Den fosi Kownukondre siri di sai na ini Potogisikondre

BRADA George Young ben de na ini wan sipi na tapu na Atlantis Se e go na Europa. A ben e prakseri fa a sai Kownukondre siri na ini Brasyonkondre èn dati ben e gi en furu prisiri.a Ma baka dati Brada Young bigin prakseri a nyun grani di a kisi fu go preiki na ini a bigi kontren fu Spanyorokondre nanga Potogisikondre pe furu sma no yere a bun nyunsu ete. Te a ben o doro drape, dan a ben o seti sani gi Brada J. F. Rutherford di ben o kon hori wan tu Bijbel-lezing èn a ben o prati 300.000 traktaat.

Di a doro Lissabon na ini 1925, dyugudyugu ben de ini a kondre. A revo fu 1910 ben tyari wan kaba kon na a tiri fu den kownu èn a Lomsu Kerki lasi furu makti. Den sma na ini a kondre ben kon moro fri, ma toku sani no ben e go bun ete na ini a kondre.

Di Brada Young ben e seti sani gi a lezing fu Brada Rutherford, dan lanti bigin meki wan tu wet fu di sma ben pruberi fu teki a makti abra na ini a kondre. A sekretarsi fu a Bijbel organisâsi fu Ingrisikondre ben warskow Brada Young taki a ben o kisi furu gens. Toku Brada Young ben aksi fu gebroiki a sportzaal fu Camões skoro, so taki a lezing ben kan hori drape èn a kisi primisi fu du dati.

Brada Rutherford ben o hori a lezing tapu 13 mei. Di a dei doro, ala sma ben e wakti a lezing! Den ben e plak bigi karta tapu gebow èn den ben e meki bekènti na ini koranti taki wan lezing ben o hori di nen „Fa wi kan libi fu têgo na grontapu”. Den kerki fesiman di ben wani gens wi, skrifi wan artikel na ini a koranti fu den pe den ben e warskow sma taki den nyun brada disi na falsi profeiti. Na fesisei fu a sportzaal, den gensman ben e prati dusundusun brochure fu sori den sma taki den sani di Brada Rutherford ben o leri den, no tru.

Toku sowan 2000 sma ben de na ini a zaal èn sowan 2000 sma ben musu drai gowe baka fu di presi no ben de. Na ini a sportzaal trapu ben de di ben meki fu titei. Sonwan fu den arkiman ben e anga na den trapu disi èn trawan ben e sidon na tapu den apparaat fu a sportzaal.

A no ala sani ben waka bun. Den gensman ben bari sani gi Brada Rutherford èn den ben e naki sturu broko. Toku Brada Rutherford no bruya, ma a go doro nanga en lezing. A kren go tapu wan tafra so taki den sma ben kan yere en. Baka di a kaba nanga en lezing, na wan ten fu 12 yuru neti, dan moro leki 1200 sma gi den nen nanga adres fu di den ben wani kisi den buku fu wi. A tra dei, a koranti di nen O Século, skrifi wan artikel fu a lezing fu Brada Rutherford.

Na a ten fu september 1925, A Waktitoren bigin kon na doro na ini Potogisitongo na ini Potogisikondre. (Fosi a ten dati, wan Potogisitongo Waktitoren ben kon na doro kaba na ini Brasyonkondre.) Na a srefi ten dati, Virgílio Ferguson, wan Bijbel Ondrosukuman fu Brasyonkondre, bigin seti sani fu froisi go na Potogisikondre fu yepi nanga a Kownukondre preikiwroko. A brada disi ben wroko makandra nanga Brada Young na ini a pikin bijkantoro fu den Bijbel Ondrosukuman na Brasyonkondre. A no ben o teki langa fosi Virgílio nanga en frow Lizzie doro na Potogisikondre pe den ben o miti baka nanga Brada Young. Brada Ferguson ben kon na a yoisti ten fu di heri esi Brada Young ben o froisi go preiki na tra presi soleki a Sovyet-Unie.

Di den srudati teki a makti abra na ini Potogisikondre, den poti den eigi tiriman èn den brada nanga sisa bigin kisi hebi frufolgu. Ma Brada Ferguson no gowe. A du ala san a man fu kibri a pikin grupu Bijbel Ondrosukuman èn fu gi den deki-ati fu tan preiki. A aksi primisi fu hori konmakandra na ini en oso. Na ini oktober 1927 a kisi primisi fu du dati.

Na ini a fosi yari baka di den srudati teki a makti abra, sowan 450 sma na ini Potogisikondre ben aksi fu kisi A Waktitoren. Boiti dati, nanga yepi fu traktaat nanga pikin buku, a bun nyunsu ben prati na ini den kondre nanga èilanti di ben de ondro a makti fu Potogisikondre. Kondre soleki Angola, den Azoren, Goa, Kaap Ferdia, Madèira, Mosambik nanga Owstu-Timor.

Na ini 1929, Manuel da Silva Jordão, wan brada di ben e krin dyari gi sma, kon na Lissabon. Di a ben e libi na ini Brasyonkondre, a ben yere wan lezing fu Brada Young. A ben si wantewante taki disi na a tru anbegi èn dati meki a ben de fayafaya fu yepi Brada Ferguson nanga a preikiwroko. A bigin dini wantewante leki pionier. Fu di sani ben orga fu druk buku èn fu prati den, meki a nyun gemeente na ini Lissabon ben e gro!

Na ini 1934 Brada nanga Sisa Ferguson ben musu drai go baka na Brasyonkondre. Ma den ben wroko tranga fu sai Kownukondre siri. Aladi furu dyugudyugu ben de na ini Europa na a ten fu a Borgufeti fu Spanyorokondre nanga a Di Fu Tu Grontapufeti, toku a grupu brada nanga sisa na ini Potogisikondre tan dini Yehovah. Fu wan pisi ten den no ben de so fayafaya moro, ma na ini 1947 den kisi a faya fu den baka, di John Cooke doro na ini a kondre. A ben de a fosi zendeling di go dini na Potogisikondre baka di a klari Gileadskoro. Heri esi a nomru fu Kownukondre preikiman bigin gro srefisrefi. Aladi lanti ben tapu a preikiwroko fu Yehovah Kotoigi na ini 1962, toku a nomru fu preikiman tan gro. Na ini december 1974 di Yehovah Kotoigi kisi primisi baka fu du den wroko, moro leki 13.000 preikiman ben de na ini a kondre.

Nownowde moro leki 50.000 preikiman e preiki a bun nyunsu fu Gado Kownukondre na ini Potogisikondre nanga den tra èilanti pe sma e taki Potogisitongo, soleki Azoren nanga Madèira. Furu fu den preikiman disi na bakapikin fu sonwan fu den sma di ben kon arki a lezing fu Brada Rutherford na ini 1925.

Wi e taki Yehovah tangi taki a gebroiki den brada nanga sisa disi fu teki fesi na ini a Kownukondre wroko. Den brada nanga sisa disi wroko tranga leki „dinari fu Krestes Yesus”.​—Rom. 15:15, 16.​—A historia fu wi na ini Potogisikondre.