Mi ben frede dede,—ma now mi abi a howpu fu kisi ’libi pasa marki’
Soleki fa Piero Gatti fruteri
WAN babari ben de fu yere, èn safrisafri a babari dati ben e kon moro tranga. Baka dati, sirene bigin bari fu warskow sma fu suku kibri. Ne bom bigin fadon èn sani ben e panya èn ben e sutu opo. A babari dati ben kan priti wan sma en yesi-mama.
A sani disi pasa na ini Milaan, na Italiakondre, na a pisi ten fu 1943/1944. Mi ben de wan yonguman na a ten dati, èn mi ben e dini drape leki srudati. Te bom ben e fadon na tapu den presi pe sma ben e go suku kibri, dan nofo tron mi ben musu go piki den dedeskin di ben de na mindri den broko sani. Den dedeskin disi ben bron dorodoro èn den ben panya pisipisi. Mi no si nomo fa tra sma dede. A pasa wan tu leisi taki misrefi si dede. Na den okasi dati, mi ben e begi Gado, èn mi ben e pramisi en taki efu mi ben pasa den ogri-ati pisi ten dati libilibi, dan mi ben o du a wani fu en.
Mi no e frede dede moro
Mi kweki na ini wan dorpu di ben de sowan 10 kilometer moro fara fu a foto Como, na Italiakondre. A foto disi ben de krosibei fu Switserland. Yonguyongu kaba mi ondrofeni san a wani taki fu sari, èn mi bigin frede gi dede. A Spaanse griep kiri tu sisa fu mi. Èn na ini 1930, di mi ben abi siksi yari nomo, mi mama, Luigia, dede. Fu di mi ben kweki na ini a Lomsu bribi, meki mi ben e hori misrefi na den wet fu a bribi fu mi, èn mi ben e go na kerki ibri wiki. Ma a ben de yari baka dati di mi ondrofeni wan sani di meki taki mi no ben e frede dede moro. Mi no ben de na ini kerki di mi ondrofeni a sani dati, ma mi ben de na wan presi pe sma e koti wiwiri.
Na ini 1944, bun furu sma ben e lasi den libi na ini a Di fu Tu Grontapufeti. Mi ben de wán fu den dusundusun srudati fu Italiakondre di ben lowe go na Switserland fu di a kondre dati no ben e teki prati na a feti. Di mi doro drape, dan den tyari mi nanga tra loweman go poti na difrenti loweman kampu. Den seni mi go na wan loweman kampu krosibei fu a dorpu Steinach, na a noord-owstu sei fu a kondre. Wi ben kan libi drape sondro taki wi ben e abi fu hori wisrefi na tumusi furu wet. A sma di ben e koti wiwiri gi sma na ini Steinach ben abi wan sma fanowdu fu yepi en nanga a wroko fu wan pisi ten. Mi go tan nanga en wán mun langa, èn na a pisi ten dati mi ben e wroko tu gi en. Na a ten dati mi miti wan sma di meki taki mi libi kon kenki.
Wan fu den klanti fu a man di ben e koti sma wiwiri, ben de Adolfo Tellini. A man disi ben de fu Italiakondre, ma a ben e libi na ini Switserland. A ben de wan Kotoigi fu Yehovah. Noiti mi ben yere fu den sma disi, èn disi no ben fruwondru mi fu di na a ten dati, sowan 150 Kotoigi nomo ben de na ini heri Italiakondre. Adolfo fruteri mi tumusi moi tru tori fu Bijbel, èn den tori dati ben e pramisi taki vrede ben o de èn taki sma ben o ’kisi libi pasa marki’ (Yoh. 10:10; Openb. 21:3, 4). Mi ben breiti srefisrefi di mi kon sabi a boskopu di e taki dati orloku nanga dede no o de moro na ini a ten di e kon. Di mi ben de baka na a loweman kampu, dan mi fruteri Guiseppe Tubini, wan yonguman fu Italiakondre, a moi boskopu disi, èn ensrefi ben lobi san a yere. Ten na ten, Adolfo nanga tra Kotoigi ben e kon luku wi na ini a kampu.
