LES 57
San yu musu du efu yu du wan seryusu sondu?
Aladi yu lobi Yehovah èn yu e meki muiti fu no du sani di e hati en, toku yu o meki fowtu son leisi. Ma son sondu seryusu moro trawan (1 Korentesma 6:9, 10). Efu yu du wan seryusu sondu, dan hori na prakseri taki Yehovah lobi yu ete. A wani gi yu pardon èn a wani yepi yu.
1. San wi musu du efu wi wani taki Yehovah gi wi pardon?
Efu wan sma lobi Yehovah, dan a o sari te a kon frustan taki a du wan seryusu sondu. Ma a pramisi disi fu Yehovah kan trowstu en: „Awinsi den sondu fu unu redi leki brudu, toku den o kon weti leki snew” (Yesaya 1:18). Efu wi abi berow trutru, dan Yehovah o gi wi pardon. Fa wi kan sori taki wi abi berow? Te wi abi berow, dan wi e sari fu san wi du, wi e stop nanga na ogri di wi ben du èn wi e begi Yehovah fu gi wi pardon. Wi o meki tranga muiti fu kenki den fowtu denki nanga den gwenti di wi ben abi di meki taki wi du a sondu. Dan wi o pruberi fu libi soleki fa Yehovah wani.—Leisi Yesaya 55:6, 7.
2. Fa Yehovah e gebroiki den owruman fu yepi wi te wi du wan sondu?
Efu wi du wan seryusu sondu, dan Yehovah wani taki wi musu „kari den owruman fu a gemeente”. (Leisi Yakobus 5:14, 15.) Den owruman lobi Yehovah nanga den brada nanga sisa fu a gemeente. Den leri fa den musu yepi wi fu tron bun mati fu Yehovah baka.—Galasiasma 6:1.
Fa den owruman e yepi wi te wi du wan seryusu sondu? Tu noso dri owruman o gebroiki Bijbel fu sori wi fu san ede a sani di wi du no bun. Den o gi wi rai nanga deki-ati tu di o yepi wi fu no du a sondu baka. Efu wan sma di du wan seryusu sondu no abi berow, dan den owruman o puru en fu a gemeente, so taki a no pori a denki fu den trawan.
SORTU TRA SANI YU KAN LERI?
Den sani di wi o luku now o meki yu kisi moro warderi gi a fasi fa Yehovah e yepi wi te wi du wan seryusu sondu.
3. Te wi e taki krin san wi du, dan wi o man tron bun mati fu Yehovah baka
Ala sondu di wi e du, na sondu teige Yehovah. Dati meki ala ten wi musu taigi en san wi du. Leisi Psalm 32:1-5 èn taki fu na aksi disi:
Fu san ede a bun fu taigi Yehovah san wi du, na presi fu kibri a sondu?
Baka te wi fruteri Yehovah sortu sondu wi du, dan wi musu go suku yepi tu na den owruman. Dati o meki wi firi moro bun. Prei a FELEM èn taki fu na aksi disi:
Fa den owruman yepi Canon fu drai kon baka na Yehovah?
Wi musu de eerlijk nanga den owruman èn wi musu taigi den ala san wi du. Yehovah poti den fu yepi wi. Leisi Yakobus 5:16 èn taki fu na aksi disi:
Fu san ede a o moro makelek gi den owruman fu yepi wi te wi de eerlijk nanga den?
Fruteri sortu sondu yu du, de eerlijk nanga den owruman èn teki a yepi di Yehovah e gi yu fu di a lobi yu
4. Yehovah e sori sari-ati gi sma di du seryusu sondu
Efu wan sma du wan seryusu sondu èn a no wani libi moro soleki fa Yehovah wani, dan den e puru en fu a gemeente èn wi no e moksi moro nanga en. Leisi 1 Korentesma 5:6, 11. Baka dati taki fu na aksi disi:
Te wan sma di no abi berow fu en sondu e tan moksi nanga a gemeente, dan a de neleki srudeki di e meki blon sweri. San so wan sma kan du nanga a gemeente?
Yehovah abi sari-ati nanga sondu libisma èn fu di owruman e suku fu sori sari-ati neleki en, meki den e suku fu yepi den wan di ben puru fu a gemeente. Furu fu den drai kon baka na a gemeente. Fu san ede? Aladi a no ben switi gi den sma dati taki den puru fu a gemeente, toku a sani dati yepi den fu frustan taki san den ben du no bun.—Psalm 141:5.
Te yu luku san Yehovah e du nanga wan sma di sondu, dan fa dati e sori taki Yehovah abi lobi nanga sari-ati èn taki a no e strafu sma tumusi hebi?
5. Yehovah e gi wi pardon te wi abi berow
Yesus gebroiki wan agersitori fu sori fa Yehovah e firi te wan sma abi berow. Leisi Lukas 15:1-7 èn taki fu na aksi disi:
San disi e leri yu fu Yehovah?
Leisi Esekièl 33:11 èn taki fu na aksi disi:
Sortu prenspari sani wan sma musu du te a abi berow?
Neleki fa wan skapuman lobi den skapu fu en, na so Yehovah lobi den anbegiman fu en
SON SMA E TAKI: „Mi frede taki te mi o fruteri den owruman sortu sondu mi du, dan den o puru mi fu a gemeente.”
San yu ben o taigi wan sma di e firi so?
SAN YU LERI?
Efu wi du wan seryusu sondu, ma wi e sari trutru èn wi teki a bosroiti fu no du a sondu moro, dan Yehovah o gi wi pardon.
Fa yu ben o piki den aksi disi?
Fu san ede a bun fu taigi Yehovah sortu sondu wi du?
San wi musu du efu wi wani kisi pardon fu wi sondu?
Efu wi du wan seryusu sondu, dan fu san ede wi musu suku yepi na den owruman?
TRA SANI DI YU KAN LUKU
Na ini a felem disi yu o si fa Yehovah sori sari-ati gi wan man soleki fa skrifi na Yesaya 1:18.
Fa owruman e suku fu yepi sma di du seryusu sondu?
Luku fa den owruman e pruberi fu sori lobi nanga sari-ati te den e yepi den wan di du wan seryusu sondu èn di no ben abi berow.
„Fa den owruman kan yepi den wan di puru fu a gemeente” (A Waktitoren, augustus 2024)
Na ini na artikel di nen „Mi ben musu drai go baka na Yehovah”, yu o leisi fu wan man di ben gowe libi Yehovah. Fu san ede a feni taki na Yehovah hari en kon baka?