Kulandzisa KwaLukha

12 Ngesikhatsi tinkhulungwane letinyenti tebantfu setibutsene futsi tinyatselana, wacala kukhuluma nebafundzi bakhe watsi: “Caphelani imvubelo yebaFarisi, lokukutentisa.+ 2 Ngobe kute intfo lembonywe ngekucophelela lengeke yembulwe, nobe lefihliwe lengeke yatiwe.+ 3 Ngako nobe yini leniyisho ebumnyameni iyovakala ekukhanyeni, naloko lenikusho ekusitsekeni kuyomenyetelwa etikwetindlu. 4 Ngetulu kwaloko, ngitsi kini bangani bami:+ Ningabesabi labo lababulala umtimba, babe bangeke bente lokunye lokungetulu kwaloko.+ 5 Kodvwa ngitanitjela kutsi ngubani lokufanele nimesabe: Yesabani Loyo lokutsi ngemuva kwekubulala abe nemandla ekulahla eGehena.*+ Ngako-ke ngitsi kini, nguLoyo lokufanele nimesabe.+ 6 Bojolwane labasihlanu abatsengiswa yini ngemasenti lamabili lamancane?* Nanobe kunjalo, Nkulunkulu akakhohlwa* ngisho namunye wabo.+ 7 Kodvwa-ke kini kubalwe tonkhe tinwele letisetinhloko tenu.+ Ngako-ke ningesabi, nine nibaluleke kwendlula bojolwane labanyenti.+

8 “Ngitsi kini: Nobe ngubani lovuma embikwebantfu kutsi ungumfundzi wami,+ neNdvodzana yemuntfu itamvuma embikwetingilosi taNkulunkulu kutsi ungumfundzi wayo.+ 9 Kodvwa loyo longiphikako embikwebantfu, nami ngitamphika embikwetingilosi taNkulunkulu.+ 10 Wonkhe umuntfu lokhuluma kabi ngeNdvodzana yemuntfu utawutsetselelwa, kodvwa loyo lohlambalata umoya longcwele ngeke atsetselelwe.+ 11 Nabaniyisa embikwebantfu,* kubabusi nakulabanemagunya, ningakhatsateki ngekutsi nitatiphendvulela kanjani nobe kutsi nitawutsini,+ 12 ngobe umoya longcwele utanifundzisa ngaso leso sikhatsi tintfo lokufanele nitisho.”+

13 Lomunye lobekakulesicumbi sebantfu watsi kuye: “Mfundzisi, tjela umnaketfu angabele incenye yelifa.” 14 Jesu watsi kuye: “Ndvodza, ngubani longente umehluleli nemlamuli wenu?” 15 Ngako watsi kubo: “Caphelani, futsi nitibalekele tonkhe tinhlobo tebukhali,*+ ngobe ngisho nalapho umuntfu anjingile kuphila kwakhe akuveli etintfweni lanato.”+ 16 Ngemuva kwaloko, wabatjela umfanekiso watsi: “Umhlaba walenye indvodza lebeyinjingile bewukhicita kakhulu. 17 Ngako lendvodza yacabanga yatsi: ‘Sengitawenta njani njengobe sengite indzawo yekubeka sivuno sami?’ 18 Yabese itsi: ‘Ngitawenta loku:+ Ngitawubhidlita tinyango tami ngakhe letinkhulu, bese ngibutsela khona sivuno sami nato tonkhe tintfo tami letinhle. 19 Ngitawubese ngitsi: “Nyalo senginencumbi yetintfo letinhle lengitatisebentisa iminyaka leminyenti, ngako angiphumule, ngidle, nginatse futsi ngitijabulise.”’ 20 Kodvwa Nkulunkulu watsi kulendvodza: ‘Muntfu lote ingcondvo, lamuhla ebusuku utakufa.* Titawuba tabani-ke tonkhe letintfo lotibutsisile?’+ 21 Kunjalo-ke ngemuntfu lotibekela umcebo kodvwa abe angakacebi emehlweni aNkulunkulu.”+

22 Ngako watsi kubafundzi bakhe: “Ngitsi kini: Ningakhatsateki ngekuphila kwenu mayelana nekutsi nitawudlani, nobe ngemitimba yenu mayelana nekutsi nitawugcokani.+ 23 Ngobe kuphila kubaluleke kakhulu kwendlula kudla, nemtimba ubaluleke kakhulu kwendlula kwekugcoka. 24 Bukisisani emahhwabayi. Awalimi, futsi awavuni; ete tincolobane nobe tinyango. Nanobe kunjalo, Nkulunkulu uyawondla.+ Nine anikabaluleki yini kakhulu kwendlula tinyoni?+ 25 Ukhona yini kini longatsi ngekukhatsateka kwakhe engete umzuzu* nje ekuphileni kwakhe? 26 Nangabe ningeke nibe nemandla ekwenta loku lokuncane, nitikhatsatelani-ke ngaleti letinye tintfo?+ 27 Bukisisani indlela timbali letikhula ngayo; atisebenti kamatima futsi atitfungi, kodvwa ngiyanitjela ngitsi, naSolomoni ebukhatikhatini bakhe abengagcoki njengato.+ 28 Nangabe Nkulunkulu atembatsisa ngalendlela timbali tesiganga letikhona lamuhla bese kusasa tiyahhohloka, ngeke yini anembatsise nine leninekukholwa lokuncane? 29 Ningakhatsateki ngekutsi nitawudlani nangekutsi nitawunatsani, futsi yekelani kukhatsateka kakhulu,+ 30 ngobe tonkhe letintfo ngito bantfu betive labatifuna kakhulu, kodvwa Babe wenu uyati kutsi niyatidzinga.+ 31 Esikhundleni saloko, chubekani nifuna uMbuso wakhe, futsi letintfo nitawunikwa tona.+

32 “Ningesabi mhlambi lomncane,+ ngobe Babe wenu uyajabula ngekuninika uMbuso.+ 33 Tsengisani loko leninako, niphe labanye.*+ Yentani tipatji temali letingagugi, lokungumcebo losemazulwini longapheli,+ lapho emasela angeke agcekeze khona ebe, nemvunya ungeke udle khona. 34 Ngobe lapho umcebo wenu ukhona khona, kulapho netinhlitiyo tenu titawuba khona.

