1, 2. San kring-opziener na heri grontapu si na ini furu gemeente?

NA A kaba fu wan konmakandra di a kring-opziener hori nanga den owruman fu a gemeente, a luku den. A ben lobi den owruman disi di e wroko tranga. Sonwan fu den ben owru nofo fu de en papa. Ma wan prenspari sani ben de ete nanga san a ben e broko en ede. Dati meki a aksi den: „Brada, san un du fu yepi tra brada fu teki moro frantwortu na ini a gemeente?” Den kan memre taki di a kring-opziener kon na a gemeente a lasti leisi, dan a gi den deki-ati fu meki moro muiti fu yepi tra brada fu teki frantwortu. Te fu kaba, wan fu den owruman taigi en: „We, wi no du furu.” Ala den tra owruman ben agri nanga en.

² Efu yu na wan owruman, dan kande yu e frustan san pasa na a konmakandra dati. Kring-opziener na heri grontapu si taki na ini furu gemeente, moro musu du fu leri yongu nanga owru brada fa fu teki frantwortu na ini a gemeente. Ma a no de so makriki fu du disi. Fu san ede?

3. (a) Fa Bijbel e sori taki a prenspari fu leri brada fu teki moro frantwortu na ini a gemeente? (b) Fu san ede wi alamala musu wani sabi moro fu a tori disi? (Luku san skrifi na a marki na ondrosei fu a bladzijde disi.) (c) Fu san ede son owruman e feni en muilek fu yepi tra brada?

³ A musu fu de so taki yu leki owruman e frustan o prenspari a de fu leri tra brada fa fu teki moro frantwortu na ini a gemeente.a Yu sabi taki moro brada de fanowdu fu yepi a gemeente fu abi wan tranga bribi, èn te nyun gemeente seti den brada disi kan yepi den gemeente disi. (Leisi Yesaya 60:22.) Yu sabi tu taki Gado Wortu e gi yu deki-ati fu „gi tra sma leri”. (Leisi 2 Timoteyus 2:2.) Ma neleki den owruman di wi kari na a bigin fu na artikel, na so yu srefi kan feni tu taki disi no de so makriki. Kande yu abi wan osofamiri di yu musu sorgu, yu abi wan grontapuwroko, yu musu tyari den frantwortu fu yu na ini a gemeente èn yu abi tra prenspari sani fu du. Te yu musu du ala den sani disi, dan a gersi leki ten no de fu leri brada fa fu du moro na ini a gemeente. Sobun, meki wi go luku fu san ede a prenspari taki yu e teki ten fu yepi tra brada.

A PRENSPARI FU LERI BRADA NOWNOW FA FU DU MORO NA INI A GEMEENTE

4. Fu san ede owruman e draidrai son leisi fu leri brada fa fu du moro na ini a gemeente?

⁴ Fu san ede a muilek gi son owruman fu poti ten na wan sei fu yepi tra brada? Kande wan tu fu den e denki: ’Mi sabi taki a prenspari fu leri brada fa fu du moro na ini a gemeente, ma now mi no abi a ten. Tra sani de na ini a gemeente di no kan wakti. Awinsi mi no e yepi tra brada now, a gemeente no o firi en.’ A tru taki furu sani de na ini a gemeente di unu leki owruman musu luku wantewante. Ma efu unu no e bigin leri brada nownow fa fu teki moro frantwortu, dan bakaten dati no o bun gi a gemeente.

5, 6. Fa na eksempre fu a wagi e yepi owruman fu si fu san ede a prenspari fu leri brada nownow fu du moro na ini a gemeente?

⁵ Luku wan eksempre: Wan sma di abi wan wagi, sabi kande taki wanwan leisi a musu kenki a smeer-oli efu a no wani taki a wagi fu en broko. Ma kande a no e du en, fu di a feni taki a moro prenspari fu lai oli na ini a tank, noso a wagi o libi en na pasi. Kande a e denki: ’Now mi no abi ten fu kenki a smeer-oli. Ma awinsi mi no du en, a wagi o rèi fu di oli de na ini a tank.’ Ma san kan pasa? Efu a no e poti smeer-oli gi a wagi, dan wan dei a wagi o klèm èn a no o man rèi moro. Te dati pasa, a o abi fu pai wan lo moni fu meki a wagi baka. San wi kan leri fu na eksempre disi?

