Yekucala KubaseThesalonika
5 Bazalwane, kute lenidzinga kubhalelwa kona mayelana netikhatsi nemalanga labekiwe. 2 Ngobe nani nati kahle kutsi lilanga laJehova*+ lita ngendlela lefana ncamashi neyelisela ebusuku.+ 3 Nome nini lapho batsi: “Kuthula nekulondzeka!” kubhujiswa kuyawubatuma ngekushesha lokukhulu,+ njengemihelo lefikela umfati lotetfwele, futsi ngeke bakhone kukubalekela. 4 Kodvwa nine bazalwane anikho ebumnyameni, kutsi lelilanga lingefika ningakalilindzeli njengelisela, 5 ngobe nonkhe ningemadvodzana ekukhanya newemini.+ Asisibo bebusuku nobe bebumnyama.+
6 Ngako asingalali njengabo bonkhe labanye,+ kodvwa asihlale siphapheme+ futsi sisangulukile etingcondvweni.+ 7 Labo labalalako balala ebusuku, nalabadzakwako badzakwa ebusuku.+ 8 Kodvwa tsine lesibemini, asisanguluke engcondvweni, sifake sivikelo sesifuba lesikukholwa nelutsandvo, nesigcoko sekutivikela lesilitsemba lensindziso;+ 9 ngobe Nkulunkulu akazange asikhetsele kutsi asijezise,* kodvwa wasikhetsa kuze sisindziswe+ ngeNkhosi yetfu Jesu Khristu. 10 Yasifela+ kuze kutsi ngisho nobe sihlala siphapheme nobe silele,* sitophila kanye nayo.+ 11 Ngako chubekani nikhutsatana* futsi nakhana,+ njengobe nje nenta.
12 Siyanincenga bazalwane kutsi nibahloniphe labo labasebenta kamatima emkhatsini wenu, labanengamele eNkhosini, futsi labaniyalako; 13 niphindze nibacabangele kakhulu ngelutsandvo ngenca yemsebenti labawentako.+ Hlalisanani ngekuthula.+ 14 Ngakulokunye, siyanincenga bazalwane kutsi nibecwayise* labo labangalaleli,+ nikhulume ngendlela ledvudvutako nalabakhatsatekile,* nisekele lababutsakatsaka, futsi nibeketelele bonkhe bantfu.+ 15 Caphelani kutsi kube bete lophindzisela lokubi ngalokubi kulomunye,+ kodvwa ngaso sonkhe sikhatsi yentani lokuhle kulomunye nalomunye, nakubo bonkhe labanye.+
16 Nibojabula ngaso sonkhe sikhatsi.+ 17 Hlalani nithantaza.+ 18 Nibobonga ngato tonkhe tintfo.+ Loku kuyintsandvo yaNkulunkulu ngani kuKhristu Jesu. 19 Ningawucimi umlilo wemoya.+ 20 Ningatedzeleli tiphrofetho.+ 21 Cinisekani ngato tonkhe tintfo;+ nibambelele kulokuhle. 22 Tibalekeleni tonkhe tinhlobo tebubi.+
23 Bazalwane, shengatsi Nkulunkulu wekuthula anganingcwelisa ngalokuphelele. Shengatsi umoya wenu nekuphila* kwenu kanye nemtimba wenu, kungaba bete sici kunobe yini, futsi kungasoleki esikhatsini sekuba khona kweNkhosi yetfu Jesu Khristu.+ 24 Loyo lonibitako wetsembekile, futsi loku utakwenta nakanjani.
25 Bazalwane, chubekani nisithantazela.+
26 Bingelelanani ngekwanga kwebuzalwane.
27 Egameni leNkhosi, ngininika umtfwalo wekutsi lencwadzi niyifundzele bonkhe bazalwane.+
28 Shengatsi umusa lomkhulu weNkhosi yetfu Jesu Khristu ungaba nani.