1-3. Sortu sani sma e aksi densrefi te wan sma dede? San den kerki e taki fu a tori disi?

BIJBEL e pramisi wi taki wan dei „dede no o de moro” (Openbaring 21:4). Na ini kapitel 5 wi leri taki a lusu-paiman meki taki wi o man kisi têgo libi. Ma toku sma e dede ete (Preikiman 9:5). Sobun, wan fu den prenspari sani di wi wani kon sabi na: ’San e pasa nanga wi te wi dede?’

² Wi e angri fu kisi piki tapu na aksi disi spesrutu te wan sma di wi lobi dede. Kande wi e aksi wisrefi: ’Pe a sma fu mi go? A man si mi? A man yepi mi? Mi o si en baka wan dei?’

³ Den kerki e leri sma difrenti sani fu a tori disi. Son kerki e leri taki efu yu na wan bun sma yu o go na hemel. Ma efu yu na wan ogri sma yu o bron na ini hel. Trawan e taki dati te yu dede yu e tron wan yeye èn yu e go libi nanga den tra famiri fu yu di dede kaba. Tra kerki e taki dati te yu dede, yu e kisi krutu èn baka dati yu e gebore baka. Den e bribi taki yu e gebore leki wan tra sma, noso leki wan meti srefi.

4. San den kerki e leri sma fu den dedewan?

⁴ Kande a gersi leki den kerki e leri difrenti sani fu a tori disi. Ma te yu luku en bun, dan den alamala e leri a srefi sani. Den e leri taki te wan sma dede, dan wan sani fu en e libi go doro. A sani disi tru?

SAN E PASA NANGA WI TE WI DEDE?

5, 6. San e pasa nanga wi te wi dede?

⁵ Yehovah sabi san e pasa nanga wi te wi dede. A taigi wi taki te wan sma dede, a no e libi go doro. Sobun a no abi firi moro èn a no e memre noti moro.a Te wi dede, wi no man si, wi no man yere, èn wi no man prakseri noti moro.

⁶ Kownu Salomo ben skrifi taki „den dedewan no sabi notinoti”. Dedesma no man lobi sma èn den no man teige sma tu. ’Na ini Grebi sma no e wroko, den no e prakseri, den no sabi sani èn den no abi koni.’ (Leisi Preikiman 9:5, 6, 10.) Na Psalm 146:4, Bijbel e taki dati te wan sma dede „den prakseri fu en” e lasi gowe.

SAN YESUS BEN TAKI FU SMA DI DEDE?

7. San Yesus ben taki fu sma di dede?

⁷ Di Lasarus, wan bun mati fu Yesus ben dede, dan Yesus taigi den disipel fu en: „Wi mati Lasarus e sribi.” Ma Yesus no ben wani taki dati Lasarus ben e rostu. Dati meki a taki moro fara: „Lasarus dede” (Yohanes 11:11-14). Sobun, Yesus ben e si dede leki wan sribi. A no ben taki dati Lasarus go na hemel noso taki a ben de nanga den famiri fu en di dede kaba. A no taki tu dati Lasarus ben e pina na ini hel noso taki a ben gebore leki wan tra sma noso leki wan meti. Nôno, a ben de leki Lasarus de na ini wan dipi sribi. Na wan tra presi ini Bijbel, Yesus e agersi dede nanga sribi tu. Di a meisje fu Yairus ben dede, dan Yesus ben taki dati „a no dede, ma a e sribi”.​—Lukas 8:52.

8. Fa wi du sabi taki Gado no ben meki libisma fu dede?

⁸ Di Gado meki Adam nanga Eva, a ben wani taki den dede te fu kaba? Nôno! Yehovah ben wani taki den prisiri fu têgo fu a libi sondro fu kon siki. Gado meki libisma nanga a firi fu libi fu têgo (Preikiman 3:11). Nowan papa noso mama wani taki en pikin kon siki èn dede. Yehovah no wani dati tu. Ma efu Gado meki wi fu libi fu têgo, dan fu san ede wi e dede?

