Fu san ede wi musu gebroiki Gado nen?

Na artikel disi e poti prakseri na aksi di yu ben abi kande èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. Fu san ede Gado gi ensrefi wan nen?

A no de fu taki dati yu wani sma kari yu na yu nen, na presi fu kari yu „man,” „masra,” „misi,” noso „uma”. Wan nen e meki sma sabi suma na yu. Te sma e taki fu Gado, den e kari en a „Moro Hei Masra”, „Gado na Almaktiwan” èn „Gran Mekiman” (Genesis 15:2; 17:1; Preikiman 12:1). Ma Gado gi ensrefi wan nen tu. Disi kan yepi wi fu de wan mati fu en. Na ini Sranantongo a nen fu Gado na Yehovah.​—Leisi Yesaya 42:8.

Aladi furu sma di e vertaal Bijbel puru Gado nen èn den poti wortu soleki „Gado” nanga „Masra” na ini Bijbel, toku a nen fu Gado de fu feni sowan 7000 tron na ini den owruten Hebrew dokumenti fu Bijbel. A de krin fu si taki Gado wani taki sma sabi en nen.​—Leisi Yesaya 12:4.

2. San meki a prenspari fu sabi Gado nen?

Fu sabi Gado nen wani taki moro leki fu sabi fa fu taki a nen nomo. Te wan sma sabi Gado nen, dan dati wani taki dati a de wan bun mati fu En. A nen Yehovah wani taki „A e meki kon tron”. A nen disi e gi wi a dyaranti taki Gado o du iniwan sani di de fanowdu fu meki den prakseri fu en kon tru. Sobun, te sma sabi Gado nen, dan den e bribi taki Gado o du san a pramisi (Psalm 9:10). Te sma sabi Gado nen èn te den e gebroiki a nen dati, dan a bribi fu den o gi den deki-ati fu frutrow na tapu en èn fu si en leki a moro prenspari sma na ini den libi. Yehovah Gado o kibri den sortu sma disi.​—Leisi Psalm 91:14.

3. Fu san ede Gado wani taki sma sabi en nen?

Gado wani taki sma sabi en nen fu di den o kisi wini fu dati. Na so fasi den kan kon de Gado mati di abi a howpu fu libi fu têgo. Fu dati ede a no musu fruwondru wi taki Yehovah wani wi fu meki en nen bekènti!​—Leisi Yohanes 17:3; Romesma 10:13, 14.

Yesus ben meki Gado nen bekènti fu di a ben leri sma den fasi fu Gado èn den wèt nanga den pramisi fu en. Na ini a ten disi, den bakaman fu Yesus e tan meki Gado nen bekènti na ini ala kondre. Den e du disi fu di den de ’wan pipel di e tyari Gado nen’ èn di de wán.​—Leisi Tori fu den apostel 15:14; Yohanes 17:26.

4. Fa Gado o meki sma prèise en nen?

Yehovah Gado wani taki sma prèise en nen, fu di someni langa kaba sma gi en porinen. Fu eksempre, son sma e taki dati a no Gado meki libisani èn taki wi no abi fu gi yesi na en. Trawan e taki dati a no e broko en ede nanga wi èn taki na en e meki taki sma e pina. Den e gi Gado porinen. Ma den no o du dati fu ala ten. Gado o strafu den sma di meki a nen fu en lasi grani.​—Leisi Psalm 83:17, 18.

Yehovah Kownukondre o tyari wan kaba kon na ala libisma tirimakti èn a o meki freide kon baka na grontapu. Na so Gado o gi en nen grani (Danièl 2:44). Heri esi ala sma sa musu fu sabi taki Yehovah na a tru Gado.​—Leisi Esekièl 36:23; Mateyus 6:9.

San yu musu du? Kon krosibei na Gado, fu di yu e studeri a Wortu fu en èn e kon makandra nanga sma di lobi en. Te Yehovah o gi en nen grani, dan a no o frigiti den reti-ati futuboi fu en.​—Maleaki 3:16.

Efu yu wani sabi moro, dan luku kapitel 1 fu a buku disi, San Bijbel e leri wi trutru?, di Yehovah Kotoigi tyari kon na doro.

[Prenki na tapu bladzijde 16]

Gado nen na ini wan owruten Hebrew dokumenti