Adolfo tyari mi go na a foto Arbon, di ben de sowan 10 kilometer moro fara fu Steinach. Drape wan pikin grupu Kotoigi ben e hori konmakandra na ini Italiatongo. Mi ben breiti so te nanga den sani di mi ben yere, taki a wiki baka dati, mi waka go drape. Bakaten, mi go na wan bigi konmakandra fu Yehovah Kotoigi, di ben hori na ini wan kongreshal na ini Zurich. A sani di naki mi ati spesrutu, na den prenki di den ben e sori fu den ipi-ipi dedeskin na ini den strafuman kampu. Mi leri taki sma ben kiri furu Kotoigi na ini Doisrikondre fu a bribi fu den ede. Na a bigi konmakandra dati, mi miti Maria Pizzato. Fu di a ben de wan Kotoigi, meki a tirimakti fu Italiakondre, poti en na strafu-oso 11 yari langa.
Di a feti kon na wan kaba, dan mi drai go baka na Italiakondre èn mi ben e kon makandra nanga a pikin gemeente na ini Como. Sma no ben e studeri Bijbel doronomo nanga mi, ma mi ben sabi krin san na den moro prenspari tru tori fu Bijbel. Maria Pizzato ben de wan memre tu fu a gemeente dati. A taigi mi fu san ede a prenspari taki wan sma e teki dopu fu tron wan Kresten, èn a taigi mi fu go na Marcello Martinelli. A brada dati ben e libi na ini Castione Andevenno, na ini a distrikt Sondrio. Marcello ben de wan salfu brada di ben e dini Gado nanga en heri ati, èn na ogri-ati tirimakti ben meki a koti strafu 11 yari langa. Mi ben musu trapu a baisigri 80 kilometer fu doro na en.
Marcello gebroiki Bijbel fu sori mi san mi ben musu du fu man teki dopu, èn baka dati wi begi èn wi go na a Adda-liba, pe a dopu mi. Dati ben de na ini september 1946. A dei dati ben de wan prenspari dei gi mi! Mi ben breiti taki mi ben teki a bosroiti fu dini Yehovah, èn taki now mi ben abi wan tranga howpu gi a ten di e kon. Mi ben breiti so te, taki mi frigiti srefi taki mi ben trapu a baisigri 160 kilometer a dei dati!
Na ini mei 1947, a fosi bigi konmakandra di ben hori baka a feti, ben de na ini Milaan. Sowan 700 sma kon na a konmakandra dati, èn furu fu den sma dati ben libi na ini a ten di na ogri-ati tirimakti na ini Italiakondre ben e frufolgu a pipel fu Gado. Wan aparti sani pasa na a konmakandra disi. Giuseppe Tubini di mi ben gi kotoigi na ini a strafuman kampu, ben hori a dopu taki, èn baka dati, ensrefi teki dopu!
Na a konmakandra dati, mi ben abi a grani fu miti Brada Nathan Knorr, fu Brooklyn Bethel. A gi mi nanga Guiseppe deki-ati fu gebroiki wi heri libi fu dini Gado. Mi bosroiti taki mi ben o bigin nanga a furuten diniwroko a mun baka dati. Di mi doro na oso, dan mi fruteri mi famiri fu a bosroiti di mi ben teki, èn den alamala pruberi fu puru a prakseri dati na mi ede. Ma mi ben abi a fasti bosroiti fu go na ini a furuten diniwroko. Sobun, wán mun baka dati, mi bigin dini na Bethel na ini Milaan. Fo zendeling ben e dini drape, namku Giuseppe (Joseph) Romano nanga en wefi Angelina. Sosrefi Carlo Benanti nanga en wefi Constanza. A di fu feifi memre fu a famiri ben de Giuseppe Tubini di ben go dini drape no so langa na fesi, èn mi ben de a di fu siksi memre.
Baka di mi ben de wán mun na Bethel, dan mi kisi a frantwortu fu go dini leki kring-opziener, èn mi ben de a fosi kring-opziener na ini a kondre, di gebore na ini Italiakondre. Brada George Fredianelli ben de a fosi zendeling di ben komoto fu Amerkankondre fu dini na ini Italiakondre na ini 1946. A brada disi ben e dini kaba leki kring-opziener. A gi mi leri wan tu wiki, èn baka dati mi wawan go du a wroko moro fara. Mi man memre a fosi gemeente di mi go luku heri bun. Dati ben de gemeente Faenza. Denki a tori! Teleki a ten dati, mi noiti no ben hori wan lezing gi wan gemeente! Ma toku mi gi den sma di ben de na a konmakandra dati, sosrefi furu yonguwan, a deki-ati fu poti en leki marki fu go na ini a furuten diniwroko. Bakaten, sonwan fu den yonguwan dati kisi bigi frantwortu na ini a diniwroko na ini Italiakondre.