FU SAN EDE WI E DEDE?

9. Fu san ede a no ben muilek gi Adam nanga Eva fu gi yesi na a wet fu Yehovah?

⁹ Na ini a dyari fu Eden, Yehovah taigi Adam: „Fu ibri bon na ini a dyari yu kan nyan teleki yu bere furu. Ma fu a bon di nen ’Sabi san bun èn san ogri’, yu no musu nyan, bika na a dei di yu o nyan fu en, na dede yu o dede” (Genesis 2:9, 16, 17). A no ben muilek fu gi yesi na Yehovah, fu di a ben sori den krin san den no ben musu du. Yehovah ben abi a reti tu fu taigi Adam nanga Eva san bun èn san ogri. Te den ben gi yesi na Yehovah, dan den ben o sori taki den e lespeki en leki Tiriman. Den ben o sori tu taki den de nanga tangi gi ala san Yehovah ben gi den.

10, 11. (a) Fa Satan meki taki Adam nanga Eva trangayesi Gado? (b) Fu san ede Adam nanga Eva no ben kan kisi pardon gi san den du?

¹⁰ A sari taki Adam nanga Eva bosroiti fu trangayesi Yehovah. Satan taigi Eva: „A de so trutru taki Gado taki dati un no musu nyan fu ala den bon na ini a dyari?” Eva piki en: „Wi kan nyan den froktu fu den bon na ini a dyari. Ma fu den froktu fu a bon di de na mindrisei fu a dyari, Gado taki: ’Un no musu nyan den, nôno, un no musu fasi a bon srefi, noso unu o dede.’”​—Genesis 3:1-3.

¹¹ Ne Satan taki: „Unu no o dede kwetikweti, bika Gado sabi taki na a dei di unu o nyan den froktu, un ai o opo èn unu o de leki Gado. Unu o sabi san bun èn san ogri” (Genesis 3:4-6). Satan ben wani meki Eva bribi taki ensrefi ben kan bosroiti san bun èn san ogri. Boiti dati a lei gi en taki a no ben o dede efu a ben trangayesi Yehovah. Dati meki Eva nyan fu a froktu èn a gi en masra meki a nyan tu. Adam nanga Eva ben sabi taki Yehovah ben taigi den taki den no ben musu nyan fu a froktu. Di den nyan a froktu, dan fu espresi den trangayesi Yehovah di ben sori den krin san den no ben musu du. Den ben sori taki den no abi lespeki gi den Tata na hemel di ben lobi den. Den no ben kan kisi pardon gi a sani di den du!

12. Fu san ede a de wan sari sani taki Adam nanga Eva trangayesi Yehovah?

¹² A de wan sari sani taki den fosi bigisma fu wi no ben abi nowan lespeki gi a Mekiman fu den. Fa yu ben o firi efu yu du tranga muiti fu kweki wan boi nanga wan meisje, dan bakaten den e du san den wani, na presi fu du san yu taigi den? A sani dati no ben o hati yu?

13. Fu san ede Yehovah taigi Adam taki a ben o tron doti baka?

¹³ Di Adam nanga Eva trangayesi Gado, dan den no ben man libi fu têgo moro. Dati meki Yehovah taigi Adam: „Na fu doti yu meki èn na doti yu o tron baka.” (Leisi Genesis 3:19.) Sobun, Adam ben o kon tron doti baka. A ben o de leki Gado noiti no ben meki en (Genesis 2:7). Baka di Adam sondu, a dede èn noti fu en ben de moro.

