Kulandzisa KwaMakho
8 Kulawo malanga kwaphindze kwabutsana sicumbi lesikhulu sebantfu, futsi besite kudla. Ngako Jesu wabita bafundzi bakhe watsi kubo: 2 “Ngiyabavela labantfu+ ngobe sekuphele emalanga lamatsatfu solo banami futsi bete nekudla.+ 3 Nangingabayekela bahambe balambile* bangaphelelwa ngemandla endleleni, ngobe labanye babo basuka khashane.” 4 Kodvwa bafundzi bakhe bamphendvula batsi: “Kulendzawo lesiganga, singatitsatsaphi tinkhwa letingesutsisa labantfu labangaka?” 5 Jesu wababuta watsi: “Tingakhi tinkhwa leninato?” Bona batsi: “Tingu-7.”+ 6 Wase utjela labantfu kutsi bahlale phansi. Ngemuva kwaloko watsatsa letinkhwa letingu-7, wabonga wase uyatihlephula futsi watinika bafundzi bakhe, bona batinika labantfu.+ 7 Labafundzi bebanetinhlanti letincane letimbalwa, ngako ngemuva kwekubonga, Jesu watsi abatinike labantfu. 8 Badla besutsa, futsi bafundzi babutsa kudla lobekusele, kwagcwala bobhasikidi labakhulu labangu-7.+ 9 Kwadla emadvodza langaba ngu-4 000. Ekugcineni Jesu wabahambisa labantfu.
10 Ngekushesha wagibela esikebheni akanye nebafundzi bakhe, futsi wefika esifundzeni saseDalmanutha.+ 11 Nakefika lapho, kweta baFarisi futsi bacala kumphikisa, bafuna kutsi abentele sibonakaliso lesivela ezulwini kute bamlinge.+ 12 Ngako Jesu weva buhlungu lobukhulu enhlitiyweni yakhe, watsi: “Kungani lesitukulwane sifuna sibonakaliso?+ Ngicinisile ngitsi: Kute sibonakaliso lesitawunikwa sona.”+ 13 Ngemuva kwekusho loko, wagibela esikebheni waya ngesheya kwelwandle.
14 Kodvwa bafundzi bakhohlwa kuphatsa tinkhwa, futsi bebete lutfo esikebheni ngaphandle kwesinkhwa sinye.+ 15 Ngako wabecwayisa watsi: “Caphelani imvubelo yebaFarisi neyaHerodi.”+ 16 Base bacala kukhuluma bodvwa ngekutsi bakhohlwe kuphatsa tinkhwa. 17 Jesu wakubona loko, ngako watsi: “Niphikisanelani ngekutsi nikhohlwe kuphatsa tinkhwa? Kwentiwa yini kutsi ningacondzi futsi ningayitfoli inchazelo? Solo anicondzi yini? 18 ‘Nanobe ninemehlo, aniboni yini, futsi nanobe ninetindlebe, aniva yini?’ Kantsi anisakhumbuli yini 19 kutsi bangakhi bobhasikidi lenabagcwalisa ngesikhatsi ngihlephula tinkhwa letisihlanu,+ ngitihlephulela bantfu labangu-5 000?” Bamphendvula batsi: “Sagcwalisa labangu-12.”+ 20 “Anisakhumbuli yini nekutsi bangakhi bobhasikidi labakhulu lenabagcwalisa ngesikhatsi ngihlephulela bantfu labangu-4 000 tinkhwa letingu-7?” Bamphendvula batsi: “Sagcwalisa labangu-7.”+ 21 Ngako watsi kubo: “Solo anicondzi nanyalo?”
22 Babese befika eBhethsayida. Bantfu baletsa indvodza lebeyingaboni emehlweni, bamncenga kutsi ayitsintse.+ 23 Ngako wayibamba ngesandla waya nayo ngephandle kwalelidolobhana. Ngemuva kwekukhafulela emehlweni ayo,+ wabeka tandla takhe kuyo, wayibuta watsi: “Kukhona yini lokubonako?” 24 Lendvodza yaphakamisa emehlo, yase itsi: “Ngibona bantfu, kodvwa ngatsi tihlahla letihambako.” 25 Jesu waphindze wabeka tandla takhe emehlweni alendvodza, ngako yelapheka yase ibona kahle. 26 Ngemuva kwaloko wayitjela kutsi ayiye ekhaya, watsi kuyo: “Ungabuyeli edolobheni.”
27 Jesu nebafundzi bakhe babese baya emadolobhaneni aseKhesariya Filiphi, futsi ngesikhatsi basendleleni Jesu wababuta watsi: “Bantfu batsi ngingubani?”+ 28 Bona batsi: “Labanye batsi unguJohane uMbhabhatisi;+ labanye batsi ungu-Elija,+ kantsi labanye batsi ungulomunye webaphrofethi.” 29 Wase uyababuta utsi: “Nine-ke nitsi ngingubani?” Phetro wamphendvula watsi: “UnguKhristu.”+ 30 Ngemuva kwaloko wabecwayisa kutsi bangatjeli muntfu ngaye.+ 31 Waphindze wabatjela nekutsi iNdvodzana yemuntfu itawuhlupheka futsi ngeke yemukelwe ngemadvodza lamadzala, baphristi labakhulu kanye netati temtsetfo, nekutsi itawubulawa+ bese iyavuswa ngemuva kwemalanga lamatsatfu.+ 32 Jesu bekabatjela loku ngalokucacile. Kodvwa Phetro wambitela eceleni wamekhuta.+ 33 Jesu wagucuka wabuka bafundzi bakhe, wase wekhuta Phetro watsi: “Suka* Sathane! Ngobe awucabangisi kwaNkulunkulu, kodvwa ucabangisa kwebantfu.”+
34 Wase ubita sicumbi sebantfu kanye nebafundzi bakhe, watsi kubo: “Nangabe umuntfu afuna kungilandzela, akatidzele futsi avume kuhlushwa* bese ungilandzela njalo.+ 35 Ngobe nobe ngubani lofuna kusindzisa kuphila kwakhe utawulahlekelwa ngiko, kodvwa nobe ngubani lolahlekelwa kuphila kwakhe ngenca yami nangenca yetindzaba letimnandzi, utakusindzisa.+ 36 Ngobe umuntfu utawuzuzani nangabe atfola konkhe lokuseveni kodvwa alahlekelwe kuphila kwakhe?+ 37 Kantsi futsi yini umuntfu langanikela ngayo kute ahlenge kuphila kwakhe?+ 38 Ngobe nobe ngubani lonemahloni ngami nangemavi ami kulesitukulwane lesingaketsembeki* futsi lesonako, iNdvodzana yemuntfu nayo iyawuba nemahloni ngaye+ nayifika inemandla lewanikwe nguBabe wayo ikanye netingilosi letingcwele.”+