Imisebenti Yebaphostoli
25 Ngako ngemuva kwemalanga lamatsatfu Festusi+ afike kulesifundza futsi acale kubusa, waya eJerusalema esuka eKhesariya. 2 Baphristi labakhulu nebaholi bemaJuda bamnika kwatiswa lokumelene naPawula.+ Base bayamncenga, 3 batsi akabentele umusa ngekutsi atfumele kutsi Pawula ayiswe eJerusalema, ngobe bebente lisu lekumlalela endleleni kuze bambulale.+ 4 Kodvwa Festusi watsi akagcinwe eKhesariya njengobe naye besekatawubuyela khona masinyane. 5 Watsi: “Tiphatsimandla tenu atehle nami tiyommangalela nangabe vele kukhona lokubi lomuntfu lakwentile.”+
6 Ngemuva kwekucitsa emalanga langaba ngu-8 nobe langu-10 lapho, wabuyela eKhesariya, kwatsi ngakusasa wahlala esihlalweni sekwehlulela watsi Pawula akaletfwe kuye. 7 Ngesikhatsi Pawula efika, emaJuda lebekasuka eJerusalema amtungeleta, ambeka emacala lamanyenti futsi lamabi, kodvwa bekete ngisho nebufakazi bawo.+
8 Kepha Pawula watikhulumela watsi: “Kute lokubi lengikwentile lokushayisana neMtsetfo wemaJuda, nalokushayisana nelithempeli, nobe naKhesari.”+ 9 Ngenca yekutsi Festusi bekafuna kutsandvwa ngemaJuda,+ watsi kuPawula: “Uyafuna yini kuya eJerusalema kuze wehlulelwe ngaletintfo embikwami?” 10 Kodvwa Pawula watsi: “Ngime embikwesihlalo sekwehlulela saKhesari, futsi ngulapha lakufanele ngehlulelwe khona. Kute lokubi lengikwente kumaJuda njengobe nje nawe utibonela. 11 Nangabe vele nginelicala futsi ngente lokutsite lokungenta ngifanelwe kufa,+ ngeke ngikubalekele loko; kodvwa nangabe letintfo labangimangalela ngato tingasilo liciniso, kute umuntfu longanginikela kuwo. Ngako-ke lelicala ngilendlulisela kuKhesari!”+ 12 Ngesikhatsi Festusi sekakhulume nebeluleki, wabese utsi: “Licala lakho ulendlulisele kuKhesari, ngaleso sizatfu utakuya kuye.”
13 Ngemuva kwemalanga lambalwa, iNkhosi Agripha kanye naBhenise beta eKhesariya batohalalisela Festusi. 14 Njengobe bebatawuhlala emalangana, Festusi wachazela inkhosi ngalendzaba yaPawula, watsi:
“Lapha kunendvodza leyashiywa nguFeliksi ejele, 15 futsi ngesikhatsi ngiseJerusalema, baphristi labakhulu nemadvodza lamadzala langemaJuda baletse kwatiswa lokumayelana nayo,+ bacela kutsi ngiyilahle ngelicala. 16 Kodvwa ngibatjele kutsi akusiyo inchubo yemaRoma kutsi umuntfu alahlwe ngelicala abe angakalitfoli litfuba lekutiphendvulela embikwalabo labammangalelako.+ 17 Batse nabefika lapha, ngangacitsi sikhatsi, ngakusasa ngahlala esihlalweni sekwehlulela, ngatsi lomuntfu akaletfwe kimi. 18 Nabasukuma bakhuluma, labantfu labammangalele abakambeki emacala etintfo letimbi njengobe bengilindzele.+ 19 Bebamane baphikisana naye ngekukhonta kwabo bonkulunkulu*+ nangendvodza leseyafa lokutsiwa nguJesu, leyo Pawula latsi iyaphila.+ 20 Njengobe bengingati kutsi ngitawenta njani ngalendzaba, ngimbutile kutsi angatsandza yini kuya eJerusalema ayokwehlulelwa khona ngaletintfo.+ 21 Kodvwa ngesikhatsi Pawula acela kutsi agcinwe ejele abe asalindze sijubo sa-Agustusi,*+ ngitsite akachubeke ahleti khona kuze kube ngulapho ngimyisa kuKhesari.”
22 Ngako Agripha watsi kuFestusi: “Ngingatsandza kutivela matfupha kulendvodza.”+ Yena watsi: “Utawuyiva kusasa.” 23 Ngakusasa, bo-Agripha naBhenise bangena ehholweni ngekubukisa lokukhulu, bahamba netindvuna temphi nemadvodza lahloniphekile elidolobha. Festusi watsi Pawula akaletfwe kuye. 24 Wase utsi: “Nkhosi Agripha nani nonkhe lenilapha, nayi lendvodza onkhe emaJuda alapha newaseJerusalema laletse tikhalo ngayo kimi, atsi kufanele ife.+ 25 Kodvwa ngitfole kutsi ayikenti lutfo loluyenta ifanelwe kufa.+ Ngako ngesikhatsi yendlulisela licala ku-Agustusi, ngincume kuyitfumela kuye. 26 Kodvwa kute lengingakubhalela iNkhosi yami mayelana nalendvodza. Ngako ngiyiletse embikwenu nonkhe, ikakhulukati kuwe Nkhosi Agripha, kuze kutsi ngemuva kwekuhlolwa kwalelicala ngibe nalokutsite lengingakubhala. 27 Ngobe ngikubona kungasiko kuhlakanipha kutsi ngitfumele siboshwa kodvwa ngingawachazi emacala lesibekwe wona.”