LES 01
Fa Bijbel kan yepi yu fu abi wan moro bun libi?
Wi alamala wani sabi fu san ede wi de na grontapu, fu san ede wi e pina, fu san ede wi e dede èn san o pasa na ini a ten di e kon. Wi e broko wi ede tu fa wi kan meki nofo moni fu sorgu wisrefi èn fa wi kan abi wan koloku osofamiri. Bijbel yepi furu sma fu feni piki tapu den prenspari aksi fu a libi. Den rai na ini Bijbel yepi den tu fu abi wan bun libi. Bijbel kan yepi ala sma.
1. San na wan tu aksi di Bijbel e piki?
Bijbel e piki den prenspari aksi disi: Fa a libi bigin? Fu san ede wi de na grontapu? Fu san ede bun sma e pina? San e pasa te wan sma dede? Efu ala sma wani freide, dan fu san ede so furu feti de? San o pasa nanga grontapu na ini a ten di e kon? Bijbel e gi wi deki-ati fu suku den piki tapu den aksi disi. Furu sma breiti nanga den piki di den feni na ini Bijbel.
2. Fa Bijbel kan yepi wi fu abi wan bun libi?
Bijbel abi bun rai. Fu eksempre, a e sori fa osofamiri kan de koloku. A e sori san wi kan du te wi abi stress èn fa wi kan du wi wroko nanga prisiri. Te yu o studeri a buku disi, dan yu o kon sabi san Bijbel e taki fu den tori disi èn fu tra tori. Yu o kon si taki „ala den sani di de na ini Gado Buku” e tyari wini kon gi yu.—2 Timoteyus 3:16.
A buku disi no e teki a presi fu Bijbel. Ma a meki fu yepi yu fu ondrosuku Bijbel. Dati meki wi e gi yu deki-ati fu leisi den Bijbeltekst di de na ini den les èn fu luku fa den e piki den aksi na ini den les.
SORTU TRA SANI YU KAN LERI?
Wi o si fa Bijbel yepi sma, fa yu kan kon lobi leisi en èn fu san ede a bun taki wan sma e yepi yu fu frustan en.
3. Bijbel kan sori wi a pasi
Bijbel de leki wan flashlight. Neleki fa wan flashlight kan yepi wi fu si pe wi e go te a dungru, na so Bijbel kan yepi wi fu teki bun bosroiti èn fu kon sabi san o pasa na ini a ten di e kon.
Leisi Psalm 119:105 èn taki fu den aksi disi:
Fa a skrifiman fu a psalm disi ben e si Bijbel?
Fa yu e si Bijbel?
4. Bijbel kan piki den aksi di wi abi
Wan uma ben sidon nanga wan tu aksi omeni yari langa, ma Bijbel piki den aksi fu en. Prei a FELEM èn taki fu den aksi disi:
Sortu aksi na uma na ini a felem ben abi?
Fa a kisi yepi di a studeri Bijbel?
Bijbel e gi wi deki-ati fu poti aksi. Leisi Mateyus 7:7 èn taki fu den aksi disi:
Sortu aksi yu abi? Yu wani sabi fa Bijbel e piki den aksi dati?
5. A kan gi yu prisiri fu leisi Bijbel
Furu sma lobi leisi Bijbel èn a e yepi den furu. Prei a FELEM èn taki fu den aksi disi:
Fa den yonguwan na ini a felem feni en fu leisi?
Awinsi den no lobi leisi, fu san ede den lobi leisi Bijbel?
Bijbel kan trowstu wi èn a e gi wi howpu. Leisi Romesma 15:4 èn taki fu na aksi disi:
Yu wani kon sabi fa Bijbel kan trowstu yu èn fa a kan gi yu howpu?
6. Tra sma kan yepi wi fu frustan Bijbel
Furu sma di e leisi Bijbel kon si taki den kon frustan en moro bun di tra sma yepi den. Leisi Tori fu den apostel 8:26-31 èn taki fu na aksi disi:
Fa wi kan kon frustan Bijbel?—Luku vers 30 nanga 31.
A man fu Etiopia ben abi yepi fanowdu fu frustan san a ben e leisi. Furu sma na ini a ten disi kon frustan Bijbel moro bun di tra sma yepi den
SON SMA E TAKI: „Studeri Bijbel na lasi ten.”
Fa yu ben o piki den? Fu san ede?
SAN YU LERI?
Bijbel abi rai di kan yepi yu fu abi wan bun libi, a kan yepi yu fu feni piki tapu prenspari aksi, a kan trowstu yu èn a kan gi yu howpu.
Fa yu ben o piki den aksi disi?
Sortu rai wi kan feni na ini Bijbel?
San na wan tu aksi di Bijbel e piki?
Sortu tra sani fu Bijbel yu wani kon sabi?
TRA SANI DI YU KAN LUKU
Bijbel abi rai di kan yepi wi na ini a ten disi.
Luku fa Bijbel yepi wan man di ben firi leki a no warti noti sensi a ben pikin.
Ondrosuku sortu rai Bijbel abi gi na osofamiri.
„12 sani di e yepi wan osofamiri fu de koloku” (Ontwaakt! Nr. 2 2018)
Bijbel e sori suma e tiri grontapu trutru.