14. Fu san ede wi e dede?

¹⁴ Efu Adam nanga Eva ben arki Gado, den ben o de na libi te now ete. Ma di den trangayesi Gado, den tron sondusma èn den dede te fu kaba. Sondu de leki wan takru siki di wi kisi fu Adam nanga Eva. Wi alamala gebore nanga sondu èn dati meki wi e dede (Romesma 5:12). Ma a no dati Gado ben wani gi libisma. Noiti Gado ben wani taki libisma ben musu dede. Dati meki Bijbel e kari dede wan „feanti”.​—1 Korentesma 15:26.

WI E KON FRI TE WI SABI SAN E PASA TE WAN SMA DEDE

15. Fa wi e kon fri te wi sabi san e pasa nanga den dedewan?

¹⁵ Te wi kon sabi san e pasa te wan sma dede, dan wi no o bribi ala sortu sani moro. Bijbel e leri wi taki dedesma no e firi pen èn de no e sari tu. Wi no man taki nanga den èn den no man taki nanga wi. Wi no man yepi dedesma èn den no man yepi wi. Den no man du nowan ogri nanga wi, fu dati ede wi no abi fu frede den. Toku furu kerki e leri taki den dedesma e libi go doro na wan tra presi, èn taki wi kan yepi den te wi e pai priester noso tra kerki fesiman fu begi gi den. Te wi kon sabi san Bijbel e leri fu den dedewan, dan wi no o bribi den sortu lei dati.

16. Sortu lei furu kerki e leri sma?

¹⁶ Satan e gebroiki falsi kerki fu fruteri lei. Den e meki sma bribi taki sma di dede e libi go doro. Fu eksempre, son kerki e leri taki te wi dede, wan sani fu wi e libi go doro na wan tra presi. Na dati a kerki fu yu leri yu, noso a e leri yu san Bijbel e taki fu sma di dede? Satan e kori sma so taki den no wani kon sabi Yehovah.

17. Fu san ede Yehovah e kisi porinen te sma e taki dati dedesma e bron na ini hel?

¹⁷ Yu o skreki fu sabi san furu kerki e leri. Sonwan e leri taki ogrisma o bron fu têgo na ini hel. A lei disi e gi Yehovah porinen. Noiti a ben o meki sma pina na a fasi dati! (Leisi 1 Yohanes 4:8.) Fa yu ben o feni en efu wan sma e bron den anu fu en pikin na ini faya, soso fu di a wani strafu en? Yu ben o si en leki wan ogri-ati sma. Yu no ben o wani tron mati fu so wan sma. Na so Satan wani taki wi denki fu Yehovah.

18. Fu san ede wi no musu frede dedesma?

¹⁸ Son kerki e leri taki sma di dede e tron yeye. Den sortu kerki disi e leri taki wi musu lespeki noso frede sma di dede, fu di den kan tron makti yeye di kan du bun gi wi noso di kan du ogri nanga wi. Furu sma e bribi den lei disi. Den e frede dedesma èn dati meki den e anbegi den dedewan na presi fu anbegi Yehovah. No frigiti taki sma di dede no sabi notinoti. Sobun wi no abi fu frede den. Yehovah na a sma di meki ala sani. En na a tru Gado èn wi musu anbegi en wawan.​—Openbaring 4:11.

19. Te wi kon sabi san Bijbel e leri fu den dedewan, dan fa dati e yepi wi?

¹⁹ Te wi kon sabi san Bijbel e leri fu den dedewan, dan wi no o bribi den lei di kerki e leri sma. A sani disi e yepi wi fu frustan den moi sani di Yehovah pramisi wi gi a ten di e kon.

20. San wi o leri na ini a tra kapitel?

²⁰ Langa ten pasa, wan futuboi fu Gado di nen Yob, ben aksi: „Efu wan libisma dede, a kan kon na libi baka?” (Yob 14:14) Yu denki taki wan sma di dede man kon na libi baka? Yu o breiti fu sabi san Gado e taigi wi na ini Bijbel. Na ini a tra kapitel wi o taki fu a tori disi.

1-3. San o pasa nanga wi alamala èn fa Yehovah o frulusu wi?

