WAN BRUYA GRONTAPU

1 | Meki muiti fu tan gosontu

FU SAN EDE A PRENSPARI?

Wan muilek situwâsi noso wan rampu kan abi krakti tapu a gosontu fu yu.

Problema e gi yu broko-ede èn te yu e broko yu ede tumusi langa, dan disi kan meki yu kon siki.
Siki nanga rampu kan meki taki ati-oso no man yepi sma bun fu di den musu yepi furu sikisma na a srefi ten èn kande den no abi nofo dresi.
Rampu kan meki sma lasi moni, dan den no man pai gi den moro prenspari sani di den abi fanowdu soleki gosontu nyanyan nanga dresi.

San yu musu sabi?

Seryusu siki nanga stress kan meki yu teki fowtu bosroiti na presi fu du sani di bun gi a gosontu fu yu. Na so fasi yu kan kon moro siki srefi.
Efu yu no e suku yepi te yu siki, dan a problema kan kon moro bigi èn yu kan lasi yu libi srefi.
Efu yu e tan gosontu, dan a o moro makelek gi yu fu teki bun bosroiti aladi sani bruya.
Awinsi yu pôti noso gudu, yu kan du sani fu tan gosontu.

San yu kan du now?

Wan koni sma e meki muiti so furu leki a man fu prakseri na fesi sortu takru sani kan pasa èn a e du san a man fu wai pasi gi den. Yu kan du a srefi sani nanga a gosontu fu yu. Nofo tron yu kan sorgu taki yu no kon siki so esi te yu e hori yusrefi nanga yu oso krin. Dringi dresi wakti siki.

„Fu di wi e hori wisrefi nanga wi oso krin, dan wi no abi fu pai so furu moni gi datra nanga dresi.”—Andreas.a

a Wi kenki wan tu nen na ini a tijdschrift disi.

FA FU KIBRI YUSREFI—Sani di kan yepi yu

Na ini bruya ten, yu kan du den sani disi fu tan gosontu

HORI YUSREFI NANGA YU OSO KRIN

Hori yusrefi nanga yu oso krin

Bijbel e taki: „A koniwan si taki ogri o miti en èn a go kibri” (Odo 22:3). Pruberi fu prakseri na fesi sortu sani no ben o bun gi a gosontu fu yu èn wai pasi gi den.

Wasi yu anu furu leisi nanga sopo èn nanga watra, spesrutu te yu o fasi nyanyan sani, noso te yu komoto na weisei.
Krin yu oso doronomo, spesrutu tafra nanga sani di sma e fasi furu nanga den anu.
Efu a kan, dan no go krosibei fu sma di abi wan siki di kan kisi trawan tu.

NYAN GOSONTU NYANYAN

Nyan gosontu nyanyan

Bijbel e taki: „Nowan man abi bita-ati gi en eigi skin. Na presi fu dati, a e gi en nyanyan èn a lobi en” (Efeisesma 5:29). Wi e sori taki wi lobi wi skin te wi luku bun san wi e nyan noso dringi, èn te wi no du sani di kan meki wi kon siki.

Dringi nofo watra.
Nyan difrenti sortu froktu nanga gruntu
No gebroiki tumusi furu oli noso fatu, sowtu, nanga sukru
No gebroiki tabaka nanga drugs, èn no dringi tumusi furu sopi.

„Efu wi no wani kon siki, dan wi musu pruberi fu nyan gosontu. Bika efu wi no du dati, dan wi o abi fu gebroiki a pikinso moni fu wi fu pai datra. Moro betre wi gebroiki wi moni fu bai gosontu nyanyan.”—Carlos.

OEFEN A SKIN ÈN ROSTU BUN

Oefen a skin

Bijbel e taki: „Pikinso rostu betre moro furu tranga wroko. A betre moro leki te wan sma ben o feti fu fanga a winti” (Preikiman 4:6). Wi musu wroko, ma wi musu rostu bun tu.

Tan oefen a skin. Yu kan pruberi fu bigin waka pikinso ibri dei. Te yu e meki a skin wroko, dan dati bun gi a gosontu srefi te yu moro owru noso malengri, noso te yu abi wan siki di no man dresi.
Rostu bun

Rostu bun. Efu yu no e sribi nofo, dan yu kan kisi moro stress èn yu no o man poti prakseri na sani. Efu yu no e sribi bun fu wan langa pisi ten, dan dati kan meki yu kisi seryusu problema nanga a gosontu fu yu.
Poti wan bun yuru gi yusrefi fu go sribi èn du soleki fa yu bosroiti. Pruberi fu go sribi èn fu wiki na a srefi yuru ibri dei.
No luku TV èn no gebroiki yu telefon te yu e didon na tapu yu bedi.
No nyan furu, no dringi kofi noso sopi fosi yu e go sribi

„Mi kon si taki sribi abi krakti tapu a gosontu fu mi. Te mi no sribi nofo, dan son leisi mi ede e hati mi èn mi skin swa. Ma te mi sribi nofo, dan mi e firi leki mi man du ala sani! Mi abi furu krakti èn mi no e siki so furu.”—Justin.