YONGUSMA E AKSI

Mi musu dopu?—Pisi 3: San e hori mi na baka?

Te yu e prakseri fu gi yusrefi abra na Yehovah èn teki dopu, dan fa yu e firi? Yu e senwe? Efu dati de so, dan na artikel disi o yepi yu fu no frede moro.

Na ini na artikel disi

San o pasa efu mi meki wan bigi fowtu baka te mi dopu?

Fu san ede son yongusma e denki so: Kande yu sabi wan sma di du wan seryusu sondu èn di ben puru fu a gemeente èn yu frede taki a sani disi kan miti yu tu (1 Korentesma 5:11-13).

„Di mi ben denki dopu, mi ben frede taki mi ben o meki wan bigi fowtu baka te mi dopu èn taki dati ben o gi mi papa nanga mama syen.”—Rebekah.

Prenspari tekst: „Meki den ogri sma libi den pasi fu den . . . Meki den drai go baka na Yehovah di o sori den sari-ati. Meki den drai go baka na wi Gado, bika a o gi den pardon nanga en heri ati.”—Yesaya 55:7.

Prakseri a sani disi: A tru taki sma di e sondu èn di no abi berow e puru fu a gemeente. Ma Yehovah e sori sari-ati gi sma di e sori berow, di abi sakafasi èn di e teki piri-ai.—Psalm 103:13, 14; 2 Korentesma 7:11.

Boiti dati a de so taki aladi yu na wan sondusma, toku yu o man kakafutu gi tesi fu di Gado o yepi yu (1 Korentesma 10:13). Te yu luku en bun, dan suma e bosroiti san yu o du? Yusrefi? Noso wan tra sma?

„Mi ben frede taki mi ben o meki wan bigi fowtu baka mi dopu. Ma mi kon frustan taki efu mi no ben o dopu, dati srefi ben o de wan fowtu. Mi kon si taki efu mi wani dopu, mi no musu frede sani di kande noiti no o pasa.”—Karen.

San yu musu sabi na disi: Efu yu teki a bosroiti fu wai pasi gi seryusu sondu, dan yu o man du dati neleki furu fu den sma di e anbegi Yehovah.—Filipisma 2:12.

Yu wani sabi moro? Luku na artikel „Hoe kan ik nee zeggen tegen verleidingen?”

San mi musu du efu mi e frede a frantwortu di wan sma e kisi te a dopu?

Fu san ede son yongusma e denki so: Kande yu sabi wan tu yongusma di froisi go na wan fara presi fu man du moro gi Yehovah èn yu frede taki sma o fruwakti taki yu du a srefi.

„Wan dopu Kresten kan kisi a grani fu du moro gi Yehovah. Ma son sma no klari ete fu du dati, noso a situwâsi fu den e meki taki den no man.”—Marie.

Prenspari tekst: „Meki ibri sma ondrosuku san na den sani di ensrefi e du. Dan dati sa meki taki a e prisiri nanga san ensrefi e du èn a no musu teki ensrefi gersi nanga tra sma.”—Galasiasma 6:4.

Prakseri a sani disi: Na presi fu teki yu srefi gersi nanga trawan, yu musu focus tapu den wortu na ini Markus 12:30: „Un musu lobi Yehovah un Gado nanga un heri ati.”

Luku taki yu musu dini Yehovah nanga yu heri ati. Yu no musu dini en nanga wan tra sma ati. Efu yu lobi Yehovah trutru, dan yu o feni wan fasi fu du ala san yu man gi en.

„Dopu na wan seryusu sani ma a no de wan hebi. Efu yu sorgu taki yu abi bun mati, dan den o yepi yu. Te yu e teki moro frantwortu pikinso-pikinso, dan dati o meki yu de moro koloku. Efu yu no dopu, dan yu e hori yusrefi na baka.”—Julia.

San yu musu sabi na disi: Efu yu de nanga tangi gi a lobi di Yehovah sori gi yu, dan yu o wani du ala san yu man gi en.—1 Yohanes 4:19.

Yu wani sabi moro? Luku na artikel „Hoeveel verantwoordelijkheidsgevoel heb ik?”

San mi musu du efu mi e firi leki mi no bun nofo fu dini Yehovah?

Fu san ede son yongusma e denki so: Yehovah na a Moro Hei Tiriman fu hemel nanga grontapu èn wi leki libisma na noti. Kande yu e aksi yusrefi efu Yehovah sabi srefi taki yu de na libi.

„Fu di mi papa nanga mama ben de Yehovah Kotoigi, meki mi ben denki taki mi ben dini Yehovah soso fu di den ben du dati.”—Natalie.

Prenspari tekst: „Nowan sma kan kon na mi, efu a Tata di seni mi kon no e hari en kon.”—Yohanes 6:44.

Prakseri a sani disi: A firi di yu abi fu dopu kan sori kaba taki Yehovah wani tron wan moro bun mati fu yu. San yu e denki? Yu wani kon moro krosibei na en tu?

Hori na prakseri tu taki na Yehovah wawan e bosroiti suma a o hari kon na en. Èn Bijbel e sori taki efu yu „kon krosibei na Gado” dan yu kan de seiker taki „a o kon krosibei” na yu.—Yakobus 4:8.

„Yu leri sabi Yehovah èn a hari yu kon na en. Dati e sori kaba taki a lobi yu. Sobun, te yu e kisi a firi taki yu no bun nofo fu dini Yehovah, dan yu musu taigi yusrefi taki a no e denki so. Èn Yehovah abi leti ala ten.”—Selina.

San yu musu sabi na disi: Efu yu e doro den markitiki fu Bijbel fu man dopu, dan yu bun nofo fu anbegi Yehovah. Èn hori na prakseri taki Yehovah abi reti tapu na anbegi fu yu.—Openbaring 4:11.

Yu wani sabi moro? Luku na artikel „Waarom zou ik bidden?”