KON meki wi taki dati yu musu koti strafu yu heri libi langa gi wan ogri di yu no du. A gersi leki noiti yu o komoto na strafu. Yu lasi ala howpu fu di yu no man du noti fu yepi yusrefi. Ma wan dei, yu e yere taki wan sma abi a makti fu meki yu kon fri èn a pramisi taki a o yepi yu. Fa yu ben o firi?

² Awinsi san wi o du, wi alamala o dede wan dei. Ma Yehovah abi a makti fu frulusu wi fu dede. A pramisi taki „dede na a lasti feanti di a o puru na pasi”.​—1 Korentesma 15:26.

³ Prakseri fa yu o firi te a ten doro taki yu no abi fu frede moro taki yu o dede! Ma a no dede wawan Yehovah o puru. A o meki den sma di dede kon na libi baka. Prakseri fa yu o prisiri te dati pasa! Gado e pramisi taki den ’dedewan fu wi o libi’ baka (Yesaya 26:19). Disi na san Bijbel e kari na opobaka.

TE WAN SMA DI WI LOBI DEDE

4. (a) San kan trowstu wi te wan famiri noso wan mati fu wi dede? (b) Suma ben de bun mati fu Yesus?

⁴ Te wan famiri noso wan bun mati fu wi dede, dan wi e sari so te taki wi no sabi san wi musu du. Wi e firi brokosaka. Wi no man du noti fu tyari a sma dati kon na libi baka. Ma Bijbel e trowstu wi. (Leisi 2 Korentesma 1:3, 4.) Meki wi go luku wan tori di e sori taki Yehovah nanga Yesus e angri fu gi libi baka na den lobiwan fu wi di dede. Di Yesus ben de na grontapu, a ben lobi go luku Lasarus nanga den sisa fu en, Marta nanga Maria. Den ala dri ben de bun mati fu Yesus. Bijbel e taki: „Yesus ben lobi Marta, en sisa, nanga Lasarus.” Ne wan dei Lasarus kon dede.​—Yohanes 11:3-5.

5, 6. (a) San Yesus du di a si taki den famiri nanga den mati fu Lasarus ben e sari? (b) Fu san ede a e gi wi trowstu fu sabi fa Yesus ben e firi te wan sma dede?

⁵ Yesus go fu trowstu Marta nanga Maria. Di Marta yere taki Yesus e kon, dan a go miti en dorosei fu a foto. A ben breiti fu si Yesus, ma a taigi en: „Efu yu ben de dya, mi brada no ben o dede.” Marta ben denki taki Yesus ben kon tumusi lati. Baka dati Yesus si taki en sisa, Maria ben e krei. Di a si fa den e sari, dan a ben hati en so te taki a bigin krei (Yohanes 11:21, 33, 35). Yesus ben firi fa a hati fu lasi wan lobiwan na ini dede.

⁶ Wi e kisi trowstu fu di wi sabi taki neleki wi, Yesus e sari tu te sma dede. Disi e leri wi taki dede na wan sani di Yesus nanga en Papa Yehovah no lobi kwetikweti (Yohanes 14:9). Yehovah abi a makti fu puru dede fu têgo èn na dati a o du na ini a ten di e kon.

„LASARUS, KON NA DORO!”

7, 8. Fu san ede Marta no ben wani taki den puru a ston fu a grebi fu Lasarus, ma san Yesus du?

⁷ Di Yesus doro na a grebi pe den ben poti a dedeskin fu Lasarus, dan den ben tapu a grebi kaba nanga wan bigi ston. Ne Yesus taki: „Un puru a ston.” Ma Marta no ben wani den du dati, fu di Lasarus ben dede fo dei kaba (Yohanes 11:39). Marta no ben sabi taki Yesus ben o yepi en brada.

