Watra-ai na ini wan leer-saka
A YONKUMAN ben de wan loweman. A ben abi furu broko-ede èn a no ben sabi san fu du. Nanga ai di furu nanga watra, a aksi Yehovah, a Gado fu en, fu sori en switifasi nanga sari-ati. A begi Gado: „Grantangi, poti den watra-ai fu mi na ini a leer-saka fu yu” (Psalm 56:8). A yonkuman dati ben de David, di ben o tron kownu fu Israel bakaten. Ma san ben de a leer-saka dati, èn fa Gado kan poti den watra-ai fu wi na ini wan leer-saka?
David ben sabi san na wan leer-saka. A leer-saka ben de wan sani di sma ben gebroiki fu poti watra, oli, win, noso srefi botro na ini. Den sma di e froisi fu a wan presi go na a tra presi na ini a Sahara, soleki den Tuaregsma, e gebroiki leer-saka te now ete. Sma ben gebroiki a heri buba fu a skin fu wan krabita noso wan skapu fu meki den saka disi. Efu a meti ben bigi, dan furu watra kan go na ini den sortu saka disi. Furu sma sabi taki watra e tan kowru te yu e poti en na ini wan leer-saka, srefi efu a saka de na ini bun faya son. Fositen, sma ben poti den saka disi nofo tron na tapu buriki noso kameili fu tyari den. Na ini a ten disi, sma drape e poti leer-saka srefi na tapu den wagi.
Den tumusi moi wortu di David taki fu a leer-saka, kan gi wi deki-ati tu. Na sortu fasi? We, Bijbel e taki dati Satan e tiri a grontapu disi èn na ini a ten fu wi a abi „bigi atibron”. Leki bakapisi fu dati, sma na grontapu e kisi fu du nanga furu problema (Openbaring 12:12). Fu dati ede, neleki David, yu abi furu sma di e sari, di abi broko-ede, noso di e siki. Furu fu den sma di e kisi fu du nanga den sani disi, na sma di e pruberi fu plisi Gado. Na so a de nanga yu tu? Den sma di e pruberi fu plisi Gado abi deki-ati, èn son leisi ’den e krei srefi’, fu di den e du ala san den man fu tan gi yesi na Gado awansi san e pasa (Psalm 126:6). Den sma disi abi a dyaranti taki den Tata na hemel e si sortu tesi den e kisi. Boiti dati, a sabi fa den futuboi fu en e firi te den e kisi tesi èn te den e nyan pina. A abi sari-ati gi den, èn a no e frigiti den watra-ai fu den te den e sari. Na agersi fasi a e poti den watra-ai fu den na ini a leer-saka fu en.