Fa yu kan abi wan koloku osofamiri libi?
Fa fu pasa a fosi yari fu a trowlibi
A masra e taki: „A e fruwondru mi fu si taki mi nanga mi wefi e difrenti so fu makandra! Fu eksempre, mi lobi fu opo fruku mamanten, ma en lobi fu go sribi lati. Wan sani di mi no man frustan tu, na taki ibri leisi baka a e firi tra fasi, dan a e sari, dan a e prisiri, dan en ati e bron! Wan tra sani di mi no lobi, na taki te mi e bori, dan ala yuru a e taki dati mi no du wan sani bun, spesrutu te mi e figi mi anu na a duku.”
A wefi e taki: „Mi masra no lobi taki furu. Ma soleki fa mi gwenti nanga mi famiri, dan wi ben e taki furu, spesrutu te wi ben e nyan. Èn te mi masra e bori, dan a srefi duku di a e gebroiki fu drei den preti, a e gebroiki fu figi en anu! Mi no man frudrage a sani dati! Fu san ede mansma muilek so? San sma e du fu abi wan bun trowlibi?”
EFU yu trow no so langa pasa, dan yu ondrofeni densrefi sortu problema disi? A gersi leki wantronso yu trowpatna e meki fowtu èn taki a e du pikinpikin fruferi sani, di a no ben e du di unu ben e hori nanga makandra? „Sma di trow o kisi fu du nanga aladei problema”, ma san yu kan du so taki den problema dati no abi so furu krakti na yu tapu?—1 Korentesma 7:28, Today’s English Version.
A fosi sani di yu musu hori na prakseri, na taki a no fu di unu trow, meki taki yu nanga yu trowpatna o sabi wantewante fa fu abi wan bun trowlibi. Kande yu leri fa fu handri bun nanga trawan di yu no ben trow ete, èn kande den fasi dati kon moro bun di yu ben e hori nanga yu patna. Aladi yu abi den fasi dati kaba, toku na ini a trowlibi yu o abi fu wroko na den fasi dati èn kande yu o abi fu leri fu du sani tra fasi tu. Yu o meki fowtu? Iya, dati o pasa. Yu o man leri fa fu du sani na wan fasi di o meki yu trowlibi bun? Iya, seiker!
A moro bun fasi fa yu kan leri fu du sani moro bun, na fu suku rai na wan sma di sabi ala sani fu a trowlibi èn fu fiti den rai di a e gi. A moro bun sma di sabi a trowlibi, na Yehovah Gado. Fu taki en leti, en na a Sma di meki wi na so wan fasi taki wi wani trow (Genesis 2:22-24). Luku fa en Wortu, Bijbel, kan yepi yu fu lusu problema èn fu leri fa fu handri so taki yu kan pasa a fosi yari fu yu trowlibi.
1. LERI FU AKSI YU TROWPATNA FA A E DENKI FU WAN TORI
San na a problema?
Keiji,a wan masra di e libi na ini Yapan, ben e teki bosroiti son leisi sondro fu prakseri en wefi. A e taki: „Te sma ben e gi wi wan kari, dan mi ben teki a kari dati sondro fu taki fosi nanga mi wefi. Bakaten, mi ben kon si taki mi wefi no ben man go.” Allen, wan masra na ini Australia, e taki: „Mi no ben feni taki a fiti dati wan man e aksi en wefi fa a e denki fu wan sani fosi a teki wan bosroiti.” A sani disi ben muilek gi en fu di na so a ben kweki. Na so a ben de tu nanga Dianne, di e libi na ini Ingrisikondre. A e taki: „Mi gwenti fu aksi mi famiri rai. Sobun, na a bigin fosi mi ben teki wan bosroiti, dan mi ben e aksi mi famiri rai na presi fu mi masra.”
San na a lusu?
Hori na prakseri, taki Yehovah Gado e si wan trowpaar leki „wán skin” (Mateyus 19:3-6). Gi Yehovah, a fasi fa yu de nanga yu trowpatna prenspari moro leki a fasi fa yu de nanga iniwan tra sma, sosrefi yu krosibei famiri nanga mati. Fu tan de bun nanga makandra, a de tumusi prenspari taki unu e taki bun.
