6 Piri-ai

SAN A WANI TAKI

Piri-ai kan abi fu du nanga leri di yu e gi noso sani di yu e du fu poti wan pikin na pasi. Son leisi a kan wani taki, a taki di papa nanga mama e taki nanga den pikin te den du wan sani di no bun. Ma furu tron a abi fu du nanga den bun maniri nanga gwenti di yu e leri wan pikin so taki a kan teki bun bosroiti.

FU SAN EDE A PRENSPARI

Furu papa nanga mama no e piri-ai gi den pikin moro, fu di den e frede leki dati o meki a pikin firi leki a no warti. Ma papa nanga mama di koni e poti wet gi den pikin èn den e leri den fu hori densrefi na den wet disi.

„Pikin abi wet fanowdu di o yepi den fu tyari densrefi na wan bun fasi te den kon moro bigi. Efu wi no e poti den pikin fu wi na pasi, dan te fu kaba den o de leki wan boto di no e go na a bun sei èn di kan sungu srefi.”​—Pamela.

SAN YU KAN DU

Du san yu taki. Efu yu pikin no e hori ensrefi na den wet fu yu, dan strafu en. Ma no frigiti fu prèise en tu te a e du san yu taki.

„Mi lobi prèise den pikin fu mi te den e gi yesi, fu di furu sma no e gi yesi ini a ten disi. Dati e meki en moro makriki gi den fu teki a piri-ai di mi e gi den.”​—Christine.

BIJBELTEKST: „San wan sma e sai, na dati a sa koti tu.”​—Galasiasma 6:7.

Du sani na a yoisti fasi. Te yu e piri-ai gi yu pikin dan hori en na prakseri èn omeni yari a abi. A strafu di yu o gi a pikin musu abi fu du nanga a fowtu di a meki. Fu eksempre, efu a pikin no hori ensrefi na a fasi fa a musu gebroiki en telefon, dan yu kan bosroiti fu teki a telefon gi wan pisi ten. Ma no meki pikinpikin sani tron wan bigi problema.

„Mi e suku fu kon sabi efu na espresi a pikin du wan sani noso efu na wan fowtu a meki. Wan difrenti de na mindri wan takru gwenti di a abi fu kenki nanga wan fowtu di a meki fu di a no poti prakseri.”​—Wendell.

BIJBELTEKST: „No tanteri den pikin fu unu, so taki den no lasi-ati.”​—Kolosesma 3:21.

Sori lobi. Furu tron pikin e teki piri-ai te den si taki yu e du dati fu di yu lobi den.

„Te a boi fu wi ben du wan sani di no bun, dan wi ben e sori en taki wi breiti nanga ala den bun sani di a du na ini a ten di pasa. Wi ben e sori en tu taki a fowtu di a meki no abi fu meki a tan tyari pori nen, efu a wroko na ensrefi. Wi ben e taigi en tu taki wi o yepi en fu no meki a srefi fowtu baka.”​—Daniel.

BIJBELTEKST: „Lobi abi pasensi èn a abi switifasi.”​—1 Korentesma 13:4.