1, 2. Soleki fa Esekièl 47:1-12 e sori, dan san Esekièl si? (Luku a prenki na a bigin fu a kapitel.)

ESEKIÈL e si wan tra moi sani na ini a fisyun fu a tempel: A e si taki watra e lon komoto fu a tempel. Prakseri fa a e pruberi fu si pe a krin watra e komoto èn pe a e lon go. (Leisi Esekièl 47:1-12.) A watra ben dropu komoto na ondro a doromofo fu a tempel. Baka dati a si taki a watra ben lon go na a sei fu a portu di de na owstusei. Na engel e meki Esekièl waka gowe fu a tempel èn a e marki o fara den e waka. Na engel e meki Esekièl waka na ini a watra èn a profeiti e si taki esi-esi a watra e kon moro hei. A watra kon hei so te taki a no ben man waka moro, ma a ben musu swen.

² Na engel e taigi Esekièl taki a liba e lon go na a Dede Se. Ala presi pe a libawatra e doro, a e meki a sowtu watra pe nowan sani e libi kon bun baka. A se e kon lai nanga fisi. Esekièl e si tu taki bun furu bon de na sei a liba. Ibri mun den bon disi e gi bun froktu èn den wiwiri fu den bon e meki sma kon betre. A no de fu taki dati den sani di Esekièl si gi en howpu èn den meki a firi bun. Ma san a pisi disi fu a fisyun wani taki gi en nanga den tra Dyu? San a wani taki gi wi na ini a ten disi?

San a liba di Esekièl si ben wani taki gi den Dyu?

3. Fu san ede den Dyu na ini owruten ben sabi taki a liba na ini a fisyun fu Esekièl no ben kan de wan trutru liba?

³ Den Dyu fu owruten ben sabi taki a fisyun no ben kan taki fu wan trutru liba. Na presi fu dati a fisyun ben memre den na wan tra profeititori di a profeiti Yoèl ben skrifi moro leki 200 yari pasa. A profeititori disi ben taki tu fa a tru anbegi ben o seti baka. (Leisi Yoèl 3:18.) Te den Dyu di ben de na ini katibo ben leisi a profeititori fu Yoèl den no ben fruwakti taki ’switi win ben o dropu’ fu den bergi trutru èn taki ’merki ben o lon’ na den pikin bergi. Den no ben fruwakti tu taki wan trutru liba ben o lon komoto „fu na oso fu Yehovah”. Dati meki den ben frustan taki a profeititori fu Esekièl no ben taki fu wan trutru liba.a Sobun, san Yehovah ben wani leri den? Bijbel e yepi wi fu frustan son pisi fu a fisyun disi moro bun. Wi o luku dri sani fu a fisyun di e sori taki Yehovah lobi wi.

4. (a) Fa a fisyun fu a liba ben yepi den Dyu fu frustan taki Gado ben o blesi den èn sortu blesi den ben o kisi? (b) Fa den wortu „liba” nanga „watra” e gi Gado pipel a dyaranti taki a o blesi den? (Luku a faki „Liba di e tyari blesi fu Yehovah”.)

⁴ Wan liba di e tyari blesi kon. Furu leisi te Bijbel e taki fu liba èn fu watra a e sori go na den blesi di Yehovah o gi sma. Esekièl ben si taki wan liba ben komoto fu a tempel. Sobun, a pipel fu Gado ben frustan taki Yehovah ben o blesi den solanga den ben tan anbegi en na a fasi di a feni bun. Fa a ben o blesi den? Den ben o kisi leri baka fu den priester. Den ben o man tyari ofrandi baka na a tempel fu man kisi pardon fu den sondu (Esek. 44:15, 23; 45:17). Disi ben o meki taki Gado ben o si den baka leki sma di krin. A ben o de neleki den ben wasi nanga a watra di ben komoto fu a tempel.

5. Fa a fisyun e sori taki ala sma ben o kisi blesi?

⁵ Na ala sma ben o man kisi blesi? A fisyun e sori taki den Dyu no ben abi fu broko den ede nanga a tori dati. Na wan wondru fasi a watra di e dropu komoto fu a tempel e tron wan bigi liba, baka tu kilometer nomo! (Esek. 47:3-5) Efu a pipel ben o kon moro furu, Yehovah ben o meki ala den sma dati kisi blesi tu. A liba ben sori taki Yehovah ben o gi den furu blesi.

6. (a) Sortu dyaranti a profeititori ben gi den Dyu? (b) Sortu warskow a fisyun ben e gi tu? (Luku a futuwortu.)

⁶ Watra di e gi libi. Na ini a fisyun fu Esekièl a liba e lon go na a Dede Se èn a e meki a watra fu a se kon bun baka. A watra ben meki taki den fisi na ini a se ben kon furu leki den fisi na ini a Bigi Se noso a Mindrikondre Se. A profeititori e taki tu fu tu foto di ben de na a syoro fu a se èn di ben de fara fu makandra. Someni fisi ben de na ini a kontren dati, taki furu fisiman ben e du bisnis drape. Na engel ben taki: „Na ala sei pe a liba o lon, sani o man libi.” Ma disi wani taki dati a watra di ben komoto na a oso fu Yehovah ben doro na ala sei fu a Dede Se? Nôno. Na engel ben taki dati a watra no ben o doro na den patyapatya presi krosibei fu a se. „Na soso sowtu” ben o de na den presi dati (Esek. 47:8-11).b Sobun, a profeititori ben gi den Dyu a dyaranti taki te den ben o anbegi Yehovah na a yoisti fasi baka, dan sani ben o go bun nanga den. Ma a ben sori den tu taki a no ala sma ben o wani den blesi fu Yehovah èn taki a no ala sma ben o kon betre.