⁸ Yesus taki: „Lasarus, kon na doro!” Marta nanga Maria no ben man bribi san den si baka dati. „A man di ben dede, kon na doro. En futu nanga anu ben domru nanga duku” (Yohanes 11:43, 44). Lasarus ben kon na libi baka! A ben de baka nanga den famiri nanga den mati fu en. Den ben man fasi en, den ben man brasa en, èn den ben man taki nanga en. Dati ben de wan bigi wondru! Yesus ben gi Lasarus wan opobaka.

„MEISJE, MI E TAIGI YU: OPO!”

9, 10. (a) Suma ben gi Yesus a krakti fu gi sma wan opobaka? (b) Fu san ede den tori fu den sma di kisi wan opobaka prenspari gi wi?

⁹ Yesus ben e gi sma wan opobaka nanga en eigi krakti? Nôno. Fosi Yesus gi Lasarus wan opobaka, a begi Yehovah èn Yehovah gi en a krakti fu wiki Lasarus. (Leisi Yohanes 11:41, 42.) Lasarus a no a wan-enkri sma di kisi wan opobaka. Bijbel e taki fu wan meisje fu 12 yari di ben siki. Yairus, a papa fu en, no ben sabi san a ben musu du, ne a begi Yesus fu meki a meisje fu en kon betre. A ben de en wan-enkri pikin. Di a ben e taki nanga Yesus, dan wan tu man kon èn den taki: „Yu umapikin dede! No trobi a leriman moro.” Ma Yesus taigi Yairus: „No frede, na bribi yu musu bribi nomo, dan yu umapikin sa feni yepi.” Baka dati, a go nanga Yairus na en oso. Di den doro krosibei fu na oso, Yesus ben man si èn yere fa sma ben e krei. Ne Yesus taigi den: „Un no musu krei moro, bika a no dede, ma a e sribi.” Yairus nanga en frow ben musu fu aksi densrefi fu san ede Yesus ben taki dati. Yesus aksi ala sma fu go na dorosei èn a tyari Yairus nanga en frow go na ini a kamra pe a meisje ben didon. Yesus hori a meisje en anu, ne a taki: „Meisje, mi e taigi yu: Opo!” Prakseri fa en papa nanga mama ben prisiri di a opo wantewante èn a bigin waka! Yesus ben wiki a meisje fu den (Markus 5:22-24, 35-42; Lukas 8:49-56). Sensi a dei dati, te den ben si a meisje fu den, den ben e memre san Yehovah ben meki Yesus du gi den.a

¹⁰ Bakaten den sma di Yesus gi wan opobaka, dede baka. Ma den tori fu den sma disi prenspari, fu di den e gi wi howpu trutru. Yehovah wani gi sma wan opobaka èn a o du dati tu.

SAN DEN TORI FU SMA DI KISI WAN OPOBAKA E LERI WI?

11. San Preikiman 9:5 e taki fu den dedewan èn san dati e meki wi frustan fu Lasarus?

¹¹ Bijbel e taki krin dati „den dedewan no sabi notinoti”. Na so a ben de tu nanga Lasarus (Preikiman 9:5). Soleki fa Yesus ben taki, dan a ben de neleki Lasarus ben e sribi (Yohanes 11:11). Di Lasarus ben de na ini grebi, a ’no ben sabi notinoti’.

12. Fa wi du sabi taki Lasarus ben kisi wan opobaka trutru?

¹² Di Yesus gi Lasarus wan opobaka, dan furu sma ben si dati. Srefi den feanti fu Yesus ben sabi taki a ben du a wondru dati. Lasarus ben e libi baka èn dati ben sori taki a ben kisi wan opobaka trutru (Yohanes 11:47). Boiti dati, furu sma ben go luku Lasarus èn dati meki den bigin bribi taki na Gado ben seni Yesus kon. Den feanti fu Yesus no ben lobi a tori èn dati meki den bigin suku wan fasi fu kiri Yesus nanga Lasarus.​—Yohanes 11:53; 12:9-11.