⁶ Furu prenspari sani de di owruman musu du wantewante, noso sani no o waka bun nanga a gemeente. A sma na ini na eksempre e sorgu taki a e tan poti oli na ini a tank fu a wagi. Na so owruman musu tan sorgu tu gi „den moro prenspari sani” di de fanowdu fu meki a gemeente drai bun (Fil. 1:10). Ma son owruman e wroko so tranga fu sorgu gi den prenspari sani na ini a gemeente, taki den no abi ten fu leri brada fa fu teki moro frantwortu. Disi de neleki te wan sma no e kenki a smeer-oli fu a wagi fu en. Ma efu owruman e draidrai fu leri brada fa fu du moro, dan wan ten o kon taki nofo lepi brada no o de fu du a wroko na ini a gemeente.

7. Fa wi musu si owruman di e meki ten fu yepi brada fu teki moro frantwortu na ini a gemeente?

⁷ Na eksempre disi e sori wi taki owruman no musu denki taki a no de so prenspari fu yepi brada fu teki moro frantwortu na ini a gemeente. Owruman di wani taki sani waka bun na ini na gemeente bakaten, o meki ten fu yepi tra brada. Te den e du disi, dan den e sori taki den na koni futuboi fu Gado èn den brada nanga sisa na ini a gemeente o abi furu warderi gi den. (Leisi 1 Petrus 4:10.) Sortu wini a gemeente o kisi?

A NO DE FU SOSO

8. (a) Fu san ede owruman musu yepi tra brada fu du moro na ini a gemeente? (b) Te owruman go dini pe moro yepi de fanowdu, dan sortu prenspari frantwortu den abi? (Luku a faki di nen „Wan prenspari wroko di musu du nownow”.)

⁸ Srefi te owruman abi furu ondrofeni, den musu abi sakafasi èn den musu frustan taki te den kon owru, den no o man du so furu moro na ini a gemeente (Mika 6:8). Den musu hori na prakseri tu taki „ogri ten nanga sani di den no e fruwakti”, kan meki taki wantronso den no man du a wroko fu den na ini a gemeente moro (Preik. 9:11, 12; Yak. 4:13, 14).Owruman lobi a pipel fu Yehovah èn den e broko den ede nanga den. Dati meki den e du furu muiti fu sori yongu brada san den srefi leri na ini ala den yari.​—Leisi Psalm 71:17, 18.

9. Sortu sani di o pasa na ini a ten di e kon, e meki taki a prenspari fu yepi tra brada nownow?

⁹ Owruman di e leri brada fa fu teki moro frantwortu, e du wan prenspari sani di o tranga a bribi fu den brada nanga sisa na ini a gemeente. A muiti di den owruman e du, o meki taki moro brada o man yepi a gemeente fu tan dini Gado èn fu de wán. Disi prenspari now, ma a o de moro prenspari srefi na ini a ten fu a bigi banawtu di de na pasi e kon (Esek. 38:10-12; Mika 5:5, 6). Sobun, un lobi owruman, wi e begi unu fu tan meki ten fu leri brada nownow fa fu du moro na ini a gemeente.

10. San wan owruman kan du fu feni a ten fu yepi brada?

¹⁰ Wi e frustan taki yu abi furu prenspari sani fu du na ini a gemeente di e teki furu fu yu ten. Toku yu o abi fu gebroiki pikinso fu a ten dati fu leri brada fa fu teki moro frantwortu na ini a gemeente (Preik. 3:1). Te yu e du disi, dan a gemeente o kisi wini fu dati bakaten.

SREKA NA ATI FU A BRADA DI YU WANI YEPI

11. (a) Te wi e luku den rai di owruman fu difrenti kondre e gi, dan san dati e sori wi? (b) Soleki fa Odo 15:22 e taki, dan fu san ede a bun fu go luku den rai di tra owruman gi?

¹¹ No so langa pasa, den aksi wan grupu owruman fa den ben man yepi furu brada fu du moro na ini a gemeente.b Aladi ibriwan fu den owruman de na ini wan tra situwâsi, toku den gi a srefi sortu rai. San disi e sori? Den rai fu Bijbel bun fu yepi owruman fu leri brada „na ala presi” èn „na ini ibri gemeente” fu du moro. Na so a ben de tu na ini a ten fu na apostel Paulus (1 Kor. 4:17). Sobun, na ini na artikel disi èn na ini a wan di e kon, wi o luku wan tu fu den rai di den owruman disi gi.​—Odo 15:22.

