LES 37
San Bijbel e taki fu wroko nanga moni?
Oiti yu broko yu ede nanga moni noso wroko? Son leisi a wroko fu wi kan meki en muilek gi wi fu dini Yehovah soleki fa a wani. Bijbel abi rai di kan yepi wi.
1. San Bijbel e taki fu wroko?
Gado wani taki wi prisiri nanga a wroko di wi e du. Bijbel e taki dati ’a moro bun sani di wan libisma kan du na fu prisiri nanga a tranga wroko fu en’ (Preikiman 2:24). Yehovah e wroko tranga. Te wi e wroko tranga neleki en, dan a o breiti nanga wi èn wi o firi bun.
Wroko prenspari. Ma noiti a musu kon prenspari moro na anbegi fu Yehovah (Yohanes 6:27). A pramisi wi taki te wi poti a wani fu en na a fosi presi a o gi wi san wi abi fanowdu.
2. Fa wi musu si moni?
Bijbel e taigi wi taki „moni e kibri sma”, ma a e warskow wi tu taki moni wawan no kan meki wi de koloku (Preikiman 7:12). Dati meki wi e kisi a deki-ati fu no lobi moni, ma fu ’breiti nanga den sani di wi abi now’. (Leisi Hebrewsma 13:5.) Te wi de tevrede nanga san wi abi, dan wi no o stress fu di wi feni taki wi abi moro fanowdu. Wi no o meki paiman di no de fanowdu (Odo 22:7). Wi no o dòbel èn sma no o man kori wi fu poti wi moni na ini bisnis soso fu kon gudu esi-esi.
3. Fa wi kan gebroiki wi moni fu yepi trawan?
Yehovah na wan Gado di lobi fu gi sma sani. Neleki en wi ’lobi fu gi sma sani èn wi de klariklari fu prati san wi abi nanga trawan’ (1 Timoteyus 6:18). Wi kan gebroiki wi moni fu horibaka gi a gemeente èn fu yepi tra sma di de na nowtu, spesrutu den brada nanga sisa fu a gemeente. Yehovah no e luku o furu wi e gi, ma a e luku fu san ede wi e gi. Te wi e gi sma sani nanga wi heri ati, dan wi o de koloku èn Yehovah o breiti nanga wi.—Leisi Tori fu den apostel 20:35.
SORTU TRA SANI YU KAN LERI?
Wi o si fu san ede a bun fu wroko tranga èn fu san ede a wroko fu wi no musu prenspari moro na anbegi fu Yehovah. Wi o si tu fu san ede wi musu de tevrede nanga san wi abi.
4. A fasi fa yu e du yu wroko kan gi Yehovah grani
Te wi nanga Yehovah na mati, dan wi o si wroko neleki fa en e si en. Prei a FELEM èn taki fu den aksi disi:
San yu lobi fu a fasi fa Jason ben e wroko nanga a fasi fa a ben e tyari ensrefi na wrokope?
Fa a ben man sorgu taki en wroko no ben e tapu en fu dini Yehovah?
Leisi Kolosesma 3:23, 24 èn taki fu na aksi disi:
Fu san ede a prenspari fu wroko tranga?
Wroko prenspari. Ma noiti a wroko fu wi musu kon prenspari moro na anbegi fu Yehovah
5. Te wi de tevrede, dan wi o de koloku
Furu sma e suku ala sortu fasi fu kon abi moro moni. Ma Bijbel e taki dati wi musu de tra fasi. Leisi 1 Timoteyus 6:6-8 èn taki fu na aksi disi:
Sortu rai Bijbel e gi wi?
Wi man de koloku awinsi wi no abi furu. Prei a FELEM èn taki fu na aksi disi:
Fu san ede den osofamiri na ini a felem de koloku aladi den no abi furu moni?
Kon meki wi taki dati wi abi furu, ma toku wi wani moro. Yesus ben sori fu san ede a sani dati no bun. Leisi Lukas 12:15-21 èn taki fu na aksi disi:
San yu leri fu na agersitori fu Yesus?—Luku vers 15.
Leisi Odo 10:22 nanga 1 Timoteyus 6:10. Baka dati taki fu den aksi disi:
A moro prenspari gi yu fu de wan mati fu Yehovah noso fu abi furu moni? Fu san ede yu piki so?
Sortu problema wan sma e kisi te a e feti baka moni?
6. Yehovah o gi wi san wi abi fanowdu
Te wi abi moni problema noso te a wroko fu wi e meki en muilek gi wi fu dini Yehovah, dan wi musu sori taki wi e frutrow en. Prei a FELEM fu si san kan yepi yu te yu abi den sortu problema disi. Baka dati taki fu den aksi disi:
Sortu problema a brada na ini a felem ben abi?
San a du fu pasa den tesi disi?
Leisi Mateyus 6:25-34 èn taki fu na aksi disi:
San Yehovah pramisi den wan di e poti a wani fu en na a fosi presi?
SON SMA E TAKI: „Mi abi fu wroko tranga fu sorgu mi osofamiri. Mi no o man go na den konmakandra ala wiki.”
Sortu Bijbeltekst e sori taki ala ten a bun fu poti na anbegi fu Yehovah na a fosi presi? Yu e bribi a sani disi?
SAN YU LERI?
Ala sma musu wroko èn wi abi moni fanowdu, ma noiti den sani disi musu tapu wi fu dini Yehovah.
Fa yu ben o piki den aksi disi?
San kan yepi yu fu si wroko leki fa Yehovah e si en?
Fu san ede a bun fu de tevrede?
Fa yu kan sori taki yu e bribi taki Yehovah o gi en pipel san den abi fanowdu?
TRA SANI DI YU KAN LUKU
Na ini na artikel disi yu o si efu Bijbel e taki dati moni no bun.
Na ini na artikel disi wi o si fa wi kan gebroiki wi moni na wan fasi di Gado feni bun.
„San Bijbel e taki fu a gi di yu e gi sma sani?” (Web-artikel)
A fowtu fu dòbel?
Na ini na artikel disi yu o si san yepi wan man fu no dòbel èn fu no fufuru moro.