LES 10
Yesus ben gi yesi ala ten
Yu feni en makriki fu du san yu papa nanga mama e taki— Son leisi a muilek. Yu sabi taki noiti Yesus trangayesi Yehovah èn taki noiti a trangayesi en papa nanga mama?— Te yu luku san Yesus ben du, dan dati kan yepi yu fu gi yesi na yu papa nanga mama awinsi a muilek. Meki wi luku fa Yesus ben gi yesi.
Fosi Yesus ben de na grontapu, a ben de nanga en Papa Yehovah na ini hemel. Ma Yesus ben abi wan papa nanga wan mama na grontapu tu. Den ben nen Yosef nanga Maria. Yu sabi fa den tron en papa nanga mama?—
Yehovah du wan wondru. A meki Yesus gro na ini Maria en bere neleki fa tra beibi e gro na ini den mama bere. Baka sowan neigi mun Yesus gebore na grontapu. Na so Maria nanga en masra Yosef tron Yesus en papa nanga mama.
Di Yesus ben abi 12 yari nomo, a du wan sani di sori o furu a lobi en Papa Yehovah. A sani disi pasa di Yesus nanga en famiri ben waka bun fara go na Yerusalem fu anbegi Yehovah. Di den ben e drai go baka na oso, Yosef nanga Maria no ben man feni Yesus. Yu sabi pe a ben de?—
Fu san ede Yesus ben de na ini a tempel?
Yosef nanga Maria drai go esi-esi baka na Yerusalem èn den suku Yesus na ala sei. Den ben frede bika den no ben man feni en. Ma baka dri dei den feni en na ini a tempel! Yu sabi fu san ede Yesus ben de na ini a tempel?— A ben de drape fu di a ben wani leri sani fu en Papa Yehovah. A ben lobi Yehovah èn a ben wani sabi san a ben musu du fu meki Yehovah breiti. Yesus ben gi yesi na Yehovah ala ten, srefi di a tron wan bigi man. Yesus ben gi yesi srefi te a ben muilek gi en. A ben gi yesi tu awansi sma ben du ogri nanga en. Yesus ben gi yesi na Yosef nanga Maria tu?— Iya, na dati Bijbel e taki.
San yu kan leri fu Yesus?— Yu musu arki yu papa nanga mama, srefi te a muilek. Yu o du dati?—