12. San wan owruman musu du te a wani leri wan tra brada fa fu du moro èn fu san ede a musu du dati?

¹² Wan owruman di wani yepi wan brada, musu de neleki wan gronman. Wan gronman di wani sai siri e drai a doti fosi, so taki den siri kan gro bun. Na so a de tu taki te wan owruman wani yepi wan brada fa fu teki wan tra frantwortu, a musu sreka na ati fu a brada disi fosi. Ma fa wan owruman kan du disi? A kan teki na eksempre fu Samuel, wan profeiti fu owruten di ben sabi fa fu leri trawan fu du moro.

13-15. (a) San Yehovah ben taigi Samuel fu du? (b) Fa Samuel du disi? (Luku a prenki na a bigin fu na artikel.) (c) Fu san ede a Bijbel tori fu Samuel na wan moi eksempre gi owruman na ini a ten disi?

¹³ Wan dei, sowan 3000 yari pasa, Yehovah taigi na owru profeiti Samuel: „Tamara so wan yuru mi o seni wan man fu a kontren fu Benyamin kon na yu. Yu musu salfu en leki tiriman fu mi pipel Israel” (1 Sam. 9:15, 16). Samuel ben frustan taki a no ben o tiri a pipel fu Israel moro èn Yehovah ben aksi en fu salfu wan tra sma leki tiriman. Kande Samuel ben aksi ensrefi: ’Fa mi kan sreka a man gi a wroko di a musu du?’ Dati meki a bigin luku san a ben kan du èn fa a ben o du en.

¹⁴ A dei na en baka, di a profeiti Samuel si Saul, Yehovah taigi a profeiti: „Disi na a man.” Ne Samuel du san a ben abi na prakseri. A kari Saul fu kon nyan nanga en. A gi Saul nanga a yepiman fu en den moro bun sturu nanga a moro bun pisi meti. Dan Samuel taki: „Teki en, dan yu nyan en, bika wi ben kibri en gi na okasi disi.” Baka di den nyan, Samuel aksi Saul fu kon na en oso. Di den tu man disi waka go drape, Samuel gebroiki na okasi dati fu taki nanga Saul èn den ben abi wan switi takimakandra. Dan a kari Saul kon na tapu a daki fu en oso. Na a mofoneti dati wan switi kowru winti ben e wai èn Samuel „taki go doro nanga Saul na tapu a daki fu na oso” teleki den ben musu go sribi. A dei na en baka, Samuel salfu Saul, a bosi en èn a gi en moro leri. Baka dati a seni Saul gowe. Now Saul ben de srekasreka gi den sani di ben o miti en.​—1 Sam. 9:17-27; 10:1.

¹⁵ Ma fu salfu wan man fu de tiriman fu wan kondre, a no a srefi leki fu leri wan brada fa fu tron wan owruman noso dinari ini a diniwroko na ini a gemeente. Toku owruman na ini a ten disi kan leri wan tu moi sani fu na eksempre fu Samuel. Now wi o go luku tu fu den sani di a profeiti disi du.

OWRUMAN MUSU DE KLARIKLARI FU GI LERI ÈN DEN MUSU DE TRUTRU MATI

16. (a) Fa Samuel firi di Israel ben wani wan kownu? (b) San Samuel du di Yehovah aksi en fu salfu Saul?

¹⁶ De klariklari fu gi leri, no draidrai. Di Samuel yere taki den Israelsma ben wani wan libisma kownu, a ben mandi èn a ben abi a firi taki a pipel no ben wani en moro (1 Sam. 8:4-8). A no ben wani du kwetikweti san a pipel aksi en. Dati meki Yehovah ben musu taigi en dri leisi fu du san a pipel taki (1 Sam. 8:7, 9, 22). Toku Samuel no ben dyarusu tapu a man di ben o teki en presi èn en ati no ben bron nanga tu. Di Yehovah taigi a profeiti fu salfu Saul, dan a no du en nomo fu di a ben musu, ma a du en fu di a ben lobi Gado.

