Isaya
23 Simemetelo lesimayelana neThire:+
Lilani nine mikhumbi yaseThashishi!+
Ngobe sikhumulo semikhumbi sibhujisiwe; akusangeneki kuso.
Kusukela eveni laseKhithimu+ basivile lesimemetelo.
2 Thulani nine bantfu labahlala eceleni kwelwandle.
Batsengisi baseSidoni+ labawela lolwandle sebagcwele khona.
3 Ngetulu kwemanti lamanyenti kuhambe lokudliwako lokutinhlavu* kwaseShihori,*+
Sivuno seNayili, inzuzo yayo,
Iletsa inzuzo yetive.+
4 Awu Sidoni, dliwa ngemahloni, wena ndzawo levikelekile yelwandle,
Ngobe lwandle lutsite:
5 Njengesikhatsi beva umbiko lomayelana neGibhithe,+
Bantfu batawuva buhlungu kakhulu nabeva umbiko lomayelana neThire.+
6 Yewelelani eThashishi!
Lilani nine bantfu lenihlala eceleni kwelwandle!
7 Leli ngilo yini lelidolobha lakho lebelisolo lijabulile kusukela kadzeni, etikhatsini talo takucala?
Tinyawo talo betivame kulitsatsa tiliyise etindzaweni letikhashane liyohlala khona.
8 Ngubani lowente lesincumo lesimelene neThire,
Leyo lebeyibeka babusi,
Batsengisi bayo bebatindvuna,
Batsengisi bayo bebahlonishwa kuwo wonkhe umhlaba?+
9 Jehova wemabutfo lucobo lwakhe uncume kwenta loku,
Uncume kuyicedza umgcabho ngebuhle bayo,
Nekubatsela ngelihlazo bonkhe labo labebahlonishwa emhlabeni wonkhe.+
10 Dzabula live lakho njengeMfula iNayili wena ndvodzakati yaseThashishi.
Sekute ngisho nayinye indzawo yekulungisa imikhumbi.*+
11 Welulele sandla sakhe etikwelwandle;
Utamatamise imibuso.
Jehova ukhiphe umyalo wekutsi kucotfulwe tindzawo letivikelekile taseFenisiya.+
12 Yena utsi: “Angeke usajabula,+
Awu wena locindzetelwe, ndvodzakati yaseSidoni leyintfombi ntfo.
Sukuma uwelele eKhithimu.+
Ngisho nakhona ngeke ukutfole kuphumula.”
13 Buka live lemaKhaledi!+
NgemaKhaledi, akusibo bantfu base-Asiriya+
Labayente yaba yindzawo yetilwane tesiganga.
Batakhele imibhoshongo yekuyivimbetela;
Batibhidlite ngalokuphelele tigodlo tayo,+
Bayishiya itindzala.
14 Lilani nine mikhumbi yaseThashishi,
Ngobe indzawo yenu levikelekile ibhidlitiwe.+
15 Ngalelolanga, iThire batayikhohlwa iminyaka lengu-70,+ kufanane nebudze beminyaka yekuphila* kwenkhosi. Ekupheleni kweminyaka lengu-70, iThire itawufanana nengwadla lokuhlatjelwa ngayo ingoma letsi:
16 “Awu wena ngwadla lesebayikhohliwe, tsatsa lihabhu uhambahambe utungelete lelidolobha.
Dlala lihabhu lakho ngelikhono;
Hlabelela tingoma letinyenti,
Kuze kutsi bakukhumbule.”
17 Ekupheleni kweminyaka lengu-70, Jehova utawunaka iThire. Itawubuyela emsebentini wayo webugwadla futsi itawugwadla nayo yonkhe imibuso yemhlaba. 18 Kodvwa inzuzo yayo naloko lebhadelwe kona kutawuba ngcwele kuJehova. Angeke kugcinwe nobe kubekwe endzaweni letsite ngobe loko lebhadelwe kona kutawuba kwalabo labahlala embikwaJehova, kuze badle besutse baphindze bagcoke timphahla takanokusho.+