Efu wi wani ferstan Bijbel profeititori, dan wi musu suku yepi. Luku na eksempre disi. Kow taki dati yu e go na wan presi di yu no sabi, ma wan mati di sabi a presi bun de nanga yu. A sabi precies pe unu de èn pe ibri pasi e go. A no de fu taki dati yu o breiti dati yu mati kon nanga yu. Yehovah de leki a mati dati. A sabi precies na ini sortu ten wi e libi èn san o sa na ini a ten di e kon. Sobun, efu wi wani ferstan Bijbel profeititori, dan wi musu abi sakafasi èn wi musu aksi Yehovah fu yepi wi (Dan. 2:28; 2 Petr. 1:19, 20). Ala bun papa nanga mama wani taki den pkin abi wan koloku libi. Yehovah wani dati tu gi den pkin fu en (Yer. 29:11). Ma tra fasi leki libisma, Yehovah man ferteri wi soifri san o psa na ini a ten di e kon. Yehovah meki sma skrifi profeititori na ini en Wortu so taki wi kan sabi na fesi sortu prenspari sani o psa.​—Yes. 46:10. w23.08 8 ¶3-4

Gado gi Yesus a makti fu lusu ala den problema fu libisma. Den wondru di Yesus du sori taki a man lusu ala den problema di wi srefi no ben o man lusu noiti. Fu eksempre, a abi a makti ferlusu wi fu a rutu fu ala den problema fu libisma èn dati na a sondu di wi kisi nanga ala den bakapisi fu en soleki siki nanga dede (Mat. 9:1-6; Rom. 5:12, 18, 19). Den wondru fu en sori taki a kan dresi „ibri sortu siki” èn taki a man wiki den dedewan srefi (Mat. 4:23; Yoh. 11:43, 44). A abi a makti tu fu meki bigi winti saka èn fu puru ogri yeye na sma tapu (Mark. 4:37-39; Luk. 8:2). A e gi wi dek’ati trutru fu sabi taki Yehovah gi en Manpkin a makti dati! Wi kan abi a fertrow taki Gado Kownukondre o tyari blesi kon na ini a ten di e kon. Den wondru di Yesus du di a ben de wan libisma na grontapu e leri wi san a o du na heri grontapu leki Kownu fu Gado Kownukondre na hemel. w23.04 3 ¶5-7

Efu yu de na ini wan bigi gemeente, dan a kan taki nofo tron yu no e kisi piki. Efu dati de so, dan kande yu no firi fu gi piki moro. Ma tan meki muiti fu gi piki. Sreka wan tu piki gi ibri konmakandra. Efu yu no kisi piki na a bigin fu a studie, dan yu abi na okasi ete fu gi piki. Te yu e sreka gi a Waktitoren-studie, dan luku fa ibri paragraaf abi fu du nanga a thema fu na artikel. Efu yu e du dati, dan kande yu o man gi bun piki. Boiti dati, yu kan sreka yusrefi fu piki na den paragraaf di e taki fu moro dipi Bijbel tori di no makelek so fu ferklari. Fu san ede? Fu di a kan de so taki furu sma no e opo den anu na den pisi dati. Ma fa a de efu yu pruberi ala den sani disi èn tòg yu no kisi piki na wan tu konmakandra kba? Go na a fesiman fosi a konmakandra bigin èn taigi en na sortuwan fu den aksi yu ben o wani gi piki. w23.04 21-22 ¶9-10