2 | Meki muiti fu no lasi den sani di yu abi fanowdu fu tan na libi
FU SAN EDE A PRENSPARI?
Gi furu sma a muilek srefisrefi fu feni den sani di den abi fanowdu ibri dei. Fu di a grontapu disi bruya meki a sani dati kan moro muilek gi den. Fu san ede?
Te problema de ini wan kontren dan sani soleki nyanyan nanga tanpresi e kon diri.
Te muilek situwâsi de ini wan kondre dan dati kan meki sma lasi den wroko noso kisi moro mendri moni.
Rampu kan broko noso pori den bisnis fu sma, den oso noso tra sani di den abi, èn dati kan meki sma kon pôti.
San yu musu sabi?
Te yu e gebroiki yu moni na wan koni fasi dan dati o yepi fu kibri yusrefi te problema opo kon.
Te wi abi furu moni dan dati no wani taki a o de so fu ala ten, fu di moni nanga tra gudu kan lasi den waarde.
Sani de di moni no man bai, sani soleki wan koloku libi nanga wánfasi ini wan osofamiri.
San yu kan du now?
Bijbel e taki: „Sobun, efu wi abi nyanyan, krosi nanga wan presi fu tan, dan wi musu breiti nanga den sani disi.”—1 Timoteyus 6:8.
Te wi de tevrede, dan wi e prisiri kaba nanga den sani di wi abi fanowdu, spesrutu te wi e no abi so furu moni moro.
Fu man de tevrede dan wi abi fu kenki a fasi fa wi e libi. Efu yu e gebroiki moro moni leki san yu e kisi dan noiti yu o abi nofo moni fu du den moro prenspari sani.