Pisi 2: A fasi fa Kresten musu libi

Di yu studeri Bijbel yu kon sabi san Yehovah e aksi fu yu èn san yu musu du fu kan libi soleki fa a wani. A no de fu taki dati den sani di yu leri meki taki yu tyari wan tu kenki kon na ini a fasi fa yu e tyari yusrefi èn na ini a fasi fa yu e prakseri fu a libi. Now di yu teki a bosroiti fu libi soleki fa Yehovah e taki, dan yu kon tron wan sma di fiti fu preiki a bun nyunsu.

Den aksi di e kon now o yepi yu fu poti prakseri na den prenspari sani di Yehovah e aksi fu wi èn den o memre yu san na wan tu sani di yu kan du fu de wan futuboi fu en di a feni bun. Den tori disi o sori yu o prenspari a de fu du ala sani nanga wan krin konsensi èn fu gi Yehovah glori.​—2 Kor. 1:12; 1 Tim. 1:19; 1 Petr. 3:16, 21.

A no de fu taki dati now di yu de so fara nanga a studie fu yu, yu e angri fu saka yusrefi ondro a tiri fu Yehovah èn fu tron wan pisi fu en organisâsi. Den aksi nanga den Bijbeltekst di e kon now o yepi yu fu ondrosuku efu yu e frustan san a wani taki fu saka yusrefi ondro a fasi fa Yehovah seti sani na ini a Kresten gemeente èn na ini na osofamiri. Yu kon frustan tu san a wani taki fu saka yusrefi ondro den tiriman fu a grontapu disi. A no de fu taki dati yu o kisi moro warderi gi den sani di Yehovah seti fu gi en pipel leri èn fu tranga a bribi fu den. Wan fu den sani disi na den gemeente konmakandra. A bun fu go na den doronomo èn fu teki prati na den so furu leki yu man.

Boiti dati, a pisi disi o sori tu o prenspari a de fu teki prati doronomo na a Kownukondre preikiwroko pe wi e yepi trawan fu kon sabi Yehovah èn fu kon sabi san a e du gi libisma (Mat. 24:14; 28:19, 20). Leki lasti, a o yepi yu fu kon frustan moro bun o seryusu a de te yu gi yusrefi abra na Yehovah Gado èn te yu dopu. Yu kan de seiker taki Yehovah breiti taki yu sori nanga yu heri ati taki yu e warderi a bun-ati di a sori gi yu.

1. San Bijbel e taki fu a trowlibi? San na a wan-enkri sani di kan meki taki wan sma broko trow, soleki fa Bijbel e sori?

• „Unu no leisi taki a sma di meki den na a bigin, meki wan man nanga wan uma, èn taki a ben taki: ’Dati meki wan man o gowe libi en papa nanga en mama. A o tai hori na en wefi èn den tu sma dati o de wán skin’? Sobun, den no de tu skin moro, ma wán skin. Fu dati ede, san Gado tyari kon na wán nowan sma musu prati. . . . Efu wan man broko trow nanga en wefi, ma a wefi no du hurudu èn a man trow nanga wan tra uma, dan a du sutadu.”​—Mat. 19:4-6, 9.

2. Fu san ede sma di e libi nanga makandra leki man nanga uma, musu trow na lanti? Efu yu trow kaba, yu de seiker taki yu trow soleki fa lantiwet e taki?

• „Tan memre den fu saka densrefi na ondro gran lanti èn na ondro den wan di abi makti èn fu gi yesi na den.”​—Tit. 3:1.

• „Un alamala musu si a trowlibi leki wan lespeki sani. Un no musu doti a trowlibi fu unu, bika Gado o krutu huruman nanga sutaman.”​—Hebr. 13:4.

3. San na yu frantwortu na ini na osofamiri?

• „Mi manpikin, gi yesi na a leri di yu papa e gi yu èn no drai baka gi a wèt fu yu mama.”​—Odo 1:8.

• „Wan masra na a ede fu en wefi neleki fa Krestes na a ede fu a gemeente . . . Un masra, tan lobi un wefi, neleki fa Krestes lobi a gemeente.”​—Ef. 5:23, 25.