17. Fa owruman na ini a ten disi e teki na eksempre fu Samuel èn fa den e firi?

¹⁷ Na ini a ten disi, yu abi furu owruman di abi ondrofeni èn di e teki na eksempre fu Samuel. Na wan lobi-ati fasi den e yepi tra brada fu du moro (1 Petr. 5:2). Den owruman disi abi switifasi èn den de klariklari fu sori brada fa fu du moro na ini a gemeente. Den no e frede fu leri den brada disi fu du sonwan fu den sani di den srefi e du na ini a gemeente. Den owruman no e si den brada disi leki feanti, ma leki sma di warti gi den èn di e „wroko makandra” nanga den fu sorgu gi a gemeente (2 Kor. 1:24; Hebr. 13:16). Den owruman e firi bun te den e si taki den brada disi e du den sani di den e leri fu yepi a gemeente.​—Tori 20:35.

18, 19. Fa wan owruman kan sreka na ati fu wan brada èn fu san ede disi de prenspari?

¹⁸ No de wan leriman nomo, de wan mati tu. A dei di Samuel miti Saul, a ben kan teki wan batra oli èn kanti dati go na tapu Saul ede wantewante. Baka dati a ben kan seni Saul gowe leki a nyun kownu fu Israel. Ma dan Saul no ben o de srekasreka srefisrefi. Na presi fu du dati, Samuel teki en ten fu sreka na ati fu Saul safrisafri: Den nyan wan switi nyanyan, den teki wan koiri, den taki langa nanga makandra èn den rostu. Baka di a profeiti du den sani disi, dan fosi a ben feni taki a yuru doro fu salfu Saul.

¹⁹ Na so a de tu taki te owruman na ini a ten disi wani leri brada fa fu du moro, dan den musu pruberi fosi fu tron mati nanga den. Den sani di owruman o du fu meki mati nanga den brada disi o difrenti, fu di na ini ibri kondre noso kulturu sani de tra fasi. Ma awinsi pe yu e libi èn awinsi yu na wan owruman di abi furu fu du, toku yu musu poti ten na wan sei fu kan tron wan mati fu a brada di yu wani yepi. Te yu e du dati, dan a gersi leki yu e taigi en: „Yu prenspari gi mi.” (Leisi Romesma 12:10.) Iya, a lobi-ati fasi fa yu e yepi den brada disi èn fa yu e poti prakseri na den, o meki taki den de nanga tangi trutru gi den sani di yu e du gi den.

20, 21. (a) O ten wan owruman abi bun bakapisi te a musu leri brada fa fu du moro? (b) San wi o luku na ini a tra artikel?

²⁰ Owruman, no frigiti: Efu yu wani abi bun bakapisi te yu e yepi brada fu du moro na ini a gemeente, dan yu no musu de wan sma nomo di lobi fu gi leri. Yu musu lobi den sma tu di yu e gi leri. (Luku sosrefi Yohanes 5:20.) Fu san ede disi de so prenspari? Efu wan brada e si taki yu e broko en ede nanga en trutru, dan nanga prisiri a o wani leri wan sani fu yu. Sobun, un lobi owruman, te unu e leri brada fa fu du moro, dan un no musu de leriman nomo, ma un musu de mati fu den tu.​—Odo 17:17; Yoh. 15:15.

²¹ Baka te wan owruman sreka na ati fu wan brada, a kan bigin leri en fa a musu du a wroko fu en na ini a gemeente. Fa na owruman kan du disi? Na ini a tra artikel wi o taki fu a tori disi.

1. (a) San futuboi fu Gado kon si langa ten kaba? (b) Fa wi e si a tori dati na ini a ten disi? (c) San wi o luku na ini na artikel disi?

