Isaya
19 Simemetelo lesimelene neGibhithe:+
Jehova ugibele lifu leligijima kakhulu, uta eGibhithe.
Bonkulunkulu labangenamsebenti baseGibhithe batakwesaba embikwakhe,+
Futsi inhlitiyo yeGibhithe itawuncibilika ngekhatsi kwayo.
2 “Ngitawubangela kutsi emaGibhithe avukele emaGibhithe,
Futsi atakulwa odvwana,
Nguloyo naloyo utawuvukela umnakabo namakhelwane wakhe,
Lidolobha litawuvukela lidolobha, umbuso uvukele umbuso.
3 Umoya weGibhithe utawudideka,
Ngitawudidanisa tinhlelo tayo.+
Itawufuna lusito kubonkulukulu labangenamsebenti,
Kulabenta imilingo nasetangomeni kanye nakulababhulako.+
4 Ngitawunikela iGibhithe esandleni sembusi lolukhuni,
Futsi inkhosi lecindzetelako itayibusa,”+ kusho iNkhosi yeliciniso, Jehova wemabutfo.
5 Emanti elwandle atawukoma,
Nemfula utawukusha, wome kheshe.+
6 Imifula itawunuka;
Imisele yemanti yeNayili leseGibhithe itawubohla bese iyoma.
Umhlanga nelukhwane kutawubola.+
7 Tihlahla letiseceleni kweMfula iNayili, emlonyeni weNayili,
Nayo yonkhe indzawo lehlanyelwe inhlanyelo eceleni kweNayili+ itakoma.+
Itawuphephuka futsi ngeke iphindze ibe khona.
8 Badwebi batawulila,
Labo labajika emadweba eNayili batawulila,
Labendlala emanethi abo emantini batawuba mbalwa.
9 Bantfu labasebenta ngeflekisi lelungiswe kahle+
Nalabo labenta indvwangu lemhlophe ngembongolo yekweluka, batawuhlazeka.
10 Beluki bakhona batawupitjitwa;
Tonkhe tisebenti leticashiwe, titawuba lusizi.*
11 Tindvuna taseSowani+ tilibele.
Beluleki baFaro labahlakaniphe kakhulu baniketa seluleko lesingenangcondvo.+
Ningasho kanjani nje kuFaro nitsi:
“Siyintalelwane yetihlakaniphi,
Siyintalelwane yemakhosi asendvulo”?
12 Tiphi-ke letihlakaniphi takho?+
Atikutjele nangabe tiyakwati loko Jehova wemabutfo lakuncumile mayelana neGibhithe.
13 Tindvuna taseSowani tente bulima;
Tindvuna taseNofi*+ tiyengiwe;
Baholi betive bakhona badukise iGibhithe.
14 Jehova utfululele umoya wekudideka kuyo;+
Futsi badukise iGibhithe kunome yini leyentako,
Njengemuntfu lodzakiwe loyendzela emahlanteni akhe.
15 IGibhithe angeke ibe nemsebenti letawenta,
Nome lotawentiwa sihloko nome umsila, lihlumela nome tjani lobudze.*
16 Ngalelolanga iGibhithe iyawufana nebafati, itfutfumele futsi yesabe ngenca yesandla saJehova wemabutfo lesiyingoti lasiphakamisele kumelana nayo.+ 17 Live lakaJuda litawuba yimbangela yekwesaba kweGibhithe. Batakwesaba nabeva kukhulunywa ngayo ngenca yesincumo Jehova wemabutfo lasitsetse lesimelene nayo.+
18 Ngalelolanga, kutawuba nemadolobha lasihlanu eveni laseGibhithe lakhuluma lulwimi lwaseKhenani+ futsi ente sifungo sekwetsembeka kuJehova wemabutfo. Linye lidolobha kutawutsiwa Lidolobha Lekudzilita.
19 Ngalelolanga kutawuba neli-al’thare laJehova emkhatsini welive laseGibhithe nensika yaJehova emnceleni walo. 20 Kutawuba luphawu nebufakazi kuJehova wemabutfo eveni laseGibhithe; ngobe batawukhalela Jehova ngenca yebacindzeteli futsi yena utawutfumela uMsindzisi lomkhulu lotabasindzisa. 21 Jehova utawutiveta kumaGibhithe kutsi ungubani, nemaGibhithe atawumati Jehova ngalelolanga. Ayawukwenta imihlatjelo neminikelo futsi ayawufunga kuJehova bese ayasigcwalisa sifungo sawo. 22 Jehova utawushaya iGibhithe,+ ayishaye aphindze ayelaphe; atawubuyela kuJehova futsi yena utativa ticelo tawo bese uyawelapha.
23 Ngalelolanga kutawuba nemgwaco lomkhulu+ losuka eGibhithe uye e-Asiriya. I-Asiriya itawubese ita eGibhithe, neGibhithe itawuya e-Asiriya, futsi iGibhithe itawukhonta Nkulunkulu ikanye ne-Asiriya. 24 Ngalelolanga, live laka-Israyeli litawuba lesitsatfu likanye neGibhithe ne-Asiriya.+ Atawuba sibusiso emkhatsini wemhlaba, 25 ngobe Jehova wemabutfo utawube awabusisile. Utawutsi: “Babusisiwe bantfu bami, emaGibhithe, nemsebenti wetandla tami, ema-Asiriya nelifa lami ema-Israyeli.”+