• „Un papa, no tanteri den pikin fu unu, ma tan kweki den nanga a leri èn nanga den rai fu Yehovah.”​—Ef. 6:4.

• „Un pikin, gi yesi na un papa nanga mama na ala fasi, bika disi e plisi Masra.”​—Kol. 3:20.

• „Un uma, saka unsrefi na ondro un eigi masra.”​—1 Petr. 3:1.

4. Fu san ede wi musu sori lespeki gi a libi?

• „[Gado] . . . e gi ala sma libi, a e meki den bro èn a e gi den ala sani. . . . Na en meki taki wi de na libi, taki wi e buweigi èn taki wi de.”​—Tori. 17:25, 28.

5. Fu san ede wi no musu kiri trawan, awinsi na wan beibi di no gebore ete?

• „Efu tu man e feti èn den e gi wan bere-uma mankeri, . . .èn . . . efu na uma noso a pikin dede, dan a man dati musu dede tu.”​—Eks. 21:22, 23.

• „Yu ai ben si mi di mi ben de na ini mi mama bere. Srefi di nowan pisi fu mi skin ben de ete, yu ben skrifi kaba na ini a buku fu yu taki ala den difrenti pisi fu mi skin ben o kon de.”​—Ps. 139:16.

• „Yehovah no lobi . . . sma di e kiri trawan di no du nowan ogri.”​—Odo 6:16, 17.

6. San a wet fu Gado e taki fu brudu?

• „Tan fara . . . fu brudu, [èn] fu meti di sma tyokro kiri.”​—Tori. 15:29.

7. Fu san ede wi musu lobi wi Kresten brada nanga sisa?

• „Mi e gi unu wan nyun komando, taki un musu lobi makandra. Neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra.”​—Yoh. 13:34, 35.

8. Kande wan sma abi wan siki di a kan gi tra sma èn di kan kiri den. (a) Fu san ede so wan sma no musu lon go brasa noso bosi trawan fu sori taki a lobi den? (b) Fu san ede a no musu mandi te son sma no wani kari en kon na den oso? (c) Kon meki wi taki dati wan sma ben de na ini wan situwâsi pe a ben kan kisi wan siki di a kan panya gi trawan. Fu san ede a musu si en leki wan frantwortu fu meki datra ondrosuku a brudu fu en, fosi a bigin hori nanga wan sma? (d) Fu san ede wan sma di abi wan siki di a kan panya gi trawan musu fruteri a fesiman fu den owruman fu a sani disi fosi a teki dopu?

• „Un no musu abi nowan paiman na nowan sma, boiti a lobi di unu musu sori gi makandra. . . . ’Un musu lobi tra sma leki fa unu lobi unsrefi.’ Efu unu abi lobi, dan unu no o du tra sma ogri.”​—Rom. 13:8-10.

• „No poti prakseri na un eigi afersi nomo, ma poti prakseri na den afersi fu trawan tu.”​—Fil. 2:4.

9. Fu san ede Yehovah wani taki wi e gi trawan pardon?

• „Tan frudrage makandra èn gi makandra pardon nanga un heri ati, srefi te wan sma feni taki wan trawan du wan hati sani nanga en. Soleki fa Yehovah e gi unu pardon nanga en heri ati, na so un musu gi trawan pardon tu.”​—Kol. 3:13.

10. San yu musu du efu wan brada taki ogri-ati lei fu yu, noso efu a bedrigi yu na ini wan monitori?

• „Efu yu brada du wan sondu teige yu, go sori en san na a sondu te yu nanga en wawan de. Efu a e arki yu, dan yu wini yu brada. Ma efu a no e arki yu, dan tyari ete wán noso tu sma nanga yu, so taki tu noso dri kotoigi kan taki efu wan tori tru noso efu a no tru. Efu a no e arki den, dan taki nanga a gemeente. Efu a no e arki a gemeente srefi, dan meki a de gi yu leki wan grontapusma èn leki wan sma di e teki belasting-moni gi lanti.”​—Mat. 18:15-17.