7. Sortu dyaranti den bon na sei a liba ben gi den Dyu di ben komoto na ini katibo?

⁷ Bon di e gi froktu èn di e meki sma kon betre. Fa a de nanga den bon di de na a syoro fu a liba? Den bon disi ben meki a presi moro moi. Ma den e prenki wan sani tu. Esekièl nanga den tra Dyu ben musu fu prakseri o switi a ben o de fu nyan den froktu di den bon dati ben o gi ala mun. Den bon ben gi den Dyu a dyaranti taki Yehovah ben o gi den leri di de leki nyanyan. Sortu tra dyaranti den bon ben gi den? Luku taki den wiwiri fu den bon ’ben o meki sma kon betre’ (Esek. 47:12). Yehovah ben sabi taki den Dyu di ben o drai kon baka ben o abi yepi fanowdu fu kon abi wan bun matifasi baka nanga en èn a pramisi den taki a ben o yepi den. Tra profeititori e sori fa a du dati, soleki fa wi si na ini kapitel 9 fu a buku disi.

8. Fu san ede wi kan taki dati wan ten ben o kon te ala den sani na ini a fisyun fu Esekièl ben o kon tru?

⁸ Ma wi si tu na ini kapitel 9 taki a no ala sani fu den profeititori fu Esekièl kon tru na ini a ten fu den Dyu dati. Na a pipel srefi ben meki taki den no kisi ala den blesi. Ibri leisi baka den ben e du sani di Yehovah no feni bun èn den no ben poti na anbegi na a fosi presi na ini den libi. Fa Yehovah ben kan gi den ala den blesi efu den ben du den sani disi? Den Dyu di ben e gi yesi na Yehovah ben sari taki den tra Dyu no ben du san Yehovah feni bun. Ma den ben sabi taki ala ten Yehovah e du san a pramisi. (Leisi Yosua 23:14.) Sobun, wan ten ben o kon te ala den sani na ini a fisyun fu Esekièl ben o kon tru. Ma o ten?

A liba e lon na ini a ten disi tu!

9. O ten a fisyun fu Esekièl ben o kon tru na wan moro bigi fasi?

⁹ Soleki fa wi si na ini kapitel 14 fu a buku disi, dan a fisyun pe Esekièl si wan tempel kon tru na wan moro bigi fasi „na ini den lasti dei”. Na a ten dati a tru anbegi ben o hei moro ala tra anbegi (Yes. 2:2). Fa a pisi fu a fisyun di e taki fu a liba e kon tru nownow?

10, 11. (a) Sortu blesi wi e kisi na ini a ten disi? (b) Fa Yehovah sorgu taki ala den sma di kon dini en e kisi leri?

¹⁰ Wan liba di e tyari blesi. Te wi e luku a watra di e komoto fu na oso fu Yehovah, dan sortu blesi di wi e kisi na ini a ten disi yu e prakseri? A e meki wi prakseri ala den sani di Yehovah seti gi wi so taki wi kan abi wan bun matifasi nanga en. A moro prenspari sani di a seti, na a frulusu-ofrandi fu Krestes di e meki taki wi kan kisi pardon fu wi sondu. Den tru leri fu Bijbel de leki watra di e gi libi èn di e krin wi (Ef. 5:25-27). Fa a watra disi doro sma na ini a ten disi?

¹¹ Na ini 1919, sowan 5000 sma nomo ben e anbegi Yehovah èn den ben breiti taki den ben kon sabi san Bijbel e leri trutru. Na ini den yari baka dati, a grupu disi ben kon moro bigi. Now moro leki aiti milyun sma e anbegi Yehovah. A watra doro ala den sma disi? Iya! Wi e kisi so furu leri fu Bijbel. Gado pipel kisi milyardmilyard Bijbel, buku, tijdschrift, brochure nanga traktaat na ini den 100 yari di pasa. Neleki fa a liba na ini a fisyun fu Esekièl ben kon bigi moro nanga moro, na so Yehovah sorgu taki sma na heri grontapu kan kon sabi en. Langa ten kaba wi e meki buku di e leri sma sani fu Bijbel. Ma now sma kan feni den buku fu wi tapu a website jw.org na ini moro leki 1000 tongo! Fa den leri disi yepi reti-ati sma?

12. (a) Fa den leri fu Bijbel yepi sma fu tron mati fu Yehovah? (b) Sortu warskow a fisyun e gi wi na ini a ten disi? (Luku sosrefi a futuwortu.)

¹² Watra di e gi libi. Na engel ben taigi Esekièl: „Na ala sei pe a liba o lon, sani o man libi.” Prakseri den milyunmilyun sma di kon na ini a tru anbegi. Den leri fu Bijbel naki den ati èn a yepi den fu bribi na ini Yehovah. Ma a fisyun abi wan warskow tu: A no ala sma o tan lobi den sani di den leri na ini Bijbel. Neleki den patyapatya presi na ini a Dede Se fu a fisyun fu Esekièl, son sma no ben o gi yesi moro na a leri di den e kisi èn den ben o drai baka gi Yehovah.c Noiti wi musu du dati!​—Leisi Deuteronomium 10:16-18.