LANGA TEN kaba den futuboi fu Gado kon si taki te wan sma leri fa fu du wan sani, dan dati e tyari bun bakapisi kon gi tra sma. Fu eksempre, wan leisi di sma teki Lot tyari gowe, a famiri-edeman Abram teki den „futuboi fu en di ben sabi feti” èn a go yepi Lot. Fu di den man disi ben leri fa fu feti, meki den ben man yepi Lot (Gen. 14:14-16). Na ini a ten fu Kownu David, yu ben abi sma di „ben kisi leri fu singi gi Yehovah” na ini na oso fu en èn den ben prèise en nanga den singi dati (1 Kron. 25:7). Na ini a ten disi, wi e feti nanga Satan èn nanga a grontapu fu en (Ef. 6:11-13). Boiti dati, wi e meki muiti tu fu prèise Yehovah (Hebr. 13:15, 16). Sobun, efu wi wani abi bun bakapisi wi musu kisi leri, neleki Gado en futuboi fu owruten. Yehovah gi owruman a frantwortu fu leri tra brada fa fu du moro na ini a gemeente (2 Tim. 2:2). San owruman di abi furu ondrofeni e du fu yepi tra brada fu teki moro frantwortu na ini a gemeente?

YEPI BRADA FU MEKI A LOBI DI DEN ABI GI YEHOVAH KON MORO TRANGA

2. San wan owruman kan du, fosi a leri wan brada fa fu teki frantwortu na ini a gemeente èn fu san ede?

² Wi kan si wan owruman leki wan gronman. Fosi wan gronman e sai siri, a musu poti mest nanga tra sani gi a doti fu meki den sani gro moro bun. Na so a de tu taki te wan owruman wani leri wan brada fa fu teki frantwortu na ini a gemeente, a ben o bun fu luku wan tu Bijbel rai nanga a brada fosi, so taki a o de srekasreka fu du den sani di a o leri.​—1 Tim. 4:6.

3. (a) Fa wan owruman kan gebroiki Markus 12:29, 30 te a e taki nanga wan brada di a e leri fu teki frantwortu? (b) Sortu krakti a begi fu wan owruman kan abi tapu so wan brada?

³ A bun te yu leki owruman sabi omeni krakti den tru leri fu Bijbel abi tapu a denki nanga den firi fu wan brada di yu e leri fu du moro na ini a gemeente. Kande yu kan aksi en fa a bosroiti di a teki fu gi en libi abra na Yehovah kenki en libi. Te yu aksi en disi, dan dati o gi unu na okasi fu taki fa wi leki Kresten kan dini Yehovah nanga wi heri ati. (Leisi Markus 12:29, 30.) Na a kaba fu so wan takimakandra, yu kan begi Yehovah meki a gi a brada a santa yeye di a o abi fanowdu te a o leri fu teki frantwortu. Te a brada e yere fa yu e begi gi en, dan dati kan gi en deki-ati fu du moro.

4. (a) Sortu Bijbel tori kan yepi wan brada fu go na fesi? (b) San owruman musu hori na prakseri te den e leri brada fa fu teki frantwortu na ini a gemeente?

⁴ Te yu e bigin leri wan brada fa fu teki frantwortu na ini a gemeente, dan yu kan luku wan tu Bijbel tori nanga en di kan yepi en fu si taki a musu de klariklari fu wroko, taki a musu de fu frutrow èn taki a musu abi sakafasi (1 Kow. 19:19-21; Neh. 7:2; 13:13; Tori 18:24-26). A de fanowdu taki wan brada abi den fasi disi, neleki fa doti abi mest fanowdu. Disi o yepi en fu go na fesi moro esi. Jean-Claude, wan owruman fu Fransikondre, e taki: „Te mi e yepi wan tra brada, dan a moro prenspari sani gi mi na fu yepi en fu gebroiki Bijbel rai fu teki koni bosroiti. Mi e suku okasi fu leisi wan tu Bijbeltekst nanga en fu ’opo en ai’ gi ’den tumusi moi sani di skrifi’ na ini Gado Wortu” (Ps. 119:18). San moro yu kan du fu yepi wan brada fu meki a lobi di a abi gi Yehovah kon moro tranga?

SORI EN SAN A KAN DU ÈN TAIGI EN FU SAN EDE DISI DE FANOWDU

5. (a) O prenspari a de fu taki nanga wan brada fu den sani di a wani du gi Yehovah? (b) Fu san ede owruman musu yepi brada te den yongu ete? (Luku san skrifi na a marki tapu bladzijde 11.)