11. Fa Yehovah e si den sondu disi?

▪ Hurudu

▪ A gebroiki di sma e gebroiki popki fu anbegi gado

▪ Homo-sekslibi

▪ Fufuru

▪ Dòbel

▪ Drungu

• „No kori unsrefi. Sma di e huru, sma di e anbegi falsi gado, sma di e du sutadu, mansma di e poti densrefi fu tra mansma abi seks nanga den, mansma di e didon nanga tra mansma, fufuruman, gridiman, drunguman, sma di e kosi trawan, nanga sma di e puru sani na tra sma anu nanga tranga no o kisi a Kownukondre fu Gado.”​—1 Kor. 6:9, 10.

12. Na sortu Bijbel rai yu o hori yusrefi te a abi fu nanga hurudu nanga ala tra sortu fasi fa sma abi seks dorosei fu a trowlibi?

• „Lowe gi hurudu.”​—1 Kor. 6:18.

13. Son wiwiri noso sani di sma e gebroiki leki dresi, kan meki taki den no man denki krin moro èn den kan tron srafu fu den srefi. Fu san ede wi no musu gebroiki den sani disi efu datra no gi wi en leki dresi?

• „Gi un skin na Gado leki wan srakti-ofrandi di e libi, di de santa èn di Gado feni bun. Na so fasi unu o gebroiki un frustan te unu e du santa wroko. No libi moro leki den sma fu a grontapu disi, ma kenki un denki, so taki unu kan kenki un libi. Dan unu o sabi san na a wani fu Gado di bun, di e gi en prisiri, èn di no e mankeri noti.”​—Rom. 12:1, 2.

14. San na wan tu fasi fu afkodrei di Gado e krutu?

• „Nowan lukuman noso bonuman musu de na un mindri, nowan sma di e suku marki fu sabi san o pasa, nowan towfruman, nowan wisiman, nowan sma di e go suku rai na wan sma di e taki nanga yeye, nowan sma di abi a wroko fu taki sani na fesi, èn nowan sma di e go suku rai na den dedewan.”​—Deut. 18:10, 11.

15. Efu wan sma du wan seryusu sondu èn a wani tron wan mati fu Yehovah baka, dan san a musu du wantewante?

• „Mi fruteri yu sortu sondu mi du èn mi no kibri den fowtu fu mi gi yu moro. Mi taki: ’Mi o fruteri Yehovah den ogri di mi du.’”​—Ps. 32:5.

• „Efu wan fu unu siki, meki a kari den owruman fu a gemeente kon na en. Meki den begi gi en èn salfu en nanga oli na ini a nen fu Yehovah. Te den e begi nanga bribi, dan a sma di siki o kon betre èn Yehovah o meki a kisi ensrefi baka. Boiti dati, efu a du sondu, dan a o kisi pardon fu dati.”​—Yak. 5:14, 15.

16. San yu musu du efu yu kon sabi taki wan tra Kresten du wan seryusu sondu?

• „Kon meki wi taki dati wan sma si, yere, noso sabi taki wan trawan du wan sondu. Efu a tori disi kon na fesi krutu èn den aksi suma sabi wan sani, ma a sma disi no go fruteri san a sabi, dan a sondu tu. Na ensrefi o tyari a frantwortu fu en sondu.”​—Lef. 5:1.

17. Efu den brada meki bekènti taki wan sma no de wan Yehovah Kotoigi moro, dan fa wi musu handri nanga a sma dati?

• „Un no musu bumui nanga wan sma di e kari ensrefi wan brada, aladi a de wan huruman, noso wan gridiman, noso wan sma di e anbegi falsi gado, noso wan sma di e kosi trawan, noso wan drunguman, noso wan sma di e puru sani na tra sma anu nanga tranga. Un no musu nyan srefi nanga so wan sma.”​—1 Kor. 5:11.

• „Efu wan sma e kon na unu èn a no e kon nanga a leri disi, dan noiti un musu teki en na ini un oso. Un no musu taki en odi tu.”​—2 Yoh. 10.

