2 Wroko makandra

SAN A WANI TAKI

Te trowpaar e wroko makandra, dan den de leki wan piloot nanga wan co-piloot di e frei wan plane. Den ala tu abi na prakseri fu go na a srefi presi. Te problema kon den no e denki densrefi nomo, ma den e hori a bun fu a trawan na prakseri.

BIJBELTEKST: „Den no de tu skin moro, ma wán skin.”​—Mateyus 19:6.

„A trowlibi a no wan one men show. Masra nanga wefi musu wroko makandra fu meki sani waka bun.”​—Christopher.

FU SAN EDE A PRENSPARI

Te masra nanga wefi no e wroko nanga makandra, dan te problema kon den o suku fowtu na makandra na presi fu lusu a problema. Na so pikinpikin sani e tron bigi problema.

„Fu abi wan bun trowlibi, a prenspari fu wroko makandra. Efu mi nanga mi masra no ben du dati, dan wi ben o de leki tu sma di e libi ini a srefi oso nomo, na presi fu libi leki trowpaar. Wi no ben o man teki prenspari bosroiti makandra.”​—Alexandra.

SAN YU KAN DU

AKSI YUSREFI

• Mi e si a moni di mi e kisi leki fu „mi wawan nomo”?

• Mi e firi leki mi musu de sondro mi patna fu man relaks?

• Mi no lobi moksi nanga den famiri fu mi patna, aladi en nanga den e libi bun nanga makandra?

TAKI NANGA YU PATNA FU DEN SANI DISI

• Na sortu fasi wi e sori taki wi e wroko makandra na ini wi trowlibi?

• San wi kan du moro bun?

• San wi kan du fu tron wan moro bun team?

SAN YU KAN DU

• Yu kan si a trowlibi leki tu sma di e prei tennis-bal. Na presi taki yu nanga yu trowpatna e strei nanga makandra, unu de na ini a srefi team. Un no e suku fu wini makandra, ma un e suku fu wini den problema fu unu.

• Na presi fu denki, ’Fa mi kan wini?’ denki ’Fa wi kan wini?’

„No go prakseri suma abi leti noso suma fowtu. Dati no prenspari leki a freide nanga wánfasi di musu de ini a trowlibi.”​—Ethan.

BIJBELTEKST: „No poti prakseri na un eigi afersi nomo, ma poti prakseri na den afersi fu trawan tu.”​—Filipisma 2:3, 4.