13. Fu san ede wi kan de seiker taki Yehovah o gi dedesma wan opobaka?

¹³ Yesus taki dati „ala den sma di de na ini den grebi” o kon na libi baka (Yohanes 5:28). Dati wani taki dati Yehovah no frigiti den sma di dede, a o tyari den kon na libi baka. Ma Yehovah musu man memre ala sani fu wan sma fu man gi en wan opobaka. A man memre ala den sani dati? We, milyardmilyard stari de na hemel. Bijbel e taki dati Yehovah sabi den nen fu ala den stari dati. (Leisi Yesaya 40:26.) Efu a man memre a nen fu ibriwan fu den stari, dan a no o muilek gi en fu memre ala sani fu den sma di a o gi wan opobaka. San moro prenspari, na taki Yehovah meki ala sani, fu dati ede wi sabi taki a abi a makti fu gi sma libi baka.

14, 15. San den wortu fu Yob e leri wi fu na opobaka?

¹⁴ A reti-ati man Yob ben e bribi taki dedesma o kisi wan opobaka. A ben aksi: „Efu wan libisma dede, a kan kon na libi baka?” Ne a taigi Yehovah: „Yu o kari mi èn mi o piki yu. Yu o angri fu si mi, a sani di yu meki nanga yu eigi anu.” Iya, Yob ben sabi taki Yehovah e wakti a ten te a o gi dedesma wan opobaka.​—Yob 14:13-15.

¹⁵ Fa a howpu di yu abi taki dedesma o kisi wan opobaka, e meki yu firi? Kande yu wani sabi: ’Den famiri nanga den mati fu mi di dede o kisi wan opobaka tu?’ Wi e kisi trowstu fu di wi sabi taki Yehovah e angri fu gi den sma di dede libi baka. Meki wi go luku pe den sma disi o libi èn suma o kisi wan opobaka, soleki fa Bijbel e leri.

DEN „O YERE EN STEN ÈN DEN O KOMOPO DRAPE”

16. Fa a libi na grontapu o de gi den sma di kisi wan opobaka?

¹⁶ Na ini owruten, den sma di ben kisi wan opobaka ben de makandra baka nanga den famiri nanga mati dyaso na grontapu. Na a srefi sani o pasa na ini a ten di e kon, ma a libi o moro betre srefi. Fu san ede? Fu di den sma di o kon na libi baka na grontapu o man libi fu têgo sondro fu dede baka. Den o libi ini wan moro bun grontapu tu, fu di feti, ogri, nanga siki no o de moro.

17. Suma o kisi wan opobaka?

¹⁷ Suma o kisi wan opobaka? Yesus ben taki dati „ala den sma di de na ini den grebi o yere en sten èn den o komopo drape” (Yohanes 5:28, 29). Openbaring 20:13, e taki: „A se lusu den dede sma di ben de na ini en èn dede nanga Grebi lusu den dede sma di ben de na ini den.” Sobun, milyunmilyun sma o kisi wan opobaka. Na apostel Paulus ben taki dati ’den sma di du san reti èn den sma di no du san reti’, o kisi wan opobaka. (Leisi Tori fu den apostel 24:15.) San disi wani taki?

18. Suma na „den sma di du san reti” di o kisi wan opobaka?

¹⁸ Na ini a grupu fu „den sma di du san reti” yu abi sma tu di ben du a wani fu Yehovah, fosi Yesus kon na grontapu. Sma soleki Noa, Abraham, Sara, Moses, Rut, nanga Ester o kisi wan opobaka fu libi dya na grontapu. Yu kan leisi fu den man nanga uma disi na ini Hebrewsma kapitel 11. Ma fa a de nanga den futuboi fu Gado di dede na ini a ten disi? Den na sma di „du san reti” tu, sobun den o kisi wan opobaka.

