TORI FU A KAFTI | YU WANI STUDERI BIJBEL?

Wi e studeri Bijbel nanga ala sma

Sma sabi Yehovah Kotoigi leki sma di lobi preiki. Ma yu ben sabi taki wi e hori Bijbelstudie nanga sma na heri grontapu?

Na ini 2014, sowan 8.000.000 Kotoigi na ini 240 kondre, studeri Bijbel nanga sowan 9.500.000 sma ibri mun.a Te yu luku en bun, dan 140 kondre de na grontapu di no abi so furu sma srefi leki a nomru fu sma di e studeri Bijbel.

Ibri yari, Yehovah Kotoigi e meki moro leki wán nanga afu milyard Bijbel, buku, tijdschrift, nanga tra sani na ini sowan 700 tongo, fu studeri nanga sma. A sani disi e meki taki sma kan studeri Bijbel na ini a tongo di densrefi wani.

„Noiti mi ben lobi studeri na skoro, ma a studie disi switi. Den sani di mi e leri e meki mi firi bun!”—Katlego, Zuid-Afrika.

„Fu di mi studeri Bijbel, meki mi kisi piki tapu ala den aksi fu mi èn mi leri furu tra sani.”—Bertha, Meksikow.

„A Bijbelstudie ben e hori na mi oso na wan ten di ben bun gi mi. San mi wani moro!”—Eziquiel, Brasyonkondre.

„Son leisi wi ben e studeri 15 te go miti 30 miniti langa. Wi ben e studeri na wan ten di bun gi mi.”—Viniana, Australia.

„Mi no ben abi fu pai gi a studie. Mi ben lobi en kefalek!”—Aimé, Benin.

„A sma di ben e studeri Bijbel nanga mi ben abi pasensi nanga switifasi. Wi ben tron mati.”—Karen, Noord Ierland.

„Furu sma studeri Bijbel sondro fu tron wan Yehovah Kotoigi.”—Denton, Ingrisikondre.

AKSI DI SMA GWENTI POTI FU DI DEN WANI SABI FA WI E STUDERI BIJBEL NANGA SMA

Fa a Bijbelstudie e hori?

Wi e teki difrenti Bijbel tori èn wi e ondrosuku Bijbeltekst di e taki fu den tori dati. Fu eksempre, Bijbel e piki aksi soleki: Suma na Gado? Fa a de? A abi wan nen? Pe a e libi? Wi man tron mati fu en? Ma a sani di no makriki, na fu kon sabi pe fu Bijbel yu musu suku den piki.

Moro furu wi e gebroiki a buku San Bijbel e leri wi trutru? di abi 224 bladzijde, fu yepi sma feni den piki.b A buku disi meki fu yepi sma fu frustan den moro prenspari leri fu Bijbel. A abi kapitel di e taki fu Gado, fu Yesus Krestes, fu san ede libisma e pina, fu na opobaka, fu begi, èn fu tra sani.

Pe èn o ten wi e studeri nanga sma?

A studie kan hori na wan ten èn na wan presi di bun gi yu.

O langa wi e studeri nanga sma ibri wiki?

Furu sma feni en bun fu studeri wán yuru langa ibri wiki. Ma a de na a sma o langa a wani studeri, èn wi e hori wisrefi na a ten di a sma feni bun. Son sma e studeri 10 noso 15 miniti ibri wiki.

Omeni yu musu pai fu studeri?

Yu no abi fu pai gi a studie nanga den buku, fu di Yesus ben taigi den disipel fu en: „Unu kisi sondro fu pai, sobun un musu gi sma sondro fu meki den pai.”—Mateyus 10:8.

O langa a heri studie e teki?

A de na yu o langa yu wani studeri. A buku San Bijbel e leri wi trutru? abi 19 kapitel. A de na yu o langa yu wani studeri ala den kapitel disi.

Mi o abi fu tron wan Yehovah Kotoigi?

Nôno. Wi e hori na prakseri taki ibri sma abi a reti fu bribi san a wani. Ma a moro makriki gi wan sma di kon sabi san Bijbel e leri, fu bosroiti san a wani bribi.

Fa mi kan kon sabi moro?

Na a website www.pr418.com/srn yu kan kon sabi moro fu a bribi nanga a wroko di Yehovah Kotoigi e du.

Fa mi kan aksi wan Bijbelstudie?

Aksi wan Bijbelstudie na a website fu wi www.pr418.com/srn.
Skrifi go na wan fu den adres na tapu bladzijde tu fu a tijdschrift disi.
Miti nanga Yehovah Kotoigi na ini a birti fu yu. Yu kan suku ’Jehovah’s getuigen’ na ini wan telefoongids.

a Nofo tron wi e hori Bijbelstudie nanga ibri sma aparti noso na ini pikin grupu.

b Yehovah Kotoigi tyari en kon na doro. Moro leki 230 milyun fu a buku disi meki na ini moro leki 260 tongo.

A E YEPI OSOFAMIRI

„Di mi frow bigin studeri Bijbel, mi si taki a kon kenki. Na osofamiri-libi fu wi ben e go moro bun. Fu di mi ben wani sabi san a e leri, meki mi bigin studeri tu. Den sani di mi leri meki mi tron wan moro bun sma. Bijbelstudie meki taki wi ben kon lobi makandra moro.”—Eziquiel.

„Baka di mi bigin studeri Bijbel, mi tapu fu gebroiki drugs èn fu dringi tumusi furu sopi. Mi leri tu fu no atibron esi-esi. Mi oso no doti so moro. Mi kon lobi mi osofamiri moro, èn mi e breiti fu du sani di e meki den prisiri. Mi kon de moro koloku.”—Karen.

„Son sma e krutu mi fu di mi e studeri Bijbel. Ma mi masra e horibaka gi mi. A taki: ’Mi no e span nanga san tra sma wani taki. Solanga yu e tron wan moro bun sma, dan dati bun gi mi. Yu kan tan studeri go doro.’ Noiti ete wi osofamiri ben de so koloku!”—Viniana.