Sreka yu ati

Te wi e studeri Bijbel, dan wi wani taki den sani di wi e leri fu Yehovah musu naki wi ati. Wi kan leri furu fu Esra di ben „sreka en ati fu suku rai na ini a Wet fu Yehovah” (Esra 7:10). Fa wi kan sreka wi ati?

Begi. Begi ibri leisi fosi yu bigin studeri. Aksi Yehovah fu yepi yu fu ferstan san yu e leri èn fu fiti den san dati tu.​—Ps. 119:18, 34.

Abi sakafasi. Gado e kibri san tru gi den wan di abi heimemre èn e denki taki den no abi a yepi fu en fanowdu fu ferstan Bijbel (Luk. 10:21). No studeri soso fu sori trawan o furu yu sabi. Èn te wi e kon si taki wi musu tyari kenki kon, dan a bun fu abi sakafasi èn fu tyari den kenki dati kon.

Arki wan fu den singi fu wi. Poku kan abi krakti tapu den firi fu wi. Sobun, efu wi e arki wan singi fosi wi e studeri, dan dati kan yepi wi fu tan poti prakseri na Yehovah. Na so den sani di wi e leri o naki wi ati.