Leri fu moro owruwan

SAN A WANI TAKI?

Pikin abi bigisma fanowdu fu yepi den èn fu gi den rai. Leki papa nanga mama yu na a moro bun sma fu du dati, na yu frantwortu. Ma tra sma kan yepi yu pikin tu.

FU SAN EDE A PRENSPARI?

Na ini furu kondre, yonguwan no e moksi nanga bigisma. Fa so?

• Furu pikin e de heri dei na skoro èn furu bigisma no e de na den mindri.

• Te son yonguwan komoto na skoro, dan den no e miti den papa nanga mama, fu di den de na wroko.

• Wan ondrosuku fu Amerkankondre e sori taki pikin fu 8 te go miti 12 yari e luku TV, e prei Game noso e de tapu Internet moro leki siksi yuru ibri dei.a

A buku Hold On to Your Kids e taki: „Furu yonguwan ini a ten disi no e aksi rai moro na den papa nanga mama noso tra bigisma. Na presi fu dati den e go suku rai na tra yonguwan leki densrefi.”

FA YU KAN YEPI YU PIKIN

Meki ten gi yu pikin.

BIJBELTEKST: „Leri wan boi fu waka a yoisti pasi. Srefi te a kon owru, a no o komoto fu a pasi dati.”​—Odo 22:6.

Furu leisi a de so taki pikin wani taki den papa nanga mama yepi den. Sabiman e taki dati srefi te den e kon moro bigi, den e wani teki a rai fu den papa nanga mama na presi fu den mati fu den. Na ini a buku You and Your Adolescent, Datra Laurence Steinberg e taki: „Den papa nanga mama abi moro krakti tapu a fasi fa den pikin de èn fa den e tyari densrefi te den yongu ete èn te den e kon moro bigi.” A e taki moro fara: „Yonguwan wani sabi fa yu e denki èn den wani arki san yu abi fu taki, awinsi den no e agri ala ten nanga san yu e taki.”

Yu pikin wani taki yu gi en rai èn a e si yu leki wan voorbeeld. Sobun du ala san yu man fu yepi en. Meki ten gi en, sori en fa yu e denki, fa yu e firi, san prenspari gi yu èn san yu leri fu a libi.

Suku sma fu yepi yu pikin.

BIJBELTEKST: „Te wan sma e waka nanga koniwan, dan ensrefi o kon koni.”​—Odo 13:20.

Yu sabi wan bigisma san de wan bun voorbeeld èn di o man yepi yu pikin? Fu san ede yu no e seti sani so taki a de makandra nanga yu pikin? Yu no o skoifi yu frantwortu leki papa nanga mama gi a sma dati, ma wan bigisma di yu kan frutrow kan yepi yu nanga yu pikin. Bijbel e sori taki srefi di Timoteyus ben kon bigi, a ben kisi wini fu di a ben abi Paulus leki en mati èn Paulus srefi ben kisi wini fu dati.​—Filipisma 2:​20, 22.

Na ini a ten disi furu famiri no e libi ini a srefi oso noso a srefi birti, èn son leisi owpa nanga owma, omu, tante nanga tra famiri e libi ini tra kondre. Efu dati de so na ini yu famiri, dan yu kan suku okasi fu meki yu pikin pasa ten nanga moro owrusma di abi fasi di yu wani taki yu pikin abi.