13. Sortu moi sani wi kan leri fu den bon?

¹³ Bon di e gi froktu èn di e meki sma kon betre. Sortu moi sani wi kan leri fu den bon di e gro na a syoro fu a liba? Ibri mun den bon disi e gi switi froktu èn den wiwiri fu den bon e meki sma kon betre (Esek. 47:12). Den e memre wi taki wi e dini wan Gado di e gi wi a moro prenspari sani di wi abi fanowdu. Dati na den leri fu Bijbel. Furu sma na ini a ten disi no e frustan Bijbel. Ma prakseri san Yehovah gi wi. Fa yu e firi te yu e leisi wan artikel na ini wan fu den tijdschrift fu wi, te yu e singi a lasti singi na den bigi konmakandra, te yu e luku wan felem noso a JW Broadcasting programa? A de wan bigi blesi taki wi e kisi so furu leri fu Yehovah (Yes. 65:13, 14). Den leri di wi e kisi e yepi wi fu libi na wan fasi di Yehovah feni bun. Den Bijbel rai di wi e kisi e yepi wi fu no du hurudu, fu no abi bigi-ai èn fu no kon abi wan swaki bribi. Yehovah seti sani tu fu yepi wi te wi du wan seryusu sondu. (Leisi Yakobus 5:14.) A de krin taki wi e kisi furu blesi.

14, 15. (a) San wi e leri fu den patyapatya presi na ini a fisyun? (b) Fa wi na ini a ten disi e kisi wini fu a liba na ini a fisyun?

¹⁴ Wi kan leri wan sani tu fu den patyapatya presi di no ben kon bun. Noiti wi musu weigri fu teki a leri fu Yehovah. Efu wi ben o du dati, dan wi ben o kon de leki furu sma fu a grontapu disi (Mat. 13:15). Tra fasi leki den sma disi, wi lobi den leri di wi e kisi. Wi e studeri Gado Wortu fayafaya, wi e fruteri tra sma san wi leri, èn wi e kisi rai, trowstu nanga yepi fu den owruman di kisi leri fu a koni srafu. Ala den sani disi e meki wi prakseri a liba di Esekièl ben si. Ala sei pe a liba disi e lon, a e meki sani kon na libi èn a e meki sma kon betre!

¹⁵ A fisyun fu a liba o kon tru na ini a ten di e kon? Wi o si taki a liba disi o tyari moro bigi blesi kon na ini a paradijs.

Fa a fisyun o kon tru na ini a paradijs?

16, 17. Fa a watra di e gi libi o tyari moro wini kon na ini a paradijs? Gi wan tu eksempre.

¹⁶ Yu e si kaba fa yu e prisiri makandra nanga den mati nanga famiri fu yu na ini a paradijs? Te yu e studeri a fisyun pe Esekièl si wan liba, dan dati kan yepi yu fu kon abi wan moro tranga bribi taki a paradijs o kon trutru. Fa so? Meki wi poti prakseri baka na den dri sani na ini a fisyun di e sori fa Yehovah lobi wi.

¹⁷ Wan liba di e tyari blesi kon. A liba o tyari moro bigi blesi kon na ini a paradijs, fu di a no o yepi wi nomo fu tan abi wan bun matifasi nanga Yehovah, ma a o yepi wi tu fu kon gosontu baka. Na ini den dusun yari te Yesus o tiri leki Kownu, a lusu-paiman fu Krestes o tyari moro wini kon gi reti-ati sma. Te fu kaba den no o abi sondu moro! Nowan siki no o de. Nowan datra, ati-oso nanga datra-karta o de fanowdu moro! Den milyunmilyun sma di o pasa Armagedon o kisi wini fu a watra di e gi libi. Den na a „bigi ipi sma” di o komoto na ini „a bigi banawtu” (Openb. 7:9, 14). Ma disi o de soso a bigin. Te fu kaba a liba o tyari moro bigi blesi kon. Soleki fa a fisyun fu Esekièl e sori, dan a liba e kon moro bigi so taki moro sma kan kisi wini fu en.

18. Fa a ’liba di abi watra di e gi libi’ o kon moro bigi na ini den dusun yari te Krestes o tiri?

¹⁸ Watra di e gi libi. Na ini den dusun yari te Krestes o tiri, a ’liba di abi watra di e gi libi’ o kon moro bigi (Openb. 22:1). Milyardmilyard sma o kisi wan opobaka èn den o abi na okasi fu libi fu têgo na ini a paradijs! Srefi den sma di dede bun langa kaba o kisi wan opobaka (Yes. 26:19). Ma na ala sma di kisi wan opobaka o kisi têgo libi?

19. (a) Fa wi du sabi taki wi o kisi nyun leri na ini a paradijs? (b) Fa son sma o de leki den patyapatya presi pe „soso sowtu” de?

¹⁹ Ibriwan fu den sma dati o abi fu teki wan bosroiti. Nyun bukulolo o opo na a ten dati. Sobun, Yehovah o leri wi nyun sani èn wi o kisi tra rai. Wi no man wakti a ten dati! Toku son sma no o wani teki den leri fu Yehovah. Den o bosroiti fu trangayesi en. Sonwan fu den sma disi o opo densrefi teige Yehovah na ini den dusun yari te Krestes o tiri, ma den no o kisi na okasi fu pori a libi na ini a paradijs (Yes. 65:20). A sani disi e meki wi prakseri den patyapatya presi pe „soso sowtu” ben de èn di no ben kon bun. Baka den dusun yari, sma o de tu di o teki a sei fu Satan. Den sma di no o wani dringi a watra di e gi libi, na donsma! Ala sma di no o wani saka densrefi na ondro Yehovah o kisi pori fu têgo.​—Openb. 20:7-12.