Wan masra nanga wan wefi kan leri furu fu a fasi fa Yehovah Gado ben taki nanga Abraham. Fu eksempre, grantangi leisi a takimakandra di skrifi na Genesis 18:17-33. Luku taki Gado ben e gi grani na Abraham na dri fasi. (1) Yehovah ben taigi en san a ben abi na prakseri fu du. (2) A ben e arki di Abraham ben taki fa en ben e si a tori. (3) Efu a ben fiti, dan Yehovah ben de klariklari fu handri na wan tra fasi fu du san Abraham ben aksi en. Fa yu kan handri na a srefi fasi te yu e taki nanga yu trowpatna fosi yu teki wan bosroiti?
PRUBERI FU DU DISI: Te yu e taki fu wan sani nanga yu trowpatna, fosi yu teki wan bosroiti, dan (1) fruteri en san yu ben o wani du na ini a situwâsi dati, ma taki na wan fasi di no e meki yu patna firi taki a bosroiti teki kaba èn taki a musu agri nanga yu. (2) Aksi yu patna fu taki fa a e denki fu a tori, èn hori na prakseri taki a abi a reti fu si sani na wan tra fasi. (3) Meki yu patna ’kon sabi taki yu de klariklari fu fiti yusrefi’, fu di yu o du san a wani te dati kan.—Filipisma 4:5.
2. LERI FU HORI DEN FIRI FU YU PATNA NA PRAKSERI
San na a problema?
Kande yu abi a gwenti fu taki krin fa yu e denki, sondro fu hori den firi fu yu patna na prakseri. Kande yu e du dati fu di na so yu kweki noso fu di na so a gwenti de na ini yu kulturu. Fu eksempre, Liam, di e libi na ini Europa, e taki: „Den sma fu a presi pe mi komoto, grofu. A fasi fa mi e taki, e meki taki nofo tron mi wefi e sari. Mi ben abi fu leri fu taki na wan switi fasi.”
San na a lusu?
No denki taki yu trowpatna wani taki yu taki nanga en na a srefi fasi leki fa yu gwenti taki (Filipisma 2:3, 4). A rai di na apostel Paulus ben gi wan zendeling, e fiti sosrefi gi sma di trow no so langa pasa. A ben skrifi: „Wan srafu fu Masra no abi fu meki trobi, ma a musu abi switifasi.” A Griki wortu di vertaal nanga „switifasi”, abi fu du tu nanga a „hori di wan sma musu hori den firi fu trawan na prakseri” (2 Timoteyus 2:24). Wan sma di e hori den firi fu trawan na prakseri, sabi fa fu handri na a yoisti fasi na ini wan spesrutu situwâsi èn fa fu sori switifasi, sondro fu afrontu trawan.
PRUBERI FU DU DISI: Te wan sani fu yu trowpatna e fruferi yu, dan prakseri fa yu ben o taki nanga wan bun mati noso nanga yu wrokobasi. Yu ben o taki na a srefi fasi nanga den leki fa yu ben o taki nanga yu trowpatna? Yu ben o gebroiki den srefi sortu wortu? Prakseri dan fu san ede yu patna frudini en taki yu e taki na wan moro lespeki fasi èn switifasi nanga en, leki nanga yu mati noso wrokobasi.—Kolosesma 4:6.
3. LERI FU FITI YUSREFI NA A NYUN FRANTWORTU DI YU ABI
San na a problema?
Na a bigin, wan masra kan tyari a frantwortu fu en leki edeman na wan fasi di e hati den firi fu en wefi. Boiti dati, wan wefi kande no abi a gwenti fu taki sani na wan fasi di e sori taki a e hori den firi fu en masra na prakseri. Fu eksempre, Antonio, wan masra na ini Italiakondre, e taki: „Pikinmoro noiti mi papa ben aksi mi mama fa a ben e denki fu wan sani, bifo a ben teki wan bosroiti na ini a famiri. Fu dati ede, na a bigin mi ben e plèi basi na ini mi osofamiri.” Debbie, wan wefi na ini Kanada, e taki: „Mi ben dwengi mi masra fu no libi sani didon na ala sei. Ma fu di mi ben plèi basi gi en, meki taki a no ben wani arki mi.”
San na a lusu gi wan masra?