A libi fu mi leki kring-opziener ben span srefisrefi. Mi ben e kisi fu du nanga furu sani di mi no ben e fruwakti, mi ben musu fiti misrefi doronomo, mi ben e kisi furu tyalensi, èn mi ben kisi furu blesi. Wan fu den blesi di mi ben abi na taki den lobi-ati brada nanga sisa ben e sori furu lobi gi mi.
A situwâsi fu den kerki na ini Italiakondre baka a feti
Meki mi fruteri yu wan tu sani fu a situwâsi fu den kerki na ini Italiakondre na a ten dati. A Lomsu Kerki ben de a moro prenspari kerki na a ten dati. Aladi wan nyun wet kon abi krakti na ini 1948, toku a ben de na ini 1956 fosi, taki den wet fu na ogri-ati tirimakti fu Italiakondre di ben e tapu den Kotoigi fu preiki fri, ben drai baka. Fu di den kerki fesiman ben e sutu faya gi sma fu gens wi, meki a ben e pasa furu taki sma ben e kon meki opruru na den kring konmakandra fu wi. Ma son leisi, den kerki fesiman no ben abi bun bakapisi kwetikweti. Dati pasa na ini 1948 na Sulmona, wan pikin foto na mindrisei fu Italiakondre.
A konmakandra ben hori na ini wan theater. Tapu sonde mamanten, mi ben de fesiman fu a programa, èn Giuseppe Romano hori a publikitaki. Den dei dati, bun furu sma ben e kon na den konmakandra. Na a ten dati den preikiman di ben de na ini a heri kondre, no ben doro 500 sma ete, ma toku 2000 sma ben de na ini a theater. Sosrefi tu priester ben de na mindri den sma, èn na a kaba fu a taki, wan yonkuman di den ben sutu faya gi, dyompo go na tapu a podium. Fu di a ben de nomonomo fu tyari bruya kon, meki a bigin bari sani bun tranga. Wantewante mi taigi en: „Efu yu abi wan sani fu taki, dan go yuru wan zaal pe yu kan taki iniwan sani di yu wani.” Den sma na ini a theater no ben lobi a sani di a yonkuman disi ben e du, èn den bigin bari sani gi en so taki a sten fu en no ben de fu yere. A sani disi meki taki a yonkuman dyompo komoto fu a podium, èn wi no si en moro.
Na a ten dati, mi ben e ondrofeni wan lo sani te mi ben e go fu a wan presi na a trawan. Son leisi mi ben e waka fu a wan gemeente go na a trawan, mi ben e go nanga baisigri, nanga broko bus di ben lai nanga sma, noso nanga loko. Son leisi mi ben e tan na ini wan kawpen noso na ini wan presi pe sma ben e poti wrokosani. A no ben de langa na fesi di a feti ben kon na wan kaba, èn furu sma fu Italiakondre ben pôti. Wan tu brada nomo ben de èn den no ben gudu. Ma toku a ben e gi prisiri fu dini Yehovah.
Mi e kisi leri na Gilead
Na ini 1950, mi nanga Giuseppe Tubini kisi kari fu go na a di fu 16 klas fu a zendelingskoro Gilead. Na a bigin fu a skoro kaba, mi kon si taki a ben o muilek gi mi fu leri Ingrisitongo. Mi du ala san mi ben man, ma a ben muilek trutru. Wi ben musu leisi a heri Bijbel na ini Ingrisitongo. Fu man du dati, dan son leisi mi no ben e go nyan te bakadina, soso fu leisi nanga wan tranga sten. Te fu kaba, a ten ben doro gi mi fu hori wan taki. Mi man memre heri bun ete san a leriman taigi mi. A ben taki: „Yu de fayafaya trutru èn yu e gebroiki yu anu bun te yu e taki, ma mi no man frustan na Ingrisitongo fu yu kwetikweti!” Aladi di dati ben de so, toku mi ben man klari a skoro nanga bun bakapisi. Baka dati, mi nanga Giuseppe ben musu go baka na Italiakondre. Fu di wi ben kisi moro leri, meki wi ben man yepi den brada nanga sisa moro bun.
