LES 20
Fa sani orga na ini a gemeente?
Yehovah na wan Gado di lobi te sani orga bun (1 Korentesma 14:33). Dati meki wi kan fruwakti taki a pipel fu en ben o orga bun tu. Fa sani orga na ini a Kresten gemeente? Fa wi kan sorgu taki sani waka bun na ini a gemeente?
1. Suma e tiri a gemeente?
„Krestes na a ede fu a gemeente” (Efeisesma 5:23). Yesus de na hemel, ma a e tiri a wroko fu Yehovah en pipel na heri grontapu. Yesus poti „a koni srafu di de fu frutrow” fu teki fesi. Disi na wan pikin grupu brada di de owruman èn di abi ondrofeni. Wi e kari den a Tiri Skin tu. (Leisi Mateyus 24:45-47.) Na ini a ten fu den fosi Kresten den apostel nanga den owruman na ini Yerusalem ben teki fesi. Na ini a ten disi a Tiri Skin e orga a wroko fu Yehovah en pipel na heri grontapu (Tori fu den apostel 15:2). Ma den man disi a no basi fu na organisâsi fu wi. Den e leisi Bijbel fu sabi san Yehovah wani taki den musu du èn den e saka densrefi ondro Yesus.
2. Suma na den owruman èn san den e du?
Owruman na brada di e dini Yehovah wan pisi ten kaba. Den e gebroiki Bijbel fu gi a pipel fu Yehovah leri. Den e yepi den èn den e gi den deki-ati tu. Den no e kisi moni gi a wroko di den e du. Den e du den wroko ’nanga prisiri. Den no e du en fu di den lobi fu kisi wini na wan fasi di no fiti, ma den e du en fu di den e angri fu dini trawan’ (1 Petrus 5:1, 2). Dinari ini a diniwroko na brada di e yepi den owruman. Baka wan pisi ten den srefi kan tron owruman.
A Tiri Skin e poti son owruman fu dini leki kring-owruman. Den kring-owruman e go na den difrenti gemeente fu gi den deki-ati nanga rai. Na den e bosroiti efu wan brada kan dini leki owruman noso dinari ini a diniwroko. Fosi a gi den brada a frantwortu disi a e luku efu den e tyari densrefi soleki fa Bijbel e taki.—1 Timoteyus 3:1-10, 12; Titus 1:5-9.
3. San ibri Kotoigi musu du?
Ala sma na ini a gemeente musu „prèise a nen fu Yehovah”. Fa den e du dati? Den e gi piki na den konmakandra, den e hori lezing èn den e singi. Boiti dati, den e preiki so furu leki den man.—Leisi Psalm 148:12, 13.
SORTU TRA SANI YU KAN LERI?
Wi o luku fa Yesus e tiri a gemeente, fa owruman kan teki na eksempre fu en èn fa wi kan gi yesi na Yesus nanga den owruman.
4. Yesus na wan tiriman di abi switifasi
Luku sortu moi deki-ati Yesus e gi wi. Leisi Mateyus 11:28-30 èn taki fu na aksi disi:
Sortu moi fasi Yesus, a tiriman fu a gemeente abi èn fa a wani taki wi musu firi?
Fa owruman e teki na eksempre fu Yesus? Prei a FELEM.
Bijbel e sori krin fa owruman musu du a wroko fu den.
Leisi Yesaya 32:2 nanga 1 Petrus 5:1-3. Baka dati taki fu den aksi disi:
Fa yu feni en taki den owruman e pruberi fu gi trawan deki-ati neleki Yesus?
Na sortu tra fasi owruman e teki na eksempre fu Yesus?
5. Owruman musu de wan bun eksempre gi trawan
Fa Yesus wani taki owruman musu si a wroko fu den? Prei a FELEM.
Den wan di e teki fesi na ini a gemeente musu teki na eksempre fu Yesus. Leisi Mateyus 23:8-12 èn taki fu den aksi disi:
Soleki fa a tekst disi e sori, dan fa owruman musu tyari densrefi? Fa den kerki fesiman na ini a ten disi e tyari densrefi? Fa yu feni a sani disi?
Owruman e tan du muiti fu abi wan tranga bribi èn den e yepi den osofamiri fu abi wan tranga bribi tu
Owruman e broko den ede nanga ala sma na ini a gemeente
Owruman e preiki fayafaya
Owruman e gi leri, den e yepi fu krin a Kownukondre zaal èn den e du tra wroko tu
6. Wi musu gi yesi na den owruman
Bijbel e sori wi fu san ede a prenspari fu gi yesi na den owruman. Leisi Hebrewsma 13:17 èn taki fu den aksi disi:
Fu san ede Bijbel e taki dati wi musu gi yesi na den sma di e teki fesi? Fa yu feni a sani dati?
Leisi Lukas 16:10 èn taki fu na aksi disi:
Fu san ede wi musu gi yesi na den owruman awinsi wi feni taki a sani di den aksi fu wi no prenspari so?
SON SMA E TAKI: „Yu no abi fu go na kerki. Yu kan dini Gado na oso.”
Sortu wini yu denki wan sma e kisi te a e dini Gado makandra nanga den tra anbegiman fu en?
SAN YU LERI?
Yesus na a sma di e tiri a gemeente. Wi e gi yesi na den owruman di a poti fu teki fesi na ini a gemeente. Den owruman disi e gi wi deki-ati, den e gi wi leri, èn den de wan bun eksempre gi wi.
Fa yu ben o piki den aksi disi?
Suma e tiri a gemeente?
Fa den owruman e yepi a gemeente?
San ala anbegiman fu Yehovah musu du?
TRA SANI DI YU KAN LUKU
Na ini a felem disi yu o si fa a Tiri Skin nanga tra owruman e broko den ede nanga den brada nanga sisa.
Na ini a felem disi yu o si sortu wroko den kring-owruman e du.
Na artikel disi e sori sortu prenspari wroko umasma e du na ini a gemeente.
„Umasma na ini den gemeente fu Yehovah Kotoigi e gi leri?” (A Waktitoren, 1 september 2012)
Na artikel disi e sori fa owruman e wroko tranga fu gi den brada nanga sisa deki-ati.
„Kresten owruman e yepi wi fu de nanga prisiri” (A Waktitoren, 15 yanuari 2013)