LES 58
Tan na Yehovah sei
Tru Kresten no e meki nowan sani èn nowan sma tapu den fu dini Yehovah. Wi de seiker taki na so yu e firi tu. Yehovah lobi den sma di e tan dini en awinsi san e pasa. (Leisi 1 Kroniki 28:9.) San kan meki en muilek gi yu fu tan dini Yehovah? Ma san kan yepi yu fu tan na en sei?
1. Fa tra sma kan meki wi stop dini Yehovah?
Son sma wani tapu wi fu dini Yehovah. Suma na den sma disi? Son sma di ben e dini Yehovah fosi e fruteri lei fu Gado en organisâsi fu di den wani swaki wi bribi. Yu abi son kerki fesiman tu di e fruteri lei fu wi di kan meki taki den wan di no de na ai gowe libi Yehovah. Noiti wi musu haritaki nanga den sma disi, leisi den buku fu den, go tapu den website noso luku den felem fu den. Luku san Yesus ben taki fu den sma di wani tapu trawan fu dini Yehovah: „Libi den. Den sma disi e sori trawan a pasi, ma den srefi breni. Fu dati ede efu wan breniman musu sori wan tra breniman a pasi, dan den ala tu o fadon go na ini wan peti.”—Mateyus 15:14.
2. Fa den bosroiti di wi e teki e sori taki wi wani tan na a sei fu Yehovah?
Te wi lobi Yehovah, dan wi no o moksi nanga falsi bribi. Sobun, a presi pe yu e wroko noso a wroko di yu e du no musu abi noti fu du nanga falsi bribi. Wi no musu de wan memre tu fu wan organisâsi di de fu wan falsi kerki èn wi no musu horibaka gi nowan sani di falsi kerki e orga. Yehovah e warskow wi: ’Komoto na ini [Babilon a Bigiwan] mi pipel.’—Openbaring 18:2, 4.
SORTU TRA SANI YU KAN LERI?
Wi o si fa yu kan sorgu taki nowan sma meki yu stop dini Yehovah. Wi o si tu fu san ede yu musu komoto na ini Babilon a Bigiwan.
3. Luku bun nanga sma di e fruteri lei fu Yehovah nanga en organisâsi
San wi musu du efu wi e yere taki sma e taki ogri fu Yehovah en organisâsi? Leisi Odo 14:15 èn taki fu na aksi disi:
Fu san ede wi no musu bribi ala san wi e yere?
Leisi 2 Yohanes 9-11 èn taki fu den aksi disi:
San wi musu du efu wi e miti nanga sma di ben e dini Yehovah fosi èn di e fruteri lei fu en organisâsi?
Kande yu no e miti nanga den sortu sma disi. Ma na sortu tra fasi den e panya den leri fu den?
Fa yu denki Yehovah o firi efu wi e arki sma di e taki ogri fu en nanga en organisâsi?
4. Fa yu kan sori taki yu e teki a sei fu Yehovah te wan brada noso wan sisa sondu?
Efu wi sabi taki wan sma na ini a gemeente du wan seryusu sondu, dan san wi musu du? Luku san wi kan leri fu wan fu den wet di Gado ben gi den Israelsma. Leisi Lefitikus 5:1.
Soleki fa a tekst e sori, dan efu wi sabi taki wan sma du wan seryusu sondu, dan wi musu taigi den owruman san wi sabi. Ma fosi wi du dati, wi kan gi a sma deki-ati fu ensrefi go taki nanga den owruman. Na so wi e sori a sma taki wi e suku a bun fu en. Efu a sma no du dati, dan wi musu sori taki wi e teki a sei fu Yehovah èn wi musu go taigi den owruman san wi sabi. Te wi e du dati, dan fa wi e sori lobi gi . . .
Yehovah Gado?
a sma di sondu?
den tra sma na ini a gemeente?
Efu yu si taki wan brada noso sisa e du wan sani di kan pori en matifasi nanga Yehovah, dan yepi en!
5. Tan fara fu Babilon a Bigiwan
Leisi Lukas 4:8 nanga Openbaring 18:4, 5. Baka dati taki fu den aksi disi:
A kerki pe mi ben de fosi sabi taki mi no wani de wan memre moro?
Mi de na ini wan organisâsi di de fu wan kerki?
A wroko di mi e du e horibaka gi falsi kerki?
Tra sani de ete di mi musu kenki fu sori taki mi no wani abi noti fu du nanga falsi kerki?
Efu mi piki ’Iya’ tapu iniwan fu den aksi disi, dan sortu kenki mi musu tyari kon?
Awinsi san yu musu du ete, teki wan bosroiti di o meki taki yu abi wan krin konsensi èn di e sori taki yu e teki a sei fu Yehovah.
San yu o du efu wan sma e aksi yu fu gi wan bijdrage gi wan kerki?
SON SMA E TAKI: „Mi musu sabi sortu lei den sma di no e dini Yehovah moro e taki fu en organisâsi. Te mi miti nanga wan sma di e bribi den lei dati, dan mi sabi san mi musu taigi en.”
Yu denki taki dati ben o de wan koni sani fu du? Fu san ede yu piki so?
SAN YU LERI?
Efu wi wani tan na Yehovah sei, dan wi no musu moksi nanga sma di e pruberi fu kori wi.
Fa yu ben o piki den aksi disi?
Fu san ede wi no musu arki den sani fu sma di ben e dini Yehovah fosi, ma di e fruteri lei fu en organisâsi now?
San wi musu du efu wi kon ferstan taki wan brada noso wan sisa du wan seryusu sondu?
San wi musu du fu komoto na ini falsi bribi?
TRA SANI DI YU KAN LUKU
Na ini na artikel disi yu o si san yu kan du te sma e fruteri lei fu Yehovah Kotoigi.
„Fa yu kan sabi efu wan tori tru?” (A Waktitoren, augustus 2018)
Fa yu kan kon sabi efu wan organisâsi noso wan sani di yu e du e horibaka gi Babilon a Bigiwan?
„Wi musu abi furu fu du na a kaba fu ’den lasti dei’” (A Waktitoren, oktober 2019, paragraaf 16-18)
San son gensman du fu swaki a bribi fu wi?
Na ini na artikel „Mi ben suku Gado sensi di mi ben de wan pikin” yu kan leisi fa wan Syinto priester ben komoto na ini falsi bribi.