⁵ Aksi wan brada san moro a wani du gi Yehovah. Efu a no sabi san a wani du, dan yepi en fu luku san a kan du na ini a gemeente èn fa a kan du dati. Fruteri en sortu spesrutu sani yu ben wani du gi Yehovah di yu ben yongu. Sori en san yepi yu fu ben man du disi èn fa dati gi yu prisiri. Kande a no sori wan kefalek sani te yu e taki nanga a brada na a fasi disi. Ma a takimakandra kan naki en ati so te taki a wani du moro. Victor, wan owruman di e pionier na Afrika, e fruteri: „Di mi ben yongu, wan owruman poti wan tu aksi gi mi fu sabi san moro mi ben wani du gi Yehovah. Den aksi dati yepi mi fu go denki seryusu fu a diniwroko fu mi.” Owruman di abi furu ondrofeni e sori tu o prenspari a de fu leri brada yonguyongu kaba san den musu du fu teki frantwortu. Wan fasi fa den owruman kan du disi na te den e gi yongu brada wan wroko di den o man du. Efu yu e yepi brada te den yongu ete, dan den no o frigiti san den wani du gi Yehovah, srefi te den kon bigi èn te furu sani de di kan puru den prakseri.​—Leisi Psalm 71:5, 17.a

6. San na wan prenspari fasi fa Yesus ben e gi leri?

⁶ Te yu wani yepi wan brada fu du moro na ini a gemeente, yu no musu fruteri en nomo san a musu du, ma yu musu taigi en tu fu san ede disi de fanowdu. Na so yu e teki na eksempre fu Yesus, wi moro bigi Leriman. Fosi a taigi den apostel fu en fu meki sma tron disipel, a fruteri den fu san ede den ben musu du dati. A taki: „Mi kisi ala makti na ini hemel èn na grontapu.” Baka dati a taigi den: „Fu dati ede, go na sma fu ala kondre èn meki den tron disipel” (Mat. 28:18, 19). Fa yu kan gi leri neleki Yesus?

7, 8. (a) Fa owruman na ini a ten disi kan gi leri neleki Yesus? (b) O prenspari a de fu prèise wan brada te yu e leri en fa fu du wan wroko na ini a gemeente? (c) Sortu rai kan yepi owruman te den e yepi tra brada? (Luku a faki di nen „Fa fu leri brada fu teki frantwortu na ini a gemeente”.)

⁷ Te yu e aksi wan brada fu du wan wroko na ini a gemeente, dan sori en na ini Bijbel fu san ede a wroko dati de prenspari. Na so yu e leri en fu du sani nanga yepi fu rai di komoto na ini Bijbel èn no fu di a musu du en nomonomo. Kande yu aksi wan brada fu sorgu taki a presi pe sma e waka kon na ini a Kownukondre zaal, krin èn taki sani no de na pasi di kan meki sma fadon. Yu kan luku Titus 2:10 nanga en èn sori en fa a wroko di a e du fu sorgu gi a zaal o „moi a leri fu Gado, wi Frulusuman”. Sori a brada tu taki a musu denki den owru brada nanga sisa na ini a gemeente èn fa a wroko di a e du o yepi den. Te yu e taki nanga a brada na a fasi disi, dan dati o yepi en fu si taki wi no e krin a zaal nomo fu di wi musu du dati, ma fu di a e tyari wini kon gi trawan. Te a e si fa brada nanga sisa e kisi wini fu den sani di a e du, dan dati o gi en furu prisiri.

⁸ Sorgu tu taki yu e prèise a brada gi a muiti di a e meki fu du a wroko leki fa yu ben leri en. O prenspari a de fu prèise en? Neleki fa watra e meki taki wan sani e gro, na so a brada o go na fesi te yu e prèise en.​—Luku Mateyus 3:17.

WAN SANI DI E MEKI EN MUILEK TU FU LERI BRADA FU TEKI FRANTWORTU

9. (a) Fu san ede a muilek son leisi gi owruman na ini gudu kondre fu yepi tra brada? (b) Fa a du kon taki son yongu brada no poti a tru anbegi na a fosi presi na ini den libi?

⁹ Son leisi a muilek gi owruman na ini den gudu kondre fu gi dopu brada di pasa 20 noso 30 yari kaba, deki-ati fu du moro na ini a gemeente. Owruman fu sowan 20 gudu kondre di abi furu ondrofeni fruteri fu san ede den denki taki son brada e frede fu teki frantwortu na ini a gemeente. Furu fu den taki dati di den brada disi ben yongu ete, den papa nanga mama no gi den deki-ati fu du moro na ini a diniwroko. Son leisi a ben de so srefi taki sonwan fu den yongu brada disi ben wani du moro, ma dan a papa nanga mama fu den gi den deki-ati fu teki hei skoroleri noso fu meki en na ini grontapu. Sobun, noiti den leri fu poti a tru anbegi na a fosi presi na ini den libi.​—Mat. 10:24.

