Ondrofenitori fu a Jaarboek 2015
Pikin di no abi papa nanga mama e go na den konmakandra
Angela, di e libi na ini Sranan, ben go preiki na wan oso pe den e sorgu gi pikin di no abi papa nanga mama. Na uma di ben e sorgu gi den pikin, ben de wan sisa di no ben go moro na den konmakandra. Di Angela aksi en fu preiki gi den pikin, dan a sisa disi ben wani dati wantewante. Angela taki nanga 85 pikin èn a sori den wan tu felem fu jw.org. Bakaten a bigin studeri nanga furu fu den pikin. Tu pionier sisa ben yepi Angela fu studeri nanga den pikin. Ibriwan fu den ben e studeri nanga wan grupu pikin. A sisa di no ben e go na den konmakandra moro taigi den pionier taki a ben leri den pikin den singi fu wi singibuku èn taki a ben leisi Bijbel tori gi den te neti. A sisa taki dati a ben wani kon na den konmakandra, ma a no ben man libi den 85 pikin den wawan na oso. Dati meki den seti sani so taki den alamala ben man kon na a Kownukondre zaal. Fu di a presi pe den pikin e tan no de fara fu a Kownukondre zaal, meki wan tu brada ben go teki den pikin èn den ben waka nanga den go na zaal. Now a sisa nanga ala den 85 pikin e kon na den konmakandra.
„Na Gado seni yu kon”
Jennifer di e libi na Brasyonkondre ben e yepi prati a traktaat Sma di dede o man libi baka trutru? Wan dei a miti wan frow na wan oso di ben hasti ensrefi fu go na a beri fu wan bun mati fu en. Jennifer taigi en taki a ben wani gi en wan traktaat di e sori taki howpu de taki den lobiwan fu wi di dede, kan kon na libi baka. A frow skreki eife di a si a nen fu a traktaat, ma toku a teki en. Di a sisa aksi en efu a wani teki ete wan tu traktaat fu tyari gi den famiriman fu a sma di dede, a frow agri fu du dati. A aksi Jennifer ete neigi traktaat.
Bakaten Jennifer go baka na a frow èn a frow taki: „Di yu kon na mi oso a dei di mi ben o go na a beri, mi go denki a tori. A no somaar yu ben kon. A dei dati mi ben e firi sari èn na Gado seni yu kon fu trowstu mi.” A frow ben prati ala den traktaat gi sma na a beri. Wan famiriman fu a dede sma di ben musu hori a beri lezing, leisi a heri traktaat gi den sma drape. Ala den sma taki dati den ben lobi a boskopu fu a traktaat di gi den trowstu èn den taki en tangi. A frow bigin studeri Bijbel.
Den e seni sms te a weer no moi
Greg nanga Alma froisi go na a èilanti Catanduanes na ini den Filippijnen, fu di den wani dini pe moro Kownukondre preikiman de fanowdu. Na son kontren drape furu bergi de. Dati meki Greg nanga Alma musu waka sowan 19 kilometer fu doro den kontren dati. Son leisi den e pari boto sowan tu yuru langa fu go preiki na tra èilanti. Na ini na alenten, a muilek srefisrefi fu go na den kontren dati. Ma na presi fu tan na oso sondro fu preiki, den bosroiti fu seni sms gi sma fu preiki gi den. Den e gebroiki na okasi di a telefon bedrijf e gi sma fu seni omeni sms leki den wani gi wan lagi prijs.
Te Greg e seni wan sms, dan na a bigin a e skrifi gi a sma fa a nen. Baka dati a e skrifi: „Mi wani fruteri yu wan boskopu fu Bijbel.” Wan fu den Bijbeltekst di furu sma lobi na Yohanes 17:3. Baka te a skrifi a tekst, a e skrifi tu aksi: Suma na a tru Gado? Èn suma na Yesus Krestes? Dan a e aksi a sma san a ben o piki. Efu a sma e piki, dan Greg e skrifi wan tra tekst soleki Psalm 83:18. Efu a sma e tan sms en baka, dan a e aksi efu a kan bel en fu taki go doro. Greg nanga Alma e taki dati furu sma arki a boskopu na so wan fasi.
Wan uma di Greg nanga Alma ben sms, ben abi wan tu aksi fu Bijbel. Dati meki den ben seni furu sms gi makandra. Te fu kaba na uma disi bigin studeri Bijbel. Na uma fruteri wan neef fu en nanga wan uma na en wrokope, den sani di a ben e leri. Te fu kaba, den ala dri teki dopu.