20. Sortu sani di Yehovah o seti na ini den dusun yari te Krestes o tiri, o de leki den bon di Esekièl ben si?

²⁰ Bon di e gi froktu èn di e meki sma kon betre. Yehovah wani taki wi alamala kisi têgo libi. Fu yepi wi fu kisi a moi blesi disi, a o seti sani di o de leki den bon di Esekièl ben si. Na ini a paradijs Yehovah no o yepi wi nomo fu abi wan bun matifasi nanga en, ma a o yepi wi tu fu kon gosontu baka. Na ini hemel Yesus Krestes nanga den 144.000 sma o tiri leki kownu dusun yari langa. Den 144.000 sma disi o de priester tu èn den o yepi libisma fu kisi wini fu a frulusu-ofrandi fu Krestes (Openb. 20:6). A fisyun pe Esekièl ben si den bon di e gi bun froktu èn di abi wiwiri di e meki sma kon betre e taki fu a srefi sani di na apostel Yohanes ben si na ini wan fisyun. (Leisi Openbaring 22:1, 2.) Den wiwiri fu den bon di Yohanes si na „fu dresi den pipel”. Den 144.000 priester o yepi milyunmilyun sma fu kon fri fu sondu nanga dede.

21. (a) Fa yu e firi te yu e prakseri a fisyun fu Esekièl? (Luku a faki „A watra di e dropu komoto fu a tempel e tron wan bigi liba!”) (b) San wi o luku na ini a tra kapitel?

²¹ Te yu e prakseri a fisyun fu Esekièl, a no e meki yu firi bun èn a no e gi yu howpu? Wan moi ten e wakti wi! Dusundusun yari pasa Yehovah meki sma skrifi furu profeititori fu yepi wi fu si fa a o de na ini a paradijs. Nanga pasensi Yehovah e gi sma wan kari fu libi na ini a paradijs di o kon. Yu o de drape? Kande yu e aksi yusrefi efu yu o man libi na ini a paradijs trutru. Na ini a tra kapitel wi o si fa a lasti pisi fu a profeititori fu Esekièl o tranga wi bribi.

1, 2. (a) San Yehovah taigi Esekièl fu du? (b) Sortu aksi wi o luku?

ESEKIÈL e si wan fisyun di e meki a prakseri wan sani di Moses nanga Yosua ben du pikinmoro 900 yari pasa. Na a ten dati Yehovah ben taigi Moses o bigi a Pramisi Kondre ben o de èn bakaten a taigi Yosua fa a ben musu prati a kondre gi den lo fu Israel (Num. 34:1-15; Yos. 13:7; 22:4, 9). Ma now, na ini a yari 593 Fosi Krestes, Yehovah e taigi Esekièl nanga den tra Dyu di ben komoto na Babilon taki den ben musu prati a Pramisi Kondre baka gi den lo fu Israel!​—Esek. 45:1; 47:14; 48:29.

² San a fisyun ben leri Esekièl nanga den tra Dyu? Fu san ede a fisyun disi e gi a pipel fu Yehovah deki-ati na ini a ten disi? A fisyun o kon tru na wan moro bigi fasi na ini a ten di e kon?

Wan fisyun di abi fo pramisi

3, 4. (a) San na den fo sani di a fisyun fu Esekièl pramisi den Dyu? (b) Sortuwan fu den pramisi disi wi o luku na ini a kapitel disi?

³ A lasti fisyun di Esekièl kisi skrifi na ini neigi kapitel fu a Bijbel buku di a skrifi (Esek. 40:1–48:35). A fisyun disi ben pramisi den Dyu fo sani di ben gi den deki-ati. San na den pramisi dati? A fosi pramisi na taki a tru anbegi ben o seti baka na a tempel fu Gado. A di fu tu pramisi na taki reti-ati priester nanga fesiman ben o tiri a pipel. A di fu dri pramisi na taki ala den sma di ben o drai go baka na Israel ben o kisi wan pisi gron. Èn a di fu fo pramisi na taki Yehovah ben o de nanga den.

⁴ Kapitel 13 nanga 14 fu a buku disi taki fa den fosi tu pramisi kon tru. Na ini a kapitel disi wi o poti prakseri na a di fu dri pramisi. Na ini a tra kapitel, wi o taki fu a di fu fo pramisi.​—Esek. 47:13-21; 48:1-7, 23-29.

’Un musu prati a kondre disi gi makandra’

5, 6. (a) Sortu kontren ben musu prati, soleki fa a fisyun fu Esekièl e sori? (Luku a prenki na a bigin fu a kapitel.) (b) Fu san ede Yehovah ben gi Esekièl a fisyun di e sori fa den ben musu prati a kondre?

⁵ Leisi Esekièl 47:14. Na ini a fisyun, Yehovah e sori Esekièl wan pisi fu a kondre di ben o tron leki „a dyari fu Eden” (Esek. 36:35). Baka dati Yehovah taki: „Na a kontren disi unu o prati gi makandra, iya, gi den twarfu lo fu Israel” (Esek. 47:13). „A kontren” di den ben musu prati ben de a kondre Israel pe den Dyu ben o drai go baka. Baka dati Yehovah sori den o bigi a kondre ben o de, soleki fa wi kan leisi na ini Esekièl 47:15-21.

⁶ Fu san ede Yehovah ben gi Esekièl a fisyun disi di e sori fa den ben musu prati a kondre? Di Yehovah sori finifini o bigi a kondre ben o de, dan dati gi Esekièl nanga den tra Dyu a dyaranti taki a kondre fu den di den ben lobi so te, ben o kon bun baka. Prakseri fa a pramisi disi fu Yehovah gi den Dyu deki-ati! A kondre ben prati trutru gi a pipel fu Yehovah di den komoto na ini katibo? Iya!

7. (a) Sortu sani pasa na ini a yari 537 Fosi Krestes èn san disi e meki wi prakseri? (b) Sortu aksi wi o luku fosi?

