Ondrofenitori fu a Jaarboek 2014
Zendeling di de fayafaya e meki a wroko go na fesi
Sensi 1975 furu zendeling fu Gileadskoro ben kon yepi nanga a wroko na ini Sièra Leon nanga Ginea. Sonwan fu den ben dini kaba na ini tra Afrikan kondre èn a no teki langa fosi den kon gwenti a libi drape. Gi trawan a ben de a fosi leisi taki den kon na ini Afrika. Fa den ben o meki en na ini den kondre disi? Luku san wan tu fu den taki.
„Den sma ben abi sakafasi èn ben angri fu leri sani fu Bijbel. A gi mi prisiri fu si fa den leri fu Bijbel yepi den fu abi wan moro bun libi.”—Hannelore Altmeyer.
„A waran weer èn den siki di ben de drape ben meki taki a no ben makriki. Ma a ben gi mi prisiri fu yepi reti-atisma fu dini Yehovah.”—Cheryl Ferguson.
„Mi leri fu abi pasensi. Di mi aksi wan sisa o ten den fisitiman fu en ben o kon, dan a piki: ’Kande tide, noso tamara. Ma a kan de tra tamara tu.’ A ben musu fu si na mi fesi taki mi skreki. Dati meki a taigi mi: ’Ma den o kon!’”—Christine Jones.
„Tinafo zendeling fu difrenti kulturu nanga kondre ben e libi na ini a zendeling-oso na ini Freetown. Wi alamala ben gebroiki tu toilet, wán wasi-oso, wán wasmasyin, èn wán kukru. Furu nyanyan no ben de fu feni èn a nyanyan no ben de so gosontu. Son leisi stroom ben gowe sondro taki wi ben yere na fesi. Èn son leisi stroom no ben de omeni dei langa. Furu fu wi ben kisi malaria èn tra siki. Kande disi sori wan situwâsi pe yu no ben o man tan, ma wi leri fu libi bun nanga makandra, fu gi makandra pardon, èn fu tan lafu awinsi a ben muilek. A preikiwroko ben switi èn den zendeling kon tron bun mati fu makandra.”—Robert nanga Pauline Landis.
„A pisi ten di wi ben tan na ini Sièra Leon ben de a moro switi ten fu wi libi. A no e hati wi taki wi ben go drape. Wi e misi a kondre kefalek.”—Benjamin nanga Monica Martin.
„Wi ben sribi wan neti na wan uma èn a ben bori wan sani di wi no si noiti ete. Na uma taki: ’Na wan sneki, ma mi puru den tifi fu en. Yu wani pikinso?’ Wi taigi en na wan switi fasi taki wi no ben wani, ma a ben de nomonomo taki wi ben musu nyan en. Aladi den sortu sani disi ben miti wi, toku wi ben warderi en taki den sma ben kari wi kon na den oso èn wi kon lobi den trutru.”—Frederick nanga Barbara Morrisey.
„Na ini den 43 yari taki mi ben de zendeling, mi ben libi makandra nanga moro leki 100 tra zendeling. A ben de wan bigi grani fu kon sabi so furu sma. Ibriwan fu den abi den eigi fasi, ma den alamala e du a srefi wroko! A e gi prisiri fu wroko makandra nanga Gado èn fu yepi sma fu kon sabi den tru tori fu Bijbel!”—Lynette Peters.
Sensi 1947 te go miti now, 154 zendeling ben dini na ini Sièra Leon, èn 88 ben dini na ini Ginea. Furu tra Kotoigi ben kon yepi preiki drape. Now 44 zendeling de na ini Sièra Leon, èn 31 de na ini Ginea. A tranga wroko di den du yepi furu sma. Alfred Gunn di de wan memre fu a Bijkantoro Komte langa kaba, e taki: „Wi e prisiri te wi e denki den.”
Mi kon lobi Sièra Leon
CINDY MCINTIRE
A GEBORE NA INI 1960
A DOPU NA INI 1974
A LIBI FU EN: A de wan zendeling sensi 1992. A dini na ini Ginea nanga Senegal èn now a e dini na ini Sièra Leon.
◆ Di mi doro dya, dan baka tu wiki nomo mi kon lobi Sièra Leon. Mi ben fruwondru fu si fa den sma ben tyari hebi lai na tapu den ede sondro fu meki a fadon. Sma ben lai na ini den birti. Yu ben kan si fa pikin-nengre ben e prei èn e dansi na tapu strati, aladi den ben naki anu èn e stampu nanga den futu. Na ala sei mi ben si moi kloru èn ben e yere poku.
Ma a sani di mi ben lobi moro, ben de a preikiwroko. Den sma fu Sièra Leon lobi fu kari sma kon na den oso. Den abi lespeki gi Bijbel èn den lobi arki a boskopu fu Bijbel. Den gwenti kari mi kon na ini den oso. Èn te mi e gowe, dan sonwan fu den e tyari mi afupasi. Den moi fasi fu den e yepi mi fu no broko mi ede tumusi te nofo watra no de èn te stroom no de.
Son leisi, sma e aksi mi efu mi no e sari taki mi no trow. Ma mi abi so furu fu du taki mi no abi ten fu prakseri a sani disi. Mi de koloku trutru.