Tihlabelelo

37 Ungatfukutseli* ngenca yebantfu lababi

Nobe ube nemona ngalabenta lokubi.+

 2 Batawusheshe babune njengetjani+

Babune njengetjani lobuluhlata lobusandza kumila.

 3 Yetsemba Jehova, wente lokuhle;+

Uhlale emhlabeni,* futsi wetsembeke.+

 4 Jabula kakhulu ngaJehova,

Futsi yena utawenetisa tifiso tenhlitiyo yakho.

 5 Vumela Jehova akuhole;*+

Yetsembela kuye, futsi yena utakusita.+

 6 Utakwenta kulunga kwakho kugcame njengekukhanya kwasekuseni,

Ente kulunga kwakho kubonakale njengelilanga lasemini.

 7 Thula embikwaJehova+

Futsi umlindzele ngekulangatelela.*

Ungatfukutseli ngenca yemuntfu

Lophumelelako ebucilini bakhe.+

 8 Yekela kutfukutsela, uyekele nekuba nelulaka;+

Ungacansuki, futsi ungakwenti lokubi.*

 9 Ngobe bantfu lababi batawucedvwa,+

Kodvwa labetsembela kuJehova batawudla lifa lemhlaba.+

10 Ngemuva nje kwesikhashana, bantfu lababi ngeke basaba khona;+

Utawubuka lapho bebatfolakala khona,

Kepha batawube bangasekho.+

11 Kodvwa labamnene batawudla lifa lemhlaba,+

Futsi batawujabulela kuthula lokukhulu.+

12 Umuntfu lomubi wakha emacebo lamelene nalolungile;+

Uyatfukutsela* nakambona.

13 Kodvwa Jehova utamhleka,

Ngobe uyati kutsi lusuku lwekubhujiswa kwakhe luyeta.+

14 Lababi bahoshula tinkemba tabo, bagobe nebutjoki babo

Kuze bawise labacindzetelekile nalabeswele,

Futsi babulale labo labacotfo.

15 Kodvwa inkemba yabo itawugwaza tinhlitiyo tabo;+

Nebutjoki babo butawephuka.

16 Lokuncane lanako lolungile kuncono

Kunenala labanayo bantfu labanyenti lababi.+

17 Ngobe imikhono yalababi itawephulwa,

Kodvwa Jehova utabasekela labalungile.

18 Jehova uyakwati loko lababhekana nako labamsulwa,*

Futsi lifa labo litawuhlala kuze kube phakadze.+

19 Ngeke bahlazeke ngelilanga lenhlekelele;

Ngesikhatsi sendlala, bona batawuba nenala.

20 Kodvwa lababi batawushabalala;+

Titsa taJehova titawubuna njengemadlelo laluhlata;

Tinyamalale njengentfutfu.

21 Lomubi uyaboleka kepha angabuyiseli,

Kodvwa lolungile uyephana* futsi unemusa.+

22 Bantfu lababusiswe nguNkulunkulu batawudla lifa lemhlaba,

Kodvwa labo labacalekisile batawubhujiswa.+

23 Jehova uyamcondzisa* umuntfu+

Nangabe indlela laphila ngayo imjabulisa.+

24 Ngisho nobe angagileka, angeke awe bhu phansi,+

Ngobe Jehova utawubamba sandla sakhe.*+

25 Ngake ngaba mncane, futsi nyalo sengimdzala,

Kodvwa angikaze ngimbone lolungile alahliwe,+

Nebantfwana bakhe abahambi bacela kudla.*+

26 Uhlale abolekisa ngekukhululeka,+

Futsi bantfwana bakhe batawubusiswa.

27 Kubalekele lokubi, wente lokuhle,+

Futsi utawuhlala emhlabeni kuze kube phakadze.

28 Ngobe Jehova uyakutsandza kulunga,

Futsi angeke abalahle labetsembekile kuye.+

Batawuhlala balondzekile;+

Kodvwa bantfwana balababi batawubhujiswa.+

29 Labalungile batawudla lifa lemhlaba,+

Futsi bahlale kuwo kuze kube phakadze.+

30 Umlomo walolungile ukhuluma tintfo letihlakaniphile,*

Nelulwimi lwakhe lukhuluma lokulungile.+

31 Umtsetfo waNkulunkulu wakhe usenhlitiyweni yakhe;+

Nakahamba angeke ashelele.+

32 Lomubi ubukisisa lolungile

Kuze ambulale.

33 Kodvwa Jehova angeke amshiye esandleni salomubi+

Nobe amtfole anelicala nakamehlulela.+

34 Yetsemba Jehova futsi uhambe ngendlela yakhe,

Utakuphakamisa, futsi utawudla lifa lemhlaba.+

35 Ngike ngambona umuntfu losidlova futsi lomubi

Akhula njengesihlahla lesikhulu lesiluhlata, lesisemhlabatsini lesamilela kuwo.+

36 Kodvwa ngekushesha nje wafa futsi wanyamalala;+

Ngachubeka ngimfuna, kodvwa angizange ngimtfole.+

37 Mnakisise lomsulwa,*

Futsi uhlale umbukile lolungile,+

Ngobe umuntfu lonjalo utawuba nekuthula.+

38 Kodvwa bonkhe labenta lokubi batawubhujiswa;

Futsi bantfu lababi bete likusasa.+

39 Insindziso yalabalungile ivela kuJehova;+

Uyindzawo yabo yekukhosela ngesikhatsi sebumatima.+

Utawubakhulula kubantfu lababi futsi abasindzise,

Ngobe bakhosela kuye.+