⁷ Na ini a yari 537 Fosi Krestes, sowan 56 yari baka di Esekièl ben kisi a fisyun, dusundusun Dyu drai go baka na den kondre Israel. Den moi sani di pasa na a ten dati e memre wi na wan srefi sortu sani di a pipel fu Gado ondrofeni na ini a ten fu wi. Na wan agersi fasi den kisi wan kondre tu. Fa so? Yehovah meki den anbegiman fu en go na ini wan agersi paradijs. Sobun, den sani di Yehovah du fu seti a Pramisi Kondre baka, e leri wi furu fu a fasi fa Yehovah tyari en pipel kon na ini na agersi paradijs. Ma fosi wi taki fu den sani di wi kan leri fu a fisyun disi, wi o piki na aksi disi: „Fu san ede wi kan taki dati wan agersi paradijs de trutru na ini a ten disi?”

8. (a) Sortu pipel Yehovah teki na ini a presi fu den Israelsma? (b) San na a agersi paradijs? (c) O ten na agersi paradijs seti èn suma de na ini?

⁸ Yehovah ben meki Esekièl skrifi profeititori di ben sori taki den Israelsma ben o drai go baka na den kondre. Na ini wan fisyun Yehovah ben sori Esekièl taki den profeititori dati ben o kon tru na wan moro bigi fasi te en „futuboi David”, dati na Yesus Krestes, ben o tiri leki Kownu (Esek. 37:24). Disi pasa na ini 1914. Na a ten dati den Israelsma no ben de Gado pipel moro, ma Gado ben teki na „Israel fu Gado”, den salfu Kresten, leki en pipel. (Leisi Mateyus 21:43; 1 Petrus 2:9.) Neleki fa Yehovah ben gi a pipel Israel wan kondre, na so a gi a nyun pipel fu en wan kondre tu. A kondre disi na a agersi paradijs (Yes. 66:8). Soleki fa wi si na ini kapitel 17 fu a buku disi, na agersi paradijs na ala sani di Yehovah seti so taki den anbegiman fu en kan dini en na wan yoisti fasi. Sensi 1919 den salfuwan di de na grontapu ete kon na ini na agersi paradijs disi. (Luku faki 9B, „Fa wi kon tapu a yari 1919?”) Bakaten den „tra skapu” di abi a howpu fu libi na grontapu bigin kon tu na ini na agersi paradijs (Yoh. 10:16). Den wan di de na ini na agersi paradijs e kisi furu blesi nownow kaba. Ma baka Armagedon den blesi o moro bigi.

A pisi gron di ibri sma o kisi musu bigi a srefi

9. Fa Yehovah ben wani taki a kondre ben musu prati?

⁹ Leisi Esekièl 48:1, 28. Baka di Yehovah sori Esekièl o bigi a kondre ben o de, a sori finifini fa a kondre ben musu prati. Yehovah ben taki dati a gron fu ibriwan fu den 12 lo ben musu waka fu noordsei go na zuidsei èn ibri pisi ben musu bigi a srefi. A lo Dan ben o de a fosi lo na noordsei èn Gad ben o de a lasti lo na zuidsei. A gron fu ibri lo ben musu waka langalanga fu a Bigi Se na owstusei go na a Mindrikondre Se na west-sei.​—Esek. 47:20; luku a karta na ini a faki di nen „A fasi fa a kondre prati”.

10. Sortu dyaranti a pisi disi fu a fisyun ben gi den Dyu?

¹⁰ Sortu dyaranti a pisi disi fu a fisyun ben gi den Dyu? A ben sori den taki a kondre ben o prati na wan orga fasi. Na ini a fisyun ala den 12 lo ben kisi wan pisi gron. Disi ben sori den taki ala den Dyu di ben o drai go baka na den kondre ben o kisi wan pisi gron. Ala sma ben o abi wan presi fu tan.

11. San wi na ini a ten disi kan leri fu a fisyun di e sori fa a kondre ben musu prati? (Luku a faki „A fasi fa a kondre prati”.)

¹¹ San wi na ini a ten disi kan leri fu a fisyun? A no soso den priester, den Leifisma nanga den edeman ben abi wan pisi gron na ini a Pramisi Kondre, ma ala tra sma fu den 12 lo (Esek. 45:4, 5, 7, 8). Na so a de tu na ini a ten disi, taki a no soso den salfuwan nanga den owruman di de fu a „bigi ipi” de na ini na agersi paradijs. Ma ala tra sma fu a bigi ipi de tu na ini na agersi paradijs (Openb. 7:9).a Awinsi san wi e du na ini na organisâsi fu Yehovah, wi warti gi en. Disi e gi wi furu deki-ati!

Tu bigi difrenti

12, 13. O bigi a gron fu ibri lo ben musu de?

¹² Kande Esekièl no ben frustan ala den sani di Yehovah ben taigi en, fu di a kondre ben musu prati heri tra fasi leki na ini a ten fu Moses. Wi o luku tu difrenti. Wán abi fu du nanga a kondre èn a trawan abi fu du nanga den sma na ini a kondre.

¹³ A kondre. Yehovah ben taigi Moses taki den bigi lo ben musu kisi wan moro bigi pisi gron leki den pikin lo (Num. 26:52-54). Ma na ini a fisyun fu Esekièl, Yehovah taki dati a gron di ibri lo ben musu kisi ben musu bigi a srefi (Esek. 47:14). Sobun, a pisi gron di ibriwan fu den 12 lo ben o kisi ben o bradi a srefi. Ala Israelsma ben o kisi wan bun pisi gron di ben o lai nanga watra èn di ben o gi bun furu nyanyan.