10, 11. (a) Fa wan owruman kan yepi wan brada safrisafri efu a gersi leki a brada no e prakseri fu du moro na ini a gemeente? (b) Sortu Bijbeltekst wan owruman kan luku te a wani yepi so wan brada èn fu san ede? (Luku san skrifi na a marki na tapu a bladzijde disi.)

¹⁰ Efu a gersi leki wan brada no e prakseri fu du moro na ini a gemeente, dan a o teki furu muiti nanga pasensi fu kenki a denki fu en. Toku yu leki owruman kan yepi so wan brada. Son leisi gronman e poti wan tiki na wan yongu bon so taki safrisafri a bon kan gro bun. Na so yu kan yepi wan brada safrisafri fu si taki a musu kenki a denki fu en èn baka wan pisi ten a o wani du moro na ini a gemeente. Ma fa yu kan du dati?

¹¹ Teki yu ten fu tron wan mati fu a brada di yu wani yepi. Meki a sabi taki a de fanowdu na ini a gemeente. Yu musu abi a gwenti fu taki nanga en fu wan tu Bijbeltekst di kan yepi en fu denki fu san ede a gi ensrefi abra na Yehovah (Preik. 5:4; Yes. 6:8; Mat. 6:24, 33; Luk. 9:57-62; 1 Kor. 15:58; 2 Kor. 5:15; 13:5). Poti aksi gi en di kan naki en ati. Kande yu kan aksi en: ’San yu pramisi Yehovah di yu gi yusrefi abra na en? Fa yu denki Yehovah ben firi di yu dopu?’ (Odo 27:11) ’Ma fa Satan ben e firi?’ (1 Petr. 5:8) Den sortu tekst disi kan abi furu krakti tapu a brada.​—Leisi Hebrewsma 4:12.b

TAN DU YU WROKO NANGA YU HERI ATI

12, 13. (a) Fa Elisa ben e si a leri di a kisi fu Elia? (b) Fa Yehovah blesi Elisa?

¹² Yongu brada, a gemeente abi unu fanowdu! San o yepi yu fu man du yu wroko gi Yehovah moro bun? Fu sabi san na a piki tapu na aksi disi, meki wi go luku wan tu sani di pasa na ini a libi fu Elisa di ben e kisi leri tu.

¹³ Sowan 3000 yari pasa, a profeiti Elia aksi a yongu Elisa fu tron en yepiman. Wantewante Elisa kon èn nanga en heri ati a wroko gi a profeiti. A du wroko srefi di tra sma ben e si leki lagi wroko. (2 Kow. 3:11). Baka di Elisa kisi leri sowan siksi yari, a kon sabi taki a wroko di Elia ben e du na ini Israel, ben o kon na wan kaba. Ne Elia taigi en yepiman Elisa taki a ben kan gowe èn taki a no ben abi fu dini en moro. Ma dri leisi Elisa taigi Elia: „Mi no o gowe libi yu.” A ben wani tan nanga a leriman fu en solanga a ben man. Fu di Elisa sori taki a ben wani tan dini Elia nanga en heri ati, meki Yehovah blesi en. A meki Elisa si fa wan bigi winti opo Elia tyari gowe.​—2 Kow. 2:1-12.

14. (a) Fa yongu brada kan de leki Elisa? (b) Fu san ede a de so prenspari gi yongu brada fu du a wroko fu den nanga den heri ati?

¹⁴ Fa yu kan de leki Elisa? Te den owruman e aksi yu fu du wan wroko, dan du en wantewante, awinsi sma e si en leki wan lagi wroko. No frigiti taki na owruman di e gi yu leri na yu mati. Meki a sabi taki yu breiti nanga a muiti di a e meki fu yepi yu. Te yu e du disi, dan a gersi leki yu e taigi na owruman: „Mi no o gowe libi yu.” Ma a moro prenspari sani na taki yu musu tan du yu wroko nanga yu heri ati. Fu san ede? We, te den owruman si taki yu e du yu wroko nanga yu heri ati èn taki den kan frutrow yu, dan den o de seiker taki Yehovah wani taki yu kisi moro frantwortu na ini a gemeente.​—Ps. 101:6; leisi 2 Timoteyus 2:2.