Na ini 1955, mi trow nanga Lidia. Mi ben hori a doputaki fu a sisa disi seibi yari na fesi. En papa, Domenico, ben de wan lobi-ati brada di ben yepi ala den seibi pikin fu en fu teki a tru anbegi. A ben man du dati aladi na ogri-ati tirimakti na ini Italiakondre ben frufolgu en. Boiti dati, den puru en na ini a kondre, èn dri yari langa a no ben man kon na ini a kondre. Lidia ben de fayafaya tu gi a tru anbegi. A ben musu go na fesi krutu dri leisi fosi wi kisi a reti fu preiki oso-fu-oso te fu kaba. Siksi yari baka di wi trow, Beniamino, a fosi boi fu wi, gebore. Na ini 1972 wi kisi ete wan boi, Marco. Mi breiti srefisrefi taki den ala tu e dini Yehovah fayafaya makandra nanga na osofamiri fu den.
Mi e tan dini Yehovah fayafaya
Fu di mi gebroiki mi libi fu dini trawan, meki mi de koloku trutru, èn mi ondrofeni furu moi sani. Fu eksempre, syatu baka 1980, a papa fu mi wefi skrifi wan brifi go gi Sandro Pertini, a presidenti fu Italiakondre. Na a ten di na ogri-ati tirimakti ben e tiri a kondre, dan den ala tu ben musu go na ini katibo na a èilanti Ventotene. Na drape lanti ben e poti sma di den ben e si leki feanti fu a tirimakti. A papa fu mi wefi aksi okasi fu taki nanga na presidenti, fu di a ben wani gi en kotoigi. Di a kisi okasi fu taki nanga a presidenti, dan mi go nanga en, èn wi kisi wan switikon. Dati ben de wan sani di furu fu wi no ben gwenti kisi. Di a presidenti si a papa fu mi wefi, dan a gi en wan waran brasa. Baka dati, wi taki fu a bribi fu wi, èn wi gi en wan tu publikâsi.
Na ini 1991, baka di mi ben dini 44 yari langa leki kring-opziener, dan mi tapu nanga a kringwroko. Na a ten dati, mi ben go luku gemeente na ini heri Italiakondre. Na ini den fo yari baka dati, mi ben e dini leki opziener fu a Kongreshal, teleki mi kon siki seryusu èn mi no ben man teki so furu frantwortu moro na mi tapu. Ma tangi fu a bun-ati di Yehovah sori gi mi, meki mi e dini ete na ini a furuten diniwroko. Mi e du ala san mi man fu preiki a bun nyunsu èn fu gi sma leri, èn mi abi wan tu Bijbelstudie. Te nanga a dei fu tide den brada e taki ete dati mi de so fayafaya te mi e hori taki. Mi e taki Yehovah tangi taki aladi mi kon owru, mi no lasi a faya dati.
Di mi ben de wan tini, dan a frede di mi ben abi gi dede ben e abi bun furu krakti na mi tapu. Ma di mi kisi soifri sabi fu Bijbel, dan mi kisi a howpu fu libi fu têgo, iya, fu kisi ’libi pasa marki’, soleki fa Yesus ben kari en (Yoh. 10:10). Na a howpu dati mi abi now, namku wan bun libi na ini vrede, a dyaranti taki sani sa waka bun nanga mi, èn wan koloku libi pe mi sa kisi bogobogo blesi fu Yehovah. Meki a de so taki wi lobi-ati Mekiman, Yehovah Gado di wi mag anbegi, kisi ala glori.—Ps. 83:18.
[Karta na tapu bladzijde 22, 23]
(Efu yu wani si pe den sani disi skrifi, luku a tijdschrift)
SWITSERLAND
BERN
Zurich
Arbon
Steinach
ITALIAKONDRE
ROME
Como
Milan
Adda-liba
Castione Andevenno
Faenza
Sulmona
Ventotene
[Prenki na tapu bladzijde 22]
Wi e go na Gilead
[Prenki na tapu bladzijde 22]
Mi nanga Giuseppe na Gilead
[Prenki na tapu bladzijde 23]
Tapu a trowdei fu wi
[Prenki na tapu bladzijde 23]
Mi lobi-ati wefi de na mi sei moro leki 55 yari kaba