Fu san ede a bun fu kon sabi Bijbel?

Te yu luku en bun, dan Bijbel na a moro pôpi buku na heri grontapu. Fu san ede? Wán sani, na taki a makriki fu frustan. A abi tori na ini fu sma di ben libi trutru. A e taki tu fa den sma disi ben e libi nanga makandra èn fa a matifasi di den ben abi nanga Gado ben de. Wi e leri bun sani fu den tori disi di skrifi na so wan fasi taki sma ben kan vertaal den na ini hondrohondro tongo, so taki sma fu ala presi èn fu iniwan ten man frustan den bun. Wan tra sani, na taki den leri fu Bijbel e tyari wini kon gi wi ala ten.

San moro prenspari, na taki Bijbel a no wan buku di e taki nomo fu Gado, ma a buku disi komoto fu Gado. A e fruteri wi san na Gado nen, sortu fasi a abi, èn san a ben abi na prakseri di a meki grontapu nanga libisma. Bijbel e fruteri wi tu fa langa ten kaba wan strei ben de na mindri bun nanga ogri. A sani disi na wan span tori di abi krakti tapu heri grontapu ma a o abi bun bakapisi te fu kaba. Te yu e leisi Bijbel nanga wan krin ati, dan yu o kon abi bribi nanga howpu.

Na ini Bijbel wi kan leisi sani di no de fu feni nowan tra presi. Fu eksempre, Bijbel e fruteri san tru te a abi fu du nanga den tori disi:

• Pe wi komoto èn fu san ede wi e pina

• San Gado du fu frulusu libisma

• San Yesus du gi wi

• San o pasa nanga grontapu èn nanga libisma

Wi e gi yu deki-ati fu luku den bladzijde di e kon èn fu kon sabi sortu tori skrifi na ini Bijbel.