14. Fa a sani di Yehovah ben taigi Esekièl fu den trakondre sma ben de heri tra fasi leki san a Wet fu Moses ben taki?

¹⁴ Den sma na ini a kondre. A Wet fu Moses ben kibri den trakondre sma èn a ben gi den na okasi fu anbegi Yehovah. Ma den no ben kisi wan pisi gron (Lef. 19:33, 34). Ma now Yehovah e taigi Esekièl wan heri tra sani. Yehovah taigi en: „Gi den trakondre sma wan pisi gron fu a lo pe den e tan.” Nanga den wortu disi Yehovah sori taki wan difrenti no ben o de moro na mindri „sma di gebore leki Israelsma” nanga den trakondre sma di ben e tan na ini Israel (Esek. 47:22, 23). A fisyun disi ben leri Esekièl taki a pipel ben o dini Yehovah na ini wánfasi èn taki nowan sma ben o bun moro a trawan.​—Lef. 25:23.

15. Fa den sani di Yehovah ben taki fu a kondre nanga den sma di ben o tan na ini a kondre ben gi den Dyu deki-ati?

¹⁵ Den tu sani disi di Yehovah ben taigi Esekièl fu a kondre èn fu a pipel ben gi den Dyu di ben de na ini katibo howpu. Den ben sabi taki Yehovah ben o gi den wan presi fu tan, awinsi den ben de Israelsma noso awinsi den ben de trakondre sma di ben dini Yehovah (Esra 8:20; Neh. 3:26; 7:6, 25; Yes. 56:3, 8). Den sani disi ben gi den anbegiman fu Yehovah a dyaranti taki den alamala warti gi en. (Leisi Hagai 2:7.) Na ini a ten disi a de a srefi. Awinsi wan sma abi a howpu fu libi na ini hemel noso na grontapu, a warti gi Yehovah.

16, 17. (a) San wi e leri te wi e luku fa a kondre ben prati èn fa Yehovah ben si den sma fu a kondre? (b) San wi o luku na ini a tra kapitel?

¹⁶ San wi e leri te wi e luku fa a kondre ben prati èn fa Yehovah ben si den sma fu a kondre? Disi e memre wi taki na ini na organisâsi fu Yehovah wi musu libi nanga makandra na ini wánfasi èn wi no musu si a wan sma moro hei leki a trawan. Yehovah no e desko sma. Wi musu aksi wisrefi: ’Mi e si tra sma leki fa Yehovah e si den? Mi e lespeki ibri anbegiman fu Yehovah, awinsi fu sortu ras a de noso awinsi a gudu noso pôti?’ (Rom. 12:10) Wi breiti taki Yehovah e gi wi alamala a grani fu de na ini na agersi paradijs. Dyaso wi e dini wi hemel Papa nanga wi heri ati èn a e blesi wi.​—Gal. 3:26-29; Openb. 7:9.

¹⁷ Now wi o poti prakseri na a di fu fo pramisi di skrifi na ini a lasti pisi fu a fisyun fu Esekièl. Dati na a pramisi taki Yehovah ben o de nanga den Dyu di ben o drai go baka na den kondre. San wi kan leri fu a pramisi dati? Wi o piki na aksi disi na ini a tra kapitel.

1, 2. (a) Suma ben musu kisi wan pisi gron tu? (Luku a prenki na tapu a kafti fu a buku.) (b) Fa a fisyun ben gi den Dyu deki-ati?

NA INI Esekièl en lasti fisyun, a e si wan pisi gron di nowan fu den lo fu Israel ben o kisi. A pisi gron disi ben o de fu Yehovah. Esekièl e si wan foto tu di abi wan aparti nen. A pisi disi fu a fisyun ben gi den Dyu furu deki-ati. A ben pramisi den taki Yehovah ben o de nanga den te den ben o drai go baka na den kondre.

² Esekièl e fruteri finifini fa a pisi gron ben de. Wi o luku san a fisyun disi wani taki èn san wi kan leri fu en.

A santa kontren èn a foto

3. San na den feifi pisi fu a kontren di a pipel ben musu gi Yehovah? Gi san den ben gebroiki den pisi disi? (Luku a faki „A kontren di den ben musu gi Gado”.)

³ Fu noordsei go na zuidsei a spesrutu pisi gron ben o langa 13 kilometer èn fu owstusei go na west-sei a ben o bradi 13 kilometer. Den ben musu gi Gado „a heri pisi gron” dati. A gron disi ben fokanti èn a ben prati na ini dri pisi. A tapusei pisi ben de fu den Leifisma èn a mindrisei pisi ben de gi a tempel nanga den priester. Den tu pisi disi ben de „a santa kontren”. A pikin pisi gron ’di ben tan abra’ ’no ben santa’. Drape a foto ben o de.​—Esek. 48:15, 20.

4. San wi kan leri te wi e luku a pisi gron di den Dyu ben musu gi Yehovah?

⁴ San wi kan leri fu a pisi gron di den ben musu gi Yehovah? Yehovah bosroiti fosi sortu pisi gron den ben musu gi en. Baka dati a taigi den taki den ben musu prati a kondre gi den lo. Na a fasi disi Yehovah sori taki a pisi gron disi ben de a moro prenspari pisi fu a kondre fu di a tempel fu en ben de drape (Esek. 45:1). A sani disi leri den Dyu wan prenspari sani. Den ben musu poti na anbegi fu Yehovah na a fosi presi na ini den libi. Na ini a ten disi wi e si na anbegi fu Yehovah leki a moro prenspari sani tu. Dati meki wi e studeri Gado Wortu, wi e go na den Kresten konmakandra èn wi e du a preikiwroko. Na ini a fisyun disi Yehovah e leri wi taki na anbegi fu en musu de a moro prenspari sani na ini wi libi.

„A foto musu de leti na mindrisei fu a pisi gron disi”

5, 6. (a) Gi suma a foto ben bow? (b) San a foto no e prenki èn fu san ede wi kan taki dati?

