Ondrofenitori fu a Jaarboek 2013

Wan man di gwenti weri umasma krosi kenki en libi

Rek gro kon bigi na ini wan bun osofamiri na ini Kambodya, ma yongu-yongu kaba en nanga en twelengi brada ben feni taki den na umasma. Den ben e prei nanga popki èn den ben lobi weri meisje krosi. A mama fu den no ben sabi moro san a ben musu du èn a ben e firi syen. A no ben sabi fa fu yepi den fu tapu nanga a libi dati. Den ben e weri mansma krosi go na skoro, ma te den doro drape, den ben e kenki den krosi èn weri umasma krosi. Di a twelengi ben abi 16 yari, den ben waka wan modo show èn sma di ben e meki felem ben lobi den. Na so den ben de na ini telefisi show èn ben e prei komedi prei. No langa na baka, Rek bigin libi wan homo-libi èn a ben abi demakandra nanga tra mansma di ben e weri umasma krosi.

Rek mama bigin go na kerki èn a ben meki Rek go nanga en tu. Aladi a ben agri fu weri mansma krosi, toku a no ben wani koti en langa wiwiri. A domri ben taigi Rek wan lo hati sani èn a ben e spotu a fasi fa a ben e libi. Ma toku Rek ben teki a bosroiti fu studeri Bijbel na ini a kerki. A fosi wiki, a opo fruku mamanten èn a rèi furu kilometer nanga baisigri go na a kerki, ma a domri no ben wani gi en leri. Rek no ben lobi en srefisrefi taki a domri no ben kon srefi fu taki nanga en a tra wiki.

Ma di Rek kon na oso, dan a twelengi brada fu en taigi en taki wan uma ben kon na den oso èn a ben aksi den fu studeri Bijbel nanga den sondro fu pai. A gi den a buku San Bijbel e leri wi trutru? A twelengi bigin studeri Bijbel nanga a sisa nanga en masra. Baka siksi mun, a brada fu Rek ben feni taki a no ben kaba fu kenki a libi fu en èn dati meki a tapu fu studeri Bijbel. Ma a tekst fu 1 Korentesma 6:9, 10 ben naki na ati fu Rek, èn a ben si krin san a ben musu du. Fu di a ben e studeri fayafaya, a ben e leisi Bijbel, a ben e begi, èn a ben e go na den konmakandra, meki a ben man kenki a fasi fa a ben libi. A mama fu Rek e studeri Bijbel tu èn a e go na fesi. Di Rek teki dopu, nanga watra na en ai a mama fu en taki: „Mi breiti fu si taki mi boi dopu leki wan mansma.” Now Rek de wan gewoon pionier.

Wan uma di ben e du bonuwroko drai en libi

Or-Ya ben e du bonuwroko, a ben e dresi sma, gi sma rai èn a ben e du lukuman-wroko. Wan trowpaar di de spesrutu pionier ben miti en na ini Haifa, Israel, di den ben e du na oso-fu-oso preikiwroko. Di den pionier miti en, a taigi den: „Efu na fu Gado unu o taki, dan unu kan kon na inisei!” Na oso fu en ben furu nanga wan lo bonu sani. A fruteri den taki a e kisi boskopu fu Gado, èn son leisi a „yeye” fu wan Dyu leriman di dede e gi en boskopu.

A ben feni en bun di den ben aksi en fu studeri a Bijbel leri-buku nanga en. Tu dei fosi den pionier ben kon na en oso, a ben begi Gado fu seni wan sma kon fu leri en sani fu Bijbel sondro fu leri en den sani fu a Dyu bribi. A no ben e studeri wan mun ete di a aksi den: „Tra sma de di abi a srefi bribi leki unu?” A kon na wan gemeente konmakandra èn a ben fruwondru fu a switifasi nanga a lobi di den brada nanga sisa ben sori en. Sensi a dei dati a e go na den konmakandra ibri wiki.

Baka di Or-Ya studeri tu mun, a aksi wan sani fu wan bigi konmakandra di ben o hori: „Na den bigi konmakandra sma e teki dopu, tok? Efu na so, dan unu abi tu mun nomo fu studeri nanga mi so taki mi kan teki dopu!” A fosi sani di a du na taki a trowe ala den diri bonu sani di a ben abi. Baka dati, a no ben e du bonuwroko moro èn a bigin preiki gi tra sma. A ben gi a Bijbel leri-buku nanga den tijdschrift na den sma di ben kon suku yepi na en di a ben e bonu fosi. Di a ben siki, a no ben wani bonu fu kon betre. Fu di a no ben du bonuwroko moro, meki fo mun langa a no ben abi nowan moni. Ma a ben seti sani fu man wroko fo dei nomo, siksi yuru na ini wán dei, so taki a ben abi ten gi na anbegi. Bakaten a feni wan bun wroko. Baka dati a seri a bigi oso fu en èn a yuru wan pikin oso.

Te fu kaba, Or-Ya ben mag teki dopu, ma wan wiki fosi a bigi konmakandra, en futu broko. A no ben lasi-ati, ma toku a dopu aladi en futu ben de na ini gips. Now Or-Ya na wan fayafaya preikiman di e preiki gi den sma di ben kon suku yepi na en di a ben e du bonuwroko èn a e hori Bijbelstudie.