35 “Gcokani futsi nitilungiselele,*+ netibane tenu tivutse,+ 36 nibe njengebantfu labalindzele kutsi inkhosi yabo ibuye+ emshadweni,+ kuze kutsi nayifika futsi inconcotsa bayivulele ngekushesha. 37 Tiyajabula leto tisebenti lokutsi inkhosi yato nayifika ititfole tilindzile! Ngicinisile ngitsi kini: Itawugcoka* ilungele kusebenta, ihlalise letisebenti etafuleni, ngemuva kwaloko ite itinike kudla. 38 Tiyajabula leto tisebenti nangabe kwenteka ifika ebusuku kakhulu,* nobe entsatsakusa* ititfole tilindzile! 39 Kodvwa yatini kutsi kube umnikati wendlu bekati kutsi lisela litawufika ngasiphi sikhatsi, bekangeke avume kutsi indlu yakhe igcekezwe.+ 40 Ngako-ke nani hlalani nilungele, ngobe iNdvodzana yemuntfu itawufika ngesikhatsi leningakasilindzeli.”+

41 Phetro watsi: “Nkhosi, lomfanekiso uwusho kitsi kuphela yini nobe uwusho nakubo bonkhe labantfu?” 42 INkhosi yatsi: “Ngubani vele longumphatsi lowetsembekile nalohlakaniphile, loyo inkhosi yakhe letawumbeka ngetulu kwaletinye tisebenti tayo, kuze ahlale atinika kudla lokwenele ngesikhatsi lesifanele?+ 43 Siyajabula leso sisebenti lokutsi inkhosi yaso nayifika isitfole senta njalo! 44 Nginitjela liciniso ngitsi: Itawusibeka ngetulu kwako konkhe lokukwayo. 45 Kodvwa nakungenteka lesisebenti sitsi enhlitiyweni yaso: ‘Inkhosi yami seyephutile kufika,’ bese sicala kushaya leletinye tisebenti, sidle, sinatse futsi sidzakwe,+ 46 inkhosi yaso itawufika ngelilanga lesingakayilindzeli ngalo nangesikhatsi lesingasati, futsi itawusijezisa kabuhlungu, iphindze isibeke nalabangaketsembeki. 47 Ngako lesisebenti lebesikwati loko lokufunwa yinkhosi yaso kodvwa sangakulungeli kufika kwayo nobe sangakwenti loko lekushito,* sitawushaywa kakhulu.+ 48 Kepha leso lebesingakwati loko lokufunwa yinkhosi yaso futsi senta tintfo letisenta sifanelwe kushaywa, sitawushaywa kancane. Ngako nobe ngubani lonikwe lokunyenti kutawufunwa lokunyenti kuye, nanobe ngubani lobekaphatsiswe lokukhulu, kutawufunwa lokukhulu kakhulu kuye.+

49 “Ngitele kutobasa umlilo emhlabeni, ngako yini lenye lengingabe ngisayifuna nangabe sewuvele ubasiwe? 50 Kunekubhajatiswa lokufanele ngibhajatiswe ngako, futsi ngitawucindzeteleka kakhulu kuze kuphele!+ 51 Nicabanga kutsi ngitele kutoletsa kuthula yini emhlabeni? Cha, angiketeli kutoletsa kuthula, kodvwa ngitoletsa kwehlukana.+ 52 Ngobe kusukela nyalo endlini yinye labasihlanu batawehlukana, labatsatfu bamelane nalababili, nalababili bamelane nalabatsatfu. 53 Batowehlukana, babe amelane nendvodzana, nendvodzana imelane nababe wayo, make amelane nendvodzakati, nendvodzakati imelane namake wayo, maketala amelane namakoti, namakoti amelane namaketala.”+

54 Wachubeka watsi kulesicumbi sebantfu: “Nanibona kukhuphuka lifu livela ngasenshonalanga, nivele nitsi: ‘Kuta siphepho,’ futsi kuba njalo. 55 Nanibona kuhhusha umoya waseningizimu, nitsi: ‘Litawushisa kakhulu,’ futsi kuvele kube njalo. 56 Batentisi, niyakhona kucondza kubukeka kwemhlaba nesibhakabhaka, kodvwa kwentiwa yini kutsi nehluleke kucondza loko lokwentekako nyalo?+ 57 Kungani-ke ningatiboneli nine kutsi yini lelungile? 58 Nawusahamba naloyo lokumangalele niya kumbusi, yetama kulungisa inkinga naye, kuze angakumikisi kumehluleli, nemehluleli angakunikeli kubogadzi, bese bona bakufaka ejele.+ 59 Ngitsi kuwe: Ngeke uphume lapho ungakakhiphi yonkhe imali, ngisho neyekugcina.”*