LES 34
Fa wi kan sori taki wi lobi Yehovah?
Yu kon lobi Gado moro sensi yu bigin studeri Bijbel? Yu wani tron wan moro bun mati fu en? Efu dati de so, dan hori na prakseri taki te Yehovah e si taki yu kon abi moro lobi gi en, dan en srefi o lobi yu moro èn a o sorgu yu. Fa yu kan sori en taki yu lobi en?
1. Fa wi kan sori Yehovah taki wi lobi en?
Te wi e gi yesi na Yehovah, dan wi e sori taki wi lobi en. (Leisi 1 Yohanes 5:3.) A no e dwengi nowan sma fu gi yesi na en. Ma a e gi ala sma na okasi fu bosroiti efu den o gi yesi na en. Fu san ede? Yehovah wani taki wi ’gi yesi na en nanga wi heri ati’ (Romesma 6:17). Sobun, a no wani taki yu gi yesi na en fu di yu musu du dati, ma fu di yu lobi en. Na ini Pisi 3 nanga 4 fu a buku disi yu o si fa yu kan sori taki yu lobi Yehovah. Yu o kon sabi san Yehovah lobi èn san a no lobi.
2. Fu san ede a kan muilek fu sori taki wi lobi Yehovah?
„A reti-ati sma abi furu problema” (Psalm 34:19). Wi alamala e feti nanga den swakifasi fu wi. Èn kande wi abi moni problema, kande sma du ogri nanga wi noso wi abi tra problema. Te wi abi problema, dan a kan muilek gi wi fu du san Yehovah e aksi fu wi. Son leisi a moro makelek fu du sani di no bun. Ma te yu e pruberi fu gi yesi na Yehovah ala ten, dan yu e sori taki yu lobi en moro ala tra sani. Yu e sori tu taki yu wani dini en fu ala ten. Te yu e du dati, dan noiti a o gowe libi yu.—Leisi Psalm 4:3.
SORTU TRA SANI YU KAN LERI?
Wi o si fu san ede Yehovah e breiti te wi e gi yesi na en èn wi o si san kan yepi wi fu tan gi yesi na en.
3. Wan tori di abi fu du nanga yu
Na ini a Bijbel buku Yob, wi kan leisi sortu ogri Satan taki fu Yob nanga ala tra sma di wani dini Yehovah. Leisi Yob 1:1, 6–2:10. Baka dati taki fu den aksi disi:
San Satan taki fu Yob èn san a ben wani sori nanga a sani dati?—Luku Yob 1:9-11.
San Satan taki fu ala libisma èn fu yu tu?—Luku Yob 2:4.
Leisi Yob 27:5b èn taki fu na aksi disi:
Fa Yob sori taki a ben lobi Yehovah?
Yob tan gi yesi na Yehovah fu di a ben lobi en
Te wi lobi Yehovah wi o tan gi yesi na en
4. Meki Yehovah prisiri
Leisi Odo 27:11 èn taki fu den aksi disi:
Fa Yehovah e firi te wi e teki koni bosroiti èn te wi e gi yesi na en? Fu san ede a e firi so?
5. Yu kan tan gi yesi na Yehovah awinsi a muilek
Fu di wi lobi Yehovah meki wi e fruteri trawan fu en. Wi e du disi awinsi a no makelek. Prei a FELEM èn taki fu den aksi disi:
Yu feni en muilek son leisi fu fruteri tra sma fu Yehovah?
San yepi Grayson fu no frede moro?
A moro makelek fu gi yesi na Yehovah te wi lobi san a lobi èn te wi no lobi san a no lobi. Leisi Psalm 97:10 èn taki fu den aksi disi:
Te yu e prakseri den sani di yu leri te nanga now, dan san na wan tu sani di Yehovah lobi? San na wan tu sani di a no lobi?
Fa yu kan leri fu lobi san bun èn fu no lobi san no bun?
6. A e tyari wini kon gi wi te wi e gi yesi na Yehovah
Ala ten a bun fu gi yesi na Yehovah. Leisi Yesaya 48:17, 18 èn taki fu den aksi disi:
Yu e bribi taki ala ten Yehovah sabi san bun gi wi? Fu san ede yu e taki dati?
Sortu wini yu feni sensi yu bigin studeri Bijbel èn sensi yu kon sabi a tru Gado Yehovah?
SON SMA E TAKI: „Gado no e span nanga san mi e du.”
Sortu tekst yu ben o gebroiki fu sori a sma taki den sani di wi e du kan meki Yehovah prisiri noso taki den kan meki a sari?
SAN YU LERI?
Yu kan sori Yehovah taki yu lobi en te yu e gi yesi na en èn te yu e tan du dati awinsi a muilek.
Fa yu ben o piki den aksi disi?
San yu leri fu na eksempre fu Yob?
Fa yu o sori taki yu lobi Yehovah?
San o yepi yu fu tan gi yesi na Yehovah?
TRA SANI DI YU KAN LUKU
Na ini a felem disi yu o si fa yu kan tan gi yesi na Yehovah èn fa yu kan horibaka gi a gemeente.
„Te sma e tai hori na yu, dan yusrefi o tai hori na den” (16:49)
Na ini a brochure disi yu kan leisi sortu ogri Satan taki fu libisma.
„Yob e tan du san reti” (San na a boskopu fu Bijbel? pisi 6)
Na ini a felem disi yu o si fa pikin-nengre srefi kan sori taki den lobi Yehovah.
Fa wan yonguwan kan tan gi yesi na Yehovah awinsi tra yonguwan e dwengi en fu du sani di no bun?