Kulandzisa KwaJohane
21 Ngemuva kwaloko, Jesu waphindze wativeta kubafundzi bakhe ngaseLwandle lwaseThibheriyase. Ngulena indlela lativeta ngayo. 2 Simoni Phetro, naTomase (lobekabitwa ngekutsi Liphahla),+ naNathanayeli+ waseKhana yaseGalile, nemadvodzana aZebedi,+ kanye nalabanye bafundzi lababili, bebahlangene ndzawonye. 3 Simoni Phetro watsi kubo: “Ngisayodweba.” Bona batsi: “Natsi sitawuhamba nawe.” Ngako bahamba bagibela sikebhe, kodvwa kubo bonkhe lobo busuku abazange babambe lutfo.+
4 Kwatsi nasekusa, Jesu wema elugwini, kodvwa labafundzi abazange babone kutsi bekunguye.+ 5 Ngako Jesu watsi kubo: “Bantfwana labatsandzekako, ninako yini* lokudliwako?” Bona batsi: “Cha!” 6 Yena watsi kubo: “Jikani lelinethi ngesekudla salesikebhe, futsi tikhona lenitatibamba.” Ngako balijika, kodvwa abazange basakhona kulidvonsa ngobe beseligcwele tinhlanti.+ 7 Lomfundzi lobekatsandvwa nguJesu+ watsi kuPhetro: “YiNkhosi!” Watsi Simoni Phetro nakeva kutsi yiNkhosi, wagcoka* ingubo yakhe yangetulu ngobe bekacimbile,* wase utijika elwandle. 8 Lalabanye bafundzi beta ngalesikebhe lesincane badvonsa lelinethi lebeligcwele tinhlanti, ngobe besekusele kancane bafike elugwini, sekusele emamitha langaba ngu-90* kuphela.
9 Nabefika elugwini, babona emalahle lavutsako, futsi bekubekwe tinhlanti nesinkhwa etikwawo. 10 Jesu watsi kubo: “Letsani letinye taletinhlanti lenitibambile.” 11 Ngako Simoni Phetro wagibela esikebheni wadvonsela lelinethi elugwini, futsi beligcwele tinhlanti letinkhulu letingu-153. Nanobe lelinethi beligcwele, alizange lidzabuke. 12 Jesu watsi: “Wotani nitokudla.” Kute ngisho namunye kulabafundzi lowaba nesibindzi sekumbuta atsi: “Ungubani?” Ngobe bebati kutsi yiNkhosi. 13 Jesu watsatsa lesinkhwa wabanika, wenta kanjalo nangaletinhlanti. 14 Besekukwesitsatfu+ Jesu ativeta kubafundzi bakhe ngemuva kwekuvuswa ekufeni.
15 Batsi nasebacedzile kudla, Jesu watsi kuSimoni Phetro: “Simoni ndvodzana yaJohane, uyangitsandza yini kwendlula leti?” Yena wamphendvula watsi: “Yebo Nkhosi, uyati kutsi ngiyakutsandza.” Jesu watsi kuye: “Yondla emawundlu ami.”+ 16 Wakhuluma naye kwesibili watsi: “Simoni ndvodzana yaJohane, uyangitsandza yini?” Yena wamphendvula watsi: “Yebo Nkhosi, uyati kutsi ngiyakutsandza.” Jesu watsi kuye: “Yelusa emawundlu ami.”+ 17 Waphindze wakhuluma naye kwesitsatfu watsi: “Simoni ndvodzana yaJohane, uyangitsandza yini?” Phetro weva buhlungu ngobe besekambuta kwesitsatfu kutsi: “Uyangitsandza yini?” Ngako watsi: “Nkhosi, wena wati tonkhe tintfo; uyati kutsi ngiyakutsandza.” Jesu watsi kuye: “Yondla emawundlu ami.+ 