19. Suma na „den sma di no du san reti”? Sortu okasi Yehovah o gi den?

¹⁹ „Den sma di no du san reti” na den milyunmilyun sma di dede sondro fu kon sabi Yehovah. Aladi den dede, toku Yehovah no frigiti den. A o gi den wan opobaka èn den o abi na okasi fu kon leri sabi en èn fu dini en.

20. Fu san ede a no ala sma o kisi wan opobaka?

²⁰ A sani disi wani taki dati ala sma di dede o kisi wan opobaka? Nôno. Yesus ben taki dati son sma no o kisi wan opobaka (Lukas 12:5). Suma o bosroiti efu wan sma o kisi wan opobaka? Yehovah na a Krutuman, ma a gi Yesus makti tu „fu krutu den libiwan nanga den dedewan” (Tori fu den apostel 10:42). Iniwan sma di a krutu leki wan ogri sma di no wani kenki, no o kisi wan opobaka.​—Luku „Ete wan tu sani” 19.

WAN OPOBAKA FU LIBI NA HEMEL

21, 22. (a) Sortu skin wan sma di o opo baka fu libi na hemel e kisi? (b) Suma na a fosi sma di kisi wan opobaka fu libi na hemel?

²¹ Bijbel e leri tu taki son sma o libi na hemel. Wan sma di kisi wan opobaka fu libi na hemel, no e kon na libi nanga wan libisma skin. A e kon na libi leki wan yeye di o libi na hemel.

²² Yesus na a fosi sma di kisi wan opobaka fu libi na hemel (Yohanes 3:13). Dri dei baka di sma kiri Yesus, Yehovah gi en wan opobaka (Psalm 16:10; Tori fu den apostel 13:34, 35). Yesus no kon na libi leki wan libisma. Na apostel Petrus taki dati sma kiri Yesus „di a ben de wan libisma, ma a kon na libi leki wan yeye” (1 Petrus 3:18). Yesus ben kon na libi leki wan makti yeye! (1 Korentesma 15:3-6) Ma Bijbel e sori taki a no en wawan ben o kisi so wan opobaka.

23, 24. Suma na a „pikin ipi” di Yesus ben taki fu en, èn omeni sma de na ini a grupu dati?

²³ Fosi Yesus dede a taigi den disipel fu en: „Mi e gowe fu sreka wan presi gi unu” (Yohanes 14:2). Disi wani taki dati wan tu fu den bakaman fu en ben o kisi wan opobaka fu libi nanga en na hemel. Omeni sma o libi na hemel? Yesus kari den sma disi wan „pikin ipi”, sobun den no furu (Lukas 12:32). Na apostel Yohanes e taigi wi omeni sma dati o de. A ben si Yesus „e tanapu na tapu Sion-bergi [na hemel], makandra nanga wán hondro fotenti na fo dusun sma”.​—Openbaring 14:1.

²⁴ O ten den 144.000 Kresten o kisi wan opobaka? Bijbel e taki dati disi ben o pasa baka te Krestes bigin tiri na ini hemel (1 Korentesma 15:23). Wi e libi na ini a ten dati now èn bun furu fu den sma di de na ini a grupu fu 144.000 sma, kisi wan opobaka kaba fu libi na hemel. Den wan fu a grupu dati di de ete na grontapu, e kisi wan opobaka wantewante fu libi na hemel baka te den dede. Ma na ini a ten di e kon, a moro bigi grupu fu sma o kisi wan opobaka fu libi na ini Paradijs dyaso na grontapu.

25. San wi o leri na ini a tra kapitel?

²⁵ Heri esi Yehovah o meki ala libisma kon fri fu dede, èn dede no o de moro. (Leisi Yesaya 25:8.) Ma san den sma di o go na hemel o du drape? Bijbel e taki dati den o tiri makandra nanga Yesus na ini en Kownukondre. Wi o leri moro fu a Kownukondre disi na ini a tra kapitel.