preikiwroko èn sma di e teki fesi na ini a gemeente. Trawan kisi a frantwortu fu luku a wroko na heri grontapu. Awinsi wi srefi no man du noti fu yepi den, toku a de fanowdu taki wi begi gi den alamala. Na a fasi dati wi e sori taki wi lobi den èn taki wi e broko wi ede nanga den trutru.​—Ef. 1:16; 1 Tes. 1:2, 3; 5:25.

¹¹ Fu di so furu ogri e pasa na grontapu na ini den lasti dei disi, meki a pipel fu Yehovah musu de srekasreka fu yepi makandra. Te rampu soleki gronseki nanga bigi frudu e pasa na son presi, dan furu wroko musu du fu yepi den brada nanga sisa èn sani musu seti fu gi den san den abi fanowdu. Den fosi Kresten gi wi wan bun eksempre na ini a tori disi. Den disipel fu Antiokia ben breiti fu yepi den brada nanga sisa na ini Yudea (Tori 11:27-30; 20:35). Bakaten na apostel Paulus ben gi den Kresten na ini Korente a deki-ati fu horibaka gi den sani di seti fu yepi den brada nanga sisa di de na nowtu (2 Kor. 9:1-15). Te brada nanga sisa na ini a ten disi e kisi fu du nanga muilek situwâsi èn den abi yepi fanowdu, dan wantewante na organisâsi fu wi èn den Kresten brada nanga sisa e gi den a yepi di de fanowdu.

YEHOVAH TEKI WI FU DU A WANI FU EN

¹² Ala den brada nanga sisa na heri grontapu e libi na ini wánfasi èn den orga fu du a wani fu Yehovah. Na ini a ten disi, Gado wani taki a bun nyunsu fu a Kownukondre musu preiki na ala sei fu grontapu, so taki sma fu ala kondre yere a boskopu (Mat. 24:14). Na a tra sei, Yehovah wani taki wi tan tyari wisrefi soleki fa a leri wi (1 Petr. 1:14-16). Wi alamala musu de klariklari fu saka wisrefi ondro trawan èn fu wroko tranga fu meki sma yere a bun nyunsu (Ef. 5:21). A ten disi a no fu suku wini gi wisrefi, ma fu poti Gado Kownukondre na a fosi presi na ini wi libi (Mat. 6:33). Efu wi hori a sani disi na prakseri te wi e wroko makandra fu prati a bun nyunsu, dan nownow kaba dati o gi wi furu prisiri èn a o meki wi kisi blesi fu têgo.

¹³ Kotoigi fu Yehovah no de leki tra sma, fu di a Gado fu wi teki wi fu de wan krin pipel di e du a wroko fu en fayafaya (Tit. 2:14). Na anbegi fu wi e meki taki wi de tra fasi. Boiti taki wi e wroko makandra nanga wi brada nanga sisa na heri grontapu, wi alamala e taki a soifri tongo tu di Gado leri wi èn wi e du san wi leri. Yehovah ben meki en profeiti Sefanya skrifi: „Mi o leri den pipel wan soifri tongo, so taki den alamala kan kari a nen fu Yehovah èn dini en makandra leki wán man.”​—Sef. 3:9.

¹⁴ Baka dati Yehovah meki a profeiti Sefanya skrifi fu a wánfasi di ben de na mindri Gado pipel na heri grontapu èn di wi e si na ini a ten disi. A ben taki: „Den sma di tan abra fu Israel no o du nowan kruktudu, den no o taki nowan lei, èn den no o taki sani fu bedrigi trawan. Na presi fu dati den o nyan den bere furu, den o didon langalanga na ini a grasi, èn nowan sma o meki den frede” (Sef. 3:13). Fu di wi kon frustan a Wortu fu Yehovah, fu di wi kenki a fasi fa wi e denki èn fu di wi e libi soleki fa Yehovah wani, meki wi man wroko na ini wánfasi. Wi e du wan sani di tra libisma e si leki wan sani di no man kwetikweti. Iya, a pipel fu Gado no de leki tra sma fu di wi e gi Gado glori na ala sei fu grontapu.​—Mika 2:12.