A boskopu na ini Gado Wortu kenki?

Son sma e aksi densrefi efu a boskopu na ini Gado Wortu kenki. A profeiti Yesaya ben taki dati Gado Wortu „e tan fu ala ten” (Yesaya 40:8). Fa wi kan de seiker taki den sani di Gado pramisi na ini a Wortu fu en no kenki?

Gado abi a makti fu sorgu taki en Wortu no lasi gowe èn taki sma no kenki en. Na ini owruten, sma ben e skrifi kopi nanga anu. Den man di ben e du a wroko disi ben e teki den ten fu teri ibri letter fu a Santa Boskopu fu de seiker taki den no poti noso puru nowan sani èn taki den no kenki noti. Ma fu di wi leki libisma e meki fowtu, meki sonwan fu den sma di ben e du a wroko disi meki pikinpikin fowtu.

FA WI KAN DE SEIKER TAKI A BOSKOPU NA INI GADO WORTU NO KENKI?

Dusundusun kopi de fu feni fu owruten bukulolo fu Gado Wortu. Te sma teki den difrenti kopi gersi nanga makandra, dan den kan kon sabi pe wan fowtu meki.​—Efu yu wani sabi moro, dan leisi na artikel „Is de Bijbel in de loop van de tijd veranderd?”, tapu jw.org.

Fu eksempre, luku den owruten Dede Se Lolo di sma ben feni na ini den ston-olo krosibei fu a Dede Se na ini 1947. Den bukulolo disi di owru moro leki 2000 yari, abi pisi fu a Santa Boskopu fu Gado. Sabiman teki den bukulolo disi gersi nanga Gado Wortu di wi abi na ini a ten disi. San den kon si?

Di sabiman ondrosuku den owruten bukulolo finifini, dan den kon si taki den sani di skrifi na ini Gado Wortu di wi abi now, na a trutru boskopu fu Gado.a Wi kan de seiker taki Gado no gi pasi taki sma kenki a Santa Boskopu fu en.

Dati meki te wi e leisi Gado Wortu wi kan bribi taki den sani di skrifi na ini no kenki. Sobun, meki wi go luku san den profeiti fu Gado e leri wi fu en.