⁵ Leisi Esekièl 48:15. San „a foto” nanga a gron na en lontu e prenki? (Esek. 48:16-18) Na ini a fisyun Yehovah taigi Esekièl: „Un musu poti wan pisi gron aparti pe a foto o de. . . . A o de fu ala den Israelsma” (Esek. 45:6, 7). Sobun, a foto nanga a gron na en lontu no ben de wan pisi fu „a santa kontren” di den ’ben musu gi Yehovah’ (Esek. 48:9). Meki wi luku now san wi na ini a ten disi kan leri fu a foto disi.

⁶ Fosi wi luku san wi kan leri fu a foto disi, wi musu sabi san a foto no e prenki. A foto no kan prenki a foto Yerusalem nanga a tempel di den Dyu ben meki baka. Fu san ede wi kan taki dati? Fu di a foto di Esekièl si na ini a fisyun no ben abi wan tempel na ini. A foto no e prenki nowan fu den tra foto tu di ben meki baka na ini a kondre Israel. Fu san ede? Fu di noiti den Dyu bow wan foto leki a wan di kari na ini a fisyun fu Esekièl. Boiti dati, a foto no e prenki wan foto na hemel. Fu san ede? Fu di a foto bow tapu gron „di no ben santa”. Ma a gron pe den ben bow sani di ben abi fu du nanga na anbegi, ben de gron di ben santa.​—Esek. 42:20.

7. San na a foto di Esekièl si èn san a e prenki? (Luku a prenki na a bigin fu a kapitel.)

⁷ San a foto di Esekièl si e prenki dan? Hori na prakseri taki a si a foto na ini a srefi fisyun pe a si a kondre di ben musu prati (Esek. 40:2; 45:1, 6). Gado Wortu e sori taki a kondre dati a no wan trutru kondre. Sobun, a foto a no wan trutru foto tu. San a wortu „foto” wani taki furu leisi? A wortu „foto” abi fu du nanga wan grupu sma di e libi na wán presi na wan orga fasi. Sobun, a fokanti foto di Esekièl ben si e prenki wan grupu sma di e teki fesi èn di orga bun.

8. Suma a grupu sma e tiri èn fa wi du sabi dati?

⁸ Pe a grupu sma disi e teki fesi? A fisyun fu Esekièl e sori taki a foto disi de na ini na agersi paradijs. Sobun, a grupu sma disi e tiri Gado pipel. A foto disi de tapu gron di no santa. San disi wani taki? Disi e sori wi taki a foto no e prenki wan seti na ini hemel, ma wan seti na grontapu. A seti disi e tyari wini gi ala sma di de na ini na agersi paradijs.

9. (a) Suma na den sma na mindri Gado pipel di e teki fesi na grontapu? (b) San Yesus o du te a o tiri grontapu dusun yari?

⁹ Suma na den sma na mindri Gado pipel di e teki fesi na grontapu? Na ini a fisyun fu Esekièl den e kari a sma di e teki fesi na ini a foto „na edeman” (Esek. 45:7). Na edeman disi ben e tiri a pipel, ma a no ben de wan priester èn a no ben de wan Leifisma. Na edeman disi e meki wi prakseri den gemeente owruman na ini a ten disi, spesrutu den wan di no salfu nanga santa yeye. Den owruman disi di de fu den „tra skapu” e saka densrefi ondro a tiri fu Krestes di de na hemel (Yoh. 10:16). Te Yesus o tiri dusun yari, a o poti lepi owruman noso „tiriman” na „heri grontapu” (Ps. 45:16). Ondro a tiri fu a Kownukondre di de na hemel, den o sorgu gi Gado pipel na ini den dusun yari.

„Yehovah srefi de drape”

10. Fa a foto nen èn sortu dyaranti a nen dati ben gi den Dyu?

¹⁰ Leisi Esekièl 48:35. A foto nen: „Yehovah srefi de drape.” A nen disi ben gi den Dyu a dyaranti taki Yehovah ben o de nanga den. Na ini a fisyun fu Esekièl a foto de na mindrisei fu a kondre. Na so Yehovah ben wani sori den Dyu taki a ben o de baka nanga den! Dati na wan moi pramisi!

11. San wi kan leri fu a foto nanga a nen fu a foto?

¹¹ San wi kan leri fu a pisi disi fu a profeititori fu Esekièl? A nen fu a foto e gi den anbegiman fu Gado na ini a ten disi a dyaranti taki Yehovah de nanga den now èn taki a o de nanga den ala ten. A nen disi e leri wi wan tra prenspari sani: Den man di e teki fesi no kan du san den wani, ma den musu du sani soleki fa Yehovah wani èn den musu sori lobi neleki en. Fu eksempre, Yehovah no ben gi den man di e teki fesi a frantwortu fu prati a kondre leki fa den wani. Na presi fu dati den ben musu prati en soleki fa en ben sori den. Na so a de tu taki den brada di e teki fesi na ini a ten disi musu lespeki ibriwan fu den futuboi fu Yehovah, srefi den wan di no man du furu gi en.​—Esek. 46:18; 48:29.

12. (a) San na wan moi sani fu a foto disi èn san wi kan leri fu en? (b) San owruman kan leri fu a pisi disi fu a fisyun?

¹² San na wan tra moi sani fu a foto di nen „Yehovah srefi de drape”? Na ini owruten sma ben e meki skotu fu kibri wan foto èn den no ben poti furu portu. Ma a foto disi abi 12 portu! (Esek. 48:30-34) Na ala den fo sei fu a foto disi yu ben abi dri portu. Disi e leri wi taki den fesiman fu a foto ben musu sori switifasi èn den ben musu abi ten gi ala den futuboi fu Gado. Boiti dati, den 12 portu e sori taki a foto ben opo gi „ala den Israelsma” (Esek. 45:6). Owruman kan leri wan prenspari sani fu a tori disi. Yehovah wani taki den musu abi switifasi èn den musu abi ten gi ala sma di de na ini na agersi paradijs.

