A prenspari suma e si a wroko di yu e du?

BESALEYEL nanga Oholiab ben gwenti du bow-wroko. Di den ben de srafu na Egepte, a kan taki den meki someni ston dati den no ben wani prakseri a ten dati srefi. Ma a ten dati ben pasa kaba. A frantwortu di den ben kisi fu teki fesi na ini a bow fu a tabernakel ben o meki den tron den moro bun wrokoman (Eks. 31:1-11). Ma toku wan tu sma nomo ben o kisi na okasi fu si sonwan fu den kefalek moi sani di den man disi meki. Ma a sani dati ben o meki den firi brokosaka? A ben de prenspari suma ben e si a wroko di den du? A prenspari suma e si a wroko di yu e du?

KEFALEK MOI WROKO DI SOSO WAN TU SMA SI

Sonwan fu den sani na ini a tabernakel ben de kefalek moi sani di nowan tra sma ben meki ete. Fu eksempre, luku den gowtu kerub di ben de na tapu a tapun fu na ark fu a frubontu. Na apostel Paulus ben taki dati den popki disi ben moi srefisrefi (Hebr. 9:5). Nanga amra Besaleyel nanga Oholiab naki a gowtu so taki den ben kan meki den popki. Prakseri fa den ben moi.​—Eks. 37:7-9.

Efu sma na ini a ten disi ben o feni den sani di Besaleyel nanga Oholiab meki, dan den ben o poti den na ini den moro bun museum pe furu sma ben kan si den. Ma omeni sma si o moi den sani disi ben de na ini a ten di den meki? Den kerub ben de na ini a Moro Santa Presi fu a tempel. Sobun, soso a granpriester ben e si den te a ben e go na ini a tempel wán tron wan yari. Dati ben de na a dei te sma ben e tyari ofrandi fu tapu den sondu fu a pipel (Hebr. 9:6, 7). Dati meki wan tu sma nomo si den sani disi.

PRISIRI NANGA A WROKO FU YU, SREFI TE SMA NO E PRÈISE YU

Efu yu ben de Besaleyel nanga Oholiab èn yu ben wroko so tranga fu meki den kefalek moi sani fu a tabernakel, dan fa yu ben o firi taki wan tu sma nomo si den? Na ini a ten disi, sma e firi bun te trawan e prèise den gi den sani di den e du. Den e si dati leki wan fasi fu sabi efu den du a wroko fu den bun. Ma den futuboi fu Yehovah de tra fasi. Neleki Besaleyel nanga Oholiab, na so wi e prisiri te wi e du a wani fu Yehovah èn te wi sabi taki a feni wi bun.

Na ini a ten fu Yesus, den kerki fesiman ben abi a gwenti fu begi na so wan fasi taki sma ben kan si den. Den ben wani taki sma prèise den. Ma Yesus taki dati wi no musu begi na a fasi disi. A leri wi fu begi nanga wi heri ati èn fu no suku taki sma prèise wi. San na a bakapisi? Bijbel e taki: „Yu Tata di e si ala sani aladi yu no man si en, o pai yu baka” (Mat. 6:5, 6). Sobun, a moro prenspari sani gi wi na san Yehovah e denki èn no san tra sma e denki. A fasi fa En e si sani, e meki taki den begi fu wi warti gi en. Na so a de tu nanga den tra sani di wi e du na ini a diniwroko fu en. A no te tra sma e prèise wi, dan a wroko fu wi de prenspari. Ma na te wi e plisi Yehovah „di e si ala sani aladi yu no man si en”.

Di a tabernakel kaba, wan wolku „kon na tapu a konmakandra-tenti, èn a glori fu Yehovah furu a tabernakel” (Eks. 40:34). A de krin taki Yehovah ben feni a tabernakel bun. Fa yu denki Besaleyel nanga Oholiab firi na a momenti dati? Aladi a nen fu den no skrifi na tapu den sani di den meki, toku den ben musu firi bun fu di den ben sabi taki Gado ben blesi ala a muiti di den du (Odo 10:22). Na ini den yari baka dati, a musu fu de taki Besaleyel nanga Oholiab ben breiti fu si taki sma tan gebroiki den sani di den meki fu anbegi Yehovah. Te Besaleyel nanga Oholiab o kon na libi baka na ini a nyun grontapu, dan wi kan de seiker taki den o breiti te den yere taki sowan 500 yari sma tan gebroiki a tabernakel na ini a tru anbegi.

Na ini a ten disi, yu abi sma na ini Yehovah en organisâsi di e meki den tekenfelem, den poku fu wi nanga den moi prenki na ini den buku fu wi. Yu abi sma tu di e meki fowtow, di e du vertaalwroko èn di e skrifi artikel. Ala den brada nanga sisa disi e du den wroko sondro fu sma sabi den nen. Sobun, yu kan taki dati nowan sma e „si” san den e du. Na dati wi kan taki tu fu a wroko di e du na ini den moro leki 110.000 gemeente na heri grontapu. Suma e si te a sma di musu luku den monitori fu a gemeente e meki wan raportu na a kaba fu a mun? Suma e si te a sekretarsi e sreka den preikiwroko raportu fu a gemeente? Te wan sani broko na a Kownukondre zaal, dan suma e si a brada noso sisa di e go fu meki a sani dati?

Di Besaleyel nanga Oholiab kon owru, sma no gi den wan prijs gi a wroko di den du èn den no ben abi nowan fu den sortu sani disi fu sori sma. Sma no skrifi a nen fu Besaleyel nanga Oholiab na tapu monumenti fu no frigiti den kefalek moi sani di den meki. Ma den ben kisi wan sani di warti moro: Yehovah ben feni den bun. Wi kan de seiker taki Yehovah si a wroko di den du. Meki wi teki na eksempre fu den èn tan de klariklari fu du a wroko fu wi na wan sakafasi.