LES 21
Fa a bun nyunsu e preiki?
Heri esi Yehovah o gebroiki a Kownukondre fu en fu lusu ala den problema fu wi. Dati na bun nyunsu èn ala sma musu yere en! Yesus ben wani taki den bakaman fu en preiki a boskopu disi gi ala sma (Mateyus 28:19, 20). Fa Yehovah Kotoigi du san Yesus taki?
1. Fa Mateyus 24:14 e kon tru na ini a ten disi?
Yesus ben taki: „A bun nyunsu disi fu a Kownukondre o preiki gi sma na heri grontapu” (Mateyus 24:14). Yehovah Kotoigi e du a prenspari wroko disi nanga prisiri. Na heri grontapu wi e preiki a bun nyunsu disi na ini moro leki 1000 tongo! Fu man du a bigi wroko disi wi musu wroko tranga èn sani musu orga bun. Wi no ben o man du a wroko disi sondro a yepi fu Yehovah.
2. O furu muiti wi e meki fu preiki gi sma?
Na ala presi pe wi kan feni sma, wi e go preiki. Neleki den Kresten na ini a ten fu den apostel, wi e go na sma oso fu preiki gi den (Tori fu den apostel 5:42). Fu di wi e go na ibri oso, meki wi kan taki nanga milyunmilyun sma ibri yari. Ma a no ala ten wi e miti sma na oso. Dati meki wi e go na tra presi tu pe furu sma de. Ala ten wi e suku okasi fu taki nanga sma fu Yehovah èn fu fruteri den san a o du.
3. Suma abi a frantwortu fu preiki a bun nyunsu?
Ala tru Kresten kisi a wroko fu preiki a bun nyunsu gi trawan. A wroko disi prenspari gi wi. Dati meki wi e preiki so furu leki wi man. Wi sabi taki sma kan lasi den libi efu wi no du dati. (Leisi 1 Timoteyus 4:16.) Nowan sma e pai wi fu du a wroko disi. Bijbel e taki: „Unu kisi sondro fu pai, sobun un musu gi sma sondro fu meki den pai” (Mateyus 10:7, 8). A no ala sma wani arki wi. Ma wi e tan preiki fu di wi wani gi yesi na Yehovah èn fu di wi wani taki a prisiri nanga wi.
SORTU TRA SANI YU KAN LERI?
Wi o si fa Yehovah Kotoigi e preiki na heri grontapu èn fa Yehovah e yepi den fu du a wroko disi.
Wi e preiki na heri grontapu: (A) Kosta Rika, (B) Amerkankondre, (C) Benin, (D) Thailand, (E) Yap, (F) Sweden
4. Wi e wroko tranga fu miti ala sma
Yehovah Kotoigi e meki muiti fu preiki a bun nyunsu gi sma na ala sei. Prei a FELEM èn taki fu den aksi disi:
Sortu muiti Yehovah Kotoigi e du fu preiki? Fa yu feni a sani dati?
Leisi Mateyus 22:39 nanga Romesma 10:13-15. Baka dati taki fu den aksi disi:
Fa a preikiwroko di wi e du e sori taki wi lobi tra sma?
Fa Yehovah e si den sma di e preiki a bun nyunsu?—Luku vers 15.
5. Wi e wroko makandra nanga Gado
Furu ondrofenitori e sori taki Yehovah e yepi wi nanga a wroko disi. Fu eksempre, Paul wan brada di e libi na ini Nyun Zeeland, ben miti wan uma di a ben preiki oso fu oso wan bakadina. A srefi mamanten dati, na uma disi ben begi Gado èn a ben kari en na en nen Yehovah. A ben aksi en fu seni wan sma kon na en oso. Paul taki: „Dri yuru baka di a begi, mi ben de na en mofodoro.”
Leisi 1 Korentesma 3:9 èn taki fu na aksi disi:
Fa den ondrofenitori soleki a wan fu Nyun Zeeland, e sori taki Yehovah e yepi wi fu feni sma te wi e du a preikiwroko?
Leisi Tori fu den apostel 1:8 èn taki fu na aksi disi:
Fu san ede wi abi a yepi fu Yehovah fanowdu fu man du a preikiwroko?
Yu ben sabi a sani disi?
Na a mindriwiki konmakandra di e hori ibri wiki wi e leri fa wi musu preiki. Efu yu go na wan fu den konmakandra disi kaba, dan fa yu ben feni a leri dati?
6. Wi e gi yesi na a komando fu Gado fu preiki
Na ini a ten fu den apostel, gensman ben wani tapu den bakaman fu Yesus fu preiki. Den Kresten disi du ala san den man fu ’meki lanti gi den a reti fu preiki’ a bun nyunsu (Filipisma 1:7). Yehovah Kotoigi e du a srefi sani na ini a ten disi.a
Leisi Tori fu den apostel 5:27-42 èn taki fu na aksi disi:
Fu san ede wi no o tapu fu preiki?—Luku vers 29, 38 nanga 39.
WAN SMA KAN AKSI YU: „Fu san ede Yehovah Kotoigi e go oso fu oso?”
San yu ben o piki?
SAN YU LERI?
Yesus ben taigi den bakaman fu en fu preiki a bun nyunsu gi sma na heri grontapu. Yehovah e yepi en pipel fu man du a wroko disi.
Fa yu ben o piki den aksi disi?
Fa a bun nyunsu e preiki na heri grontapu?
Fa a preikiwroko di wi e du e sori taki wi lobi sma?
Yu denki taki a preikiwroko na wan switi wroko fu du? Fu san ede yu piki so?
TRA SANI DI YU KAN LUKU
Na ini a felem disi yu o si fa Yehovah Kotoigi e preiki gi sma na ini bigi foto.
San Yehovah Kotoigi du fu yepi den loweman di kon tan na ini a kondre fu den?
Sma di suku kibri na tra kondre e kisi san den abi fanowdu na yeyefasi (5:59)
Na ini a felem disi wan sisa e fruteri fa a du a preikiwroko en heri libi langa èn fa a e prisiri fu du a wroko disi.
Na ini a kapitel disi yu kan leisi fu wan tu prenspari krutu afersi di wi wini èn di meki en moro makelek gi wi fu preiki a bun nyunsu.
„Kownukondre preikiman go na krutubangi” (Gado Kownukondre e tiri!, kapitel 13)
a Na Gado gi wi a wroko disi. Dati meki Yehovah Kotoigi no abi a primisi fu lanti fanowdu fu preiki a bun nyunsu.