A pipel fu Gado e ’boigi gi en’ èn den e horibaka gi a foto

13. Sortu wroko sma ben o du soleki fa Yehovah ben taki?

¹³ Meki wi luku now sortu tra sani Esekièl skrifi fu a fisyun. Yehovah taki dati sma ben o du difrenti wroko. Den priester „di e wroko na ini a tempel” ben musu tyari ofrandi èn den ben musu wroko gi Yehovah. Den Leifisma ben e „du ala a wroko di musu du na ini a tempel” (Esek. 44:14-16; 45:4, 5). Boiti dati, sma ben o wroko krosibei fu a foto. Suma na den sma disi?

14. San den sma di ben wroko krosibei fu a foto e meki wi prakseri?

¹⁴ Den sma di e horibaka gi a foto komoto na ini „ala den lo fu Israel”. Den abi a wroko fu prani èn a nyanyan di den e koti „de gi den wan di e wroko na ini a foto” (Esek. 48:18, 19). A seti disi e meki wi prakseri wan moi grani di wi abi na ini a ten disi. Na ini a ten disi ala sma di de na ini na agersi paradijs abi na okasi fu horibaka gi den salfu brada fu Krestes èn gi den brada fu a „bigi ipi” di Yehovah poti fu teki fesi (Openb. 7:9, 10). Wan prenspari fasi fa wi e horibaka gi den brada disi na te wi e gi yesi na den rai fu a koni srafu di de fu frutrow.

15, 16. (a) Sortu tra sani wi kan leri fu a fisyun fu Esekièl? (b) Sortu moi grani wi abi na ini a ten disi?

¹⁵ A fisyun fu Esekièl e leri wi wan sani tu fu a preikiwroko. San na dati? Yehovah ben taki dati sma fu den tra 12 lo di no ben de Leifisma ben o wroko na tu presi: Na ini a dyari fu a tempel èn na den weigron. San den e du na den presi disi? Na ini a dyari fu a tempel, ala den lo e „boigi gi Gado” èn den e tyari ofrandi gi Yehovah (Esek. 46:9, 24). Na den weigron fu a foto, sma e wroko a gron fu horibaka gi a foto. San wi kan leri fu den wrokoman disi?

¹⁶ Na ini a ten disi den sma fu a bigi ipi abi a grani fu du wan srefi sortu wroko leki den sma na ini a fisyun fu Esekièl. Na wan agersi fasi den e anbegi Yehovah „na ini a tempel fu en” fu di den e prèise en (Openb. 7:9-15). Fa den e du dati? Den e preiki a bun nyunsu, den e gi piki na den konmakandra èn den e singi gi Yehovah. Den e si den sani disi di den e du gi Yehovah leki den moro prenspari sani (1 Kron. 16:29). Boiti dati, furu anbegiman fu Yehovah man du tra sani fu horibaka gi na organisâsi fu en. Fu eksempre, den e yepi bow Kownukondre zaal nanga bijkantoro èn den e sorgu taki den presi disi tan bun. Den e yepi nanga tra wroko tu fu na organisâsi fu Yehovah. Tra sma e gi moni fu horibaka gi a wroko. Na wan agersi fasi den e wroko a gron èn disi e „gi Gado glori” (1 Kor. 10:31). Den e du a wroko fu den fayafaya èn nanga prisiri, fu di den sabi taki Yehovah e „prisiri nanga den sortu ofrandi dati” (Hebr. 13:16). Yu e horibaka fayafaya tu gi Yehovah en organisâsi?

„Wi e fruwakti nyun hemel nanga wan nyun grontapu”

17. (a) Fa a fisyun fu Esekièl o kon tru na ini a ten di e kon? (b) Te Krestes o tiri grontapu dusun yari, dan fa den wan di o teki fesi o yepi den sma di o libi na grontapu?

¹⁷ A fisyun disi fu Esekièl o kon tru na wan moro bigi fasi na ini a ten di e kon? Iya! Prakseri a sani disi: Esekièl si taki a pisi gron di den ben gi Yehovah ben de na mindrisei fu a kondre èn a „santa presi fu Yehovah” ben de na mindrisei fu a pisi gron disi (Esek. 48:10). Disi e gi wi a dyaranti taki baka Armagedon, Yehovah o de na wi mindri awinsi pe fu grontapu wi o tan (Openb. 21:3). Na a ten dati wan „nyun grontapu” o de. Dati na ala den sma di o libi na ini a paradijs. Te Yesus o tiri grontapu dusun yari, dan den wan di o teki fesi na grontapu o yepi ala den sma disi fu libi soleki fa Yehovah wani.​—2 Petr. 3:13.

18. (a) Fu san ede wi kan de seiker taki den wan di o teki fesi na grontapu o saka densrefi na ondro a tiri fu Gado? (b) Te wi e luku a nen fu a foto, dan sortu dyaranti dati e gi wi?

¹⁸ Fu san ede wi kan de seiker taki den wan di o teki fesi na grontapu o tan saka densrefi na ondro a tiri fu Gado? Fu di Gado Wortu e sori krin taki a foto di de na grontapu èn di abi 12 portu gersi a foto na ini hemel di abi 12 portu tu. A foto disi na a Nyun Yerusalem èn a e prenki Krestes nanga den 144.000 sma di o tiri makandra nanga en (Openb. 21:2, 12, 21-27). Disi e sori taki den wan di o teki fesi na grontapu o horibaka gi den bosroiti di Gado Kownukondre o teki na hemel. Iya, a nen fu a foto „Yehovah srefi de drape” e gi wi a dyaranti taki a tru anbegi o tan fu têgo na ini a paradijs. Dati o de wan moi ten!