Son masra no e frustan taki te Bijbel e taki dati wan wefi musu saka ensrefi na ondro en masra, dan dati no de a srefi leki te wan pikin musu gi yesi na en papa nanga mama (Kolosesma 3:20; 1 Petrus 3:1). Ma Bijbel e taki dati wan masra musu „tan nanga en wefi, èn a man nanga en wefi sa de wán skin”. Bijbel no e taki a srefi sani dati te a abi fu du nanga papa nanga mama èn den pikin (Mateyus 19:5). Yehovah e taki dati wan wefi e fiti na en masra (Genesis 2:18). Yehovah noiti no taki dati wan pikin e fiti na en papa nanga mama. Fa yu e denki fu a tori disi? Efu wan masra e handri nanga en wefi neleki en na wan pikin, dan a de so taki a e sori lespeki gi a trowlibi?
Fu taki en leti, Gado Wortu e gi yu a deki-ati fu handri nanga yu wefi na a srefi fasi leki fa Yesus e handri nanga a Kresten gemeente. Yu kan meki en moro makriki gi yu wefi fu si yu leki na edeman fu na osofamiri, te (1) yu no e fruwakti taki wantewante a o saka ensrefi na yu ondro, sondro problema, èn (2) te yu lobi en leki yu eigi skin, srefi te problema opo kon.—Efeisesma 5:25-29.
San na a lusu gi wan wefi?
Hori na prakseri taki now yu masra na yu edeman di Gado poti (1 Korentesma 11:3). Te yu e lespeki yu masra, dan yu e lespeki Gado. Te yu no e saka yusrefi na en ondro, dan yu e sori fa yu e denki trutru fu yu masra èn fu Gado nanga den markitiki fu en.—Kolosesma 3:18.
Te yu e taki nanga yu masra fu wan muilek problema, dan leri fu lusu a problema, na presi fu krutu a fasi fa a de. Fu eksempre, Umakownu Ester, ben wani taki en masra, Kownu Ahasferos, lusu wan problema. Na presi fu krutu en masra, Ester taki fa a ben e denki fu a tori, ma a no hati den firi fu en masra. En masra arki en èn te fu kaba a du a yoisti sani (Ester 7:1-4; 8:3-8). A o de moro makriki gi yu masra fu lobi yu trutru te (1) yu e gi en a ten fu sabi fa a musu tyari a frantwortu fu en leki edeman fu na osofamiri, èn te (2) yu e handri na wan lespeki fasi nanga en, srefi efu a e meki fowtu.—Efeisesma 5:33.
PRUBERI FU DU DISI: Kande yu feni taki yu patna musu kenki wan tu fasi fu en. Ma na presi fu luku dati nomo, a moro bun fu skrifi sortu fasi yu musu kenki. Masra: Te yu e hati den firi fu yu wefi nanga a fasi fa yu handri leki edeman, dan aksi en fa yu kan du en moro bun èn skrifi den sani dati. Wefi: Te yu masra feni taki yu no e sori lespeki gi en, dan aksi en fa yu kan du dati moro bun, èn skrifi den sani dati tu.
No fruwakti tumusi fu makandra
Te tu sma e leri fa fu abi wan koloku trowlibi, dan dati de neleki te wan sma e leri fu rèi wan baisigri. A sma e fruwakti taki a o fadon wan tu leisi fosi a sabi fa fu rèi baisigri bun. Na a srefi fasi, yu musu fruwakti taki yu o meki wan tu fowtu te yu e leri fa fu handri na ini yu trowlibi.
Si den broko-ede fu yu patna leki seryusu sani, ma leri fu lafu tu te yu meki wan fowtu. Suku okasi fu meki yu patna prisiri na ini a fosi yari fu un trowlibi (Deuteronomium 24:5). San de moro prenspari, meki Gado Wortu tiri unu na ini a trowlibi. Te yu e du dati, dan ibri yari yu trowlibi sa kon moro bun.
a Wi kenki wan tu nen.
AKSI YUSREFI DEN SANI DISI . . .
Mi meki mi trowpatna tron a moro bun mati fu mi, noso mi e go taki fosi nanga trawan te mi musu teki wan bosroiti?
Na ini wan dei, sortu spesrutu sani mi du di e sori taki mi lobi mi trowpatna èn taki mi e lespeki en?