18. Fu san ede den bun mati fu yu musu de sma di lobi Yehovah?

• „Te wan sma e waka nanga koniwan, dan ensrefi o kon koni, ma te wan sma e waka nanga don sma, dan sani no o waka bun gi en.”​—Odo 13:20.

• „No meki sma kori unu. Takru kompe e pori bun gwenti.”​—1 Kor. 15:33.

19. Fu san ede Yehovah Kotoigi no e teki sei na ini politiek afersi?

• „Den no de wan pisi fu grontapu, neleki fa mi [Yesus] no de wan pisi fu grontapu.”​—Yoh. 17:16.

20. Fu san ede yu musu gi yesi na lanti?

• „Ibri sma musu saka ensrefi na ondro den tiriman, bika nowan tiriman kan de efu Gado no gi en na okasi. Na Gado gi den na okasi fu tiri na difrenti fasi.”​—Rom. 13:1.

21. San yu o du efu lanti wani tapu yu fu du san Gado wani?

• „Fu di Gado na wi tiriman, meki wi musu gi yesi na en moro leki na libisma.”​—Tori. 5:29.

22. Wan Kresten no musu de wan pisi fu grontapu. Sortu Bijbeltekst kan yepi yu fu du disi te yu o bosroiti sortu grontapuwroko yu o teki?

• „Nowan pipel o teki feti-owru fu go feti nanga wan tra pipel èn den no o leri fu feti moro.”​—Mika 4:3.

• „Komoto drape [na ini Babilon a Bigiwan], mi pipel, efu unu no wani abi prati nanga en na den sondu fu en èn efu unu no wani taki den rampu fu en kon na un tapu tu.”​—Openb. 18:4.

23. Sortu sani yu o luku, arki noso du fu meki prisiri èn gi sortuwan yu o wai pasi?

• „Efu wan sma lobi ogridu, dan Gado no lobi en kwetikweti.”​—Ps. 11:5.

• „Tegu gi ogri, ma tan du bun.”​—Rom. 12:9.

• „Tan prakseri ala sani di tru, ala sani di seryusu, ala sani di reti, ala sani di krin, ala sani di e meki sma sori lobi, ala sani di sma e taki bun fu den, ala sani di bun nanga ala sani di warti fu sma prèise den.”​—Fil. 4:8.

24. Fu san ede Yehovah Kotoigi no e anbegi Gado makandra nanga sma fu tra kerki?

„Unu no kan nyan na ’a tafra fu Yehovah’ èn na a tafra fu ogri yeye.”​—1 Kor. 10:21.

• „’Komoto na den mindri èn prati nanga den’, na so Yehovah taki. ’No fasi den sani moro di no krin’, ’èn mi o teki unu.’”​—2 Kor. 6:17.

25. Sortu gronprakseri kan yepi yu fu bosroiti efu yu o go na wan fesa?

• „Den go moksi nanga den trakondre sma èn den bigin teki den gwenti fu den. Den ben e dini den falsi gado fu den trakondre sma. Den gado disi ben kon de wan trapu gi den.”​—Ps. 106:35, 36.

• „Den dedewan no sabi notinoti.”​—Preik. 9:5.

• „Den no de wan pisi fu grontapu, neleki fa mi no de wan pisi fu grontapu.”​—Yoh. 17:16.

• „Na ini a ten di pasa, unu libi langa nofo leki fa grontapusma wani. Unu ben e du ogri sondro fu syen, unu ben abi tranga lostu, unu ben e dringi win pasa marki, unu ben e hori bradyari fesa, unu ben e strei dringi sopi èn unu ben e anbegi kruktugado, aladi Gado no feni dati bun kwetikweti.”​—1 Petr. 4:3.

