San Bijbel e taki fu a tori
Na Gado e strafu yu te yu e kisi problema?
„Mi e firi leki na Gado e strafu mi”, na so wan uma di pasa 50 yari taki, di a kon sabi taki a abi kanker. A e prakseri wan ogri di a ben du furu yari pasa, èn a taki: „A musu fu de so taki Gado e sori mi na a fasi disi taki mi sondu.”
TE SMA e kisi problema, dan furu fu den e denki taki na Gado e strafu den gi den ogri di den ben du. Den no sabi san fu du te den e kisi furu problema wantronso, èn den e kragi: „Fu san ede den sani disi musu miti mi? San mi du taki den sani disi pasa nanga mi?” Wi musu denki taki den problema fu wi e sori taki Gado no feni wi bun? A de so trutru taki na Gado e strafu wi te wi e kisi problema?
Anbegiman fu Gado ben kisi problema
Luku san Bijbel e taki fu wan man di nen Yob. Sondro fu kisi warskow na fesi, a lasi ala en gudu wantronso. Baka dati, ala den tin pikin fu en dede na ini wan tranga winti. Syatu baka dati, wan takru siki naki en (Yob 1:13-19; 2:7, 8). Den problema disi ben meki Yob bari taki: „Gado e kwinsi mi nanga en anu” (Yob 19:21). Neleki furu sma na ini a ten disi, na so Yob ben feni taki na Gado e strafu en.
Ma Bijbel e sori taki fosi Yob kisi den problema fu en, Gado srefi ben taki fu en dati a de „wan bun man di lobi retidu, di abi frede gi Gado, èn di no e du ogri” (Yob 1:8). Den wortu disi e sori krin taki a no Gado ben e meki den sani dati miti Yob fu di a ben wani strafu en.
Soleki fa a sori, Bijbel abi furu tori fu sma di ben e dini Gado, èn di ben kisi problema. Aladi Yosef ben de wan futuboi fu Gado, toku a ben de na strafu wan tu yari, sondro taki a ben du wan sani (Genesis 39:10-20; 40:15). Timoteyus, di ben de wan Kresten, ben e „siki so furu” (1 Timoteyus 5:23). Srefi Yesus Krestes di noiti no ben du wan ogri, ben nyan furu pina fosi a dede na wan ogri-ati fasi (1 Petrus 2:21-24). Fu dati ede, a de wan fowtu sani fu denki taki den problema fu wi e sori taki Gado no feni wi bun. Ma efu a no Gado e meki wi kisi problema, dan suma e du dati?
Fa a du kon taki wi e kisi problema?
Bijbel e sori taki na Satan Didibri ben meki rampu miti Yob (Yob 1:7-12; 2:3-8). Boiti dati, a e sori taki na Satan na a moro prenspari sma di e meki wi kisi problema na ini a ten disi. Bijbel e taki:„Helu fu grontapu èn fu a se, bika Didibri saka kon na unu èn a abi bigi atibron fu di a sabi taki en ten syatu” (Openbaring 12:12). Leki „a tiriman fu a grontapu disi”, Satan e gi sma deki-ati fu du ogri-ati sani, èn disi e meki taki so furu problema nanga sari de.—Yohanes 12:31; Psalm 37:12, 14.
Ma wi no musu de gaw fu denki taki na Didibri e meki wi kisi ala den problema di wi abi. Fu di wi na sondusma, meki nofo tron wi e teki don bosroiti di kan meki wi kisi problema (Psalm 51:5; Romesma 5:12). Fu eksempre, kon meki wi taki dati fu espresi wan man no e nyan bun, èn a no e rostu nofo. Efu a sani disi meki taki a kon siki seryusu te fu kaba, dan a kan taki dati na Didibri du dati nanga en? Nôno, a man kisi fu du nanga den takru bakapisi fu a sani di a du (Galasiasma 6:7). Na ini den sortu situwâsi disi, a de soleki fa wan Bijbel odo e taki: „A donfasi fu wan libisma e bruya a pasi fu en.”—Odo 19:3.
Wi musu kon frustan tu taki furu fu den sari sani di e miti wi e kon fu di „ten nanga sani di e pasa sondro fu sma fruwakti dati” e miti ala sma (Preikiman 9:11). Kon meki wi taki dati wan sma de na dorosei te wan hebi alen kon wantronso. A presi pe a sma e tanapu te na alen e bigin fadon, o meki a sma nati pikinso noso a o nati petepete. Na so a de tu taki na ini den ’muilek ten disi di tranga fu pasa’, wi kan kisi furu problema wantronso, fu di sani no e go bun na grontapu (2 Timoteyus 3:1-5). Nofo tron a presi pe wi de na wan spesrutu momenti, o meki taki wi kisi fu du nanga son problema. Èn nofo tron wi no man du noti fu sorgu taki den sani disi no pasa. A sani disi wani taki dati ala ten wi o kisi fu du nanga problema?
Heri esi nowan problema o de moro
Koloku taki Yehovah Gado o meki taki heri esi nowan problema o de moro (Yesaya 25:8; Openbaring 1:3; 21:3, 4). Fosi a ten dati doro, Gado e sori taki a e broko en ede nanga wi, fu di a e „leri” wi, èn wi e kisi ’trowstu fu Gado Buku’. Na so fasi wi kan horidoro now te tesi e miti wi, aladi wi e wakti a moi ten di e kon (Romesma 15:4; 1 Petrus 5:7). Na a ten dati, den sma di e du san reti na ini Gado ai, sa libi fu têgo na ini wan nyun grontapu, sondro fu abi wan problema.—Psalm 37:29, 37.
YU AKSI YUSREFI A SANI DISI?
◼ Na soso sma di du ogri e kisi problema?—Yob 1:8.
◼ Wi musu denki taki na Didibri e meki wi kisi ala problema di wi abi?—Galasiasma 6:7.
◼ Den problema fu wi o tan fu ala ten?—Openbaring 21:3, 4.
[Prenspari pisi na tapu bladzijde 31]
„Ten nanga sani di e pasa sondro fu sma fruwakti dati, e miti den alamala.”—Preikiman 9:11