LESPEKI DEN OWRUMAN

15, 16. (a) Fa Elisa sori lespeki gi Elia? (Luku a prenki na a bigin fu na artikel.) (b) San meki den tra profeiti ben e frutrow Elisa?

¹⁵ A tori fu Elisa e leri wi taki a de prenspari gi brada na ini a ten disi fu sori lespeki gi owruman di abi furu ondrofeni. Baka di Elia nanga Elisa go na wan grupu profeiti na Yerikow, den waka go na Yordan-liba. Drape „Elia teki a dyakti fu en, a domru en kon na wán, dan a naki na tapu a watra nanga a dyakti. Ne a watra bigin prati na tu.” Dan den pasa a liba na tapu drei gron. Baka dati den „waka go moro fara”, aladi den „ben e taki nanga makandra”. Elisa tan arki bun san Elia taigi en èn a tan leri fu en. A de krin taki Elisa no ben denki fu ensrefi taki a sabi ala sani kaba. Ne wan bigi winti opo Elia go na loktu èn Elisa drai go baka na Yordan-liba. A teki Elia en dyakti èn nanga dati a naki na tapu a watra. Dan a bari: „Pe Yehovah, a Gado fu Elia, de?” Ne a pasa baka taki a watra fu a liba prati na tu.​—2 Kow. 2:8-14.

¹⁶ Yu si taki a fosi wondru fu Elisa, ben de a srefi leki a lasti wondru fu Elia? San disi e leri wi? Elisa no ben e denki taki now di a ben de profeiti kaba, taki a ben musu du sani tra fasi leki Elia. Na presi fu dati, Elisa sori lespeki gi Elia èn a tan du en diniwroko na a srefi fasi fa Elia du en. Disi meki taki den tra profeiti ben kan frutrow en (2 Kow. 2:15). Ma baka di Elisa dini 60 yari leki profeiti, Yehovah meki a du moro wondru leki Elia. San den brada di e kisi yepi fu den owruman kan leri fu na eksempre fu Elisa?

17. (a) Fa brada na ini a ten disi kan teki na eksempre fu Elisa? (b) Fa Yehovah o man gebroiki yu bakaten?

¹⁷ Te yu kisi a grani kaba fu du moro na ini a gemeente, dan yu no musu denki taki yu musu kenki a fasi fa sani e du. A no fu di yu wani, meki sani musu kenki na ini a gemeente. Sani o kenki te a de fanowdu èn te Yehovah en organisâsi taki dati. Fu di Elisa tan du sani leki fa Elia ben gwenti du, meki a sori lespeki gi Elia èn den tra profeiti ben man frutrow en. Yu srefi kan teki na eksempre fu Elisa tu. Den owruman na ini yu gemeente e du sani soleki fa Bijbel e taki. Sobun, te yu e tan du sani leki fa den gwenti du, dan yu e sori lespeki gi den èn brada nanga sisa o frutrow yu. (Leisi 1 Korentesma 4:17.) Te yu kisi moro ondrofeni, dan yu o man yepi a gemeente fu gi yesi na den kenki di Yehovah en organisâsi e tyari kon. Disi o yepi a gemeente fu tan go na fesi. Neleki fa Yehovah yepi Elisa, na so a o yepi yu tu fu du moro bigi sani leki san den tra owruman ben leri yu.​—Yoh. 14:12.

18. Fu san ede a prenspari fu yepi brada nownow fu teki frantwortu na ini a gemeente?

¹⁸ Wi howpu taki den rai na ini na artikel disi èn na ini a wan na en fesi, o gi moro owruman deki-ati fu poti ten na wan sei fu yepi brada fu du moro na ini a gemeente. Wi howpu tu taki brada o breiti nanga a yepi disi èn taki den o du san den leri fu sorgu gi a gemeente. Na so a lobi di den brada nanga sisa na heri grontapu abi gi Yehovah, e kon moro tranga. Disi o yepi ibriwan fu wi tu fu tan gi yesi na Yehovah na ini a span ten di e kon.