26. Sortu eksempre fu friyari-dei skrifi na ini Bijbel? San wi kan leri fu den eksempre disi?

• „A di fu dri dei ben de a friyari-dei fu Kownu. Ne a hori wan fesa gi ala den futuboi fu en. Dan a puru na edeman fu den bakriman nanga na edeman fu den sma di ben e kanti win gi en, na strafu-oso èn a meki den kon tanapu na fesi den tra futuboi fu en. Ne a gi na edeman fu den sma di ben e kanti win gi en, en wroko baka. . . . Ma a anga na edeman fu den bakriman na wan postu.”​—Gen. 40:20-22.

• „Di Herodes hori en friyari-oso, dan na umapikin fu Herodias kon dansi na a fesa. Disi ben plisi Herodes so te, taki a sweri srefi fu gi na umapikin ala san a ben o aksi. Na umapikin taki: ’Gi mi na ede fu Yohanes a Dopuman na tapu wan plata preti.’ A ben taki disi fu di en mama ben taigi en fu du dati. A ben seni wan sma go koti Yohanes ede puru na ini a strafu-oso.”​—Mat. 14:6-8, 10.

27. Fu san ede yu wani gi yesi na den owruman?

• „Gi yesi na den wan di e teki fesi na un mindri èn saka unsrefi na den ondro, bika na den e luku unu leki sma di o abi fu gi Gado frantwortu fu san den e du. Dan den o sorgu unu nanga prisiri èn no nanga geme, bika disi no ben o bun gi unu.”​—Hebr. 13:17.

28. Fu san ede a prenspari taki yu nanga yu osofamiri e poti ten na wan sei doronomo fu leisi èn studeri Bijbel?

• „A lobi a wet fu Yehovah. Dei nanga neti a e leisi a wet fu Gado nanga wan safri sten. So wan sma o kon de leki wan bon di prani na sei watra, Di e gi froktu te a ten fu en doro Èn di den wiwiri fu en no e kon drei. Ala sani di a man e du, o waka bun.”​—Ps. 1:2, 3.

29. Fu san ede yu lobi fu de na den konmakandra èn teki prati na den?

• „Mi o meki a nen fu yu bekènti na den brada fu mi. Na mindri den sma di kon makandra mi o prèise yu.”​—Ps. 22:22.

• „Meki wi poti prakseri na makandra tu, so taki wi kan gi makandra deki-ati fu abi lobi èn fu du bun wroko. Meki wi no misi konmakandra, soleki fa son sma gwenti du, ma gi makandra deki-ati o moro unu e si a dei e kon krosibei.”​—Hebr. 10:24, 25.

30. San na a moro prenspari wroko di Yesus gi wi fu du?

• „Fu dati ede, go na sma fu ala kondre èn meki den tron disipel. Dopu den . . . , leri den fu du ala san mi taigi unu fu du.”​—Mat. 28:19, 20.

31. Wi e gi bijdrage fu horibaka gi a Kownukondre wroko èn wi e yepi wi brada nanga sisa. Nanga sortu denki wi musu du dati fu man plisi Yehovah?

• „Gi Yehovah grani nanga den gudu di yu abi.”​—Odo 3:9.

• „Meki ibri sma gi soleki fa a bosroiti na ini en ati. A no musu du dati nanga krutukrutu noso fu di sma dwengi en, bika Gado lobi a sma di e gi sani nanga prisiri.”​—2 Kor. 9:7.

32. Sortu tesi Kresten kan kisi?

• „Koloku fu den sma di kisi frufolgu fu di den e du san reti, bika a Kownukondre fu hemel na fu den. Koloku fu unu te sma e gi unu porinen èn te den e frufolgu unu aladi den e lei èn e taki ala sortu ogri fu unu, fu di unu na mi bakaman. Un musu breiti èn prisiri pasa marki, fu di unu o kisi wan bigi pai na hemel. Bika na so sma ben frufolgu den profeiti di ben de fosi unu.”​—Mat. 5:10-12.

33. Fu san ede a de wan bigi grani fu teki dopu leki wan Yehovah Kotoigi?

• „Di mi feni den wortu fu yu, mi nyan den. Dan mi ati bigin prisiri. Iya, mi e prisiri srefisrefi, bika mi e tyari a nen fu yu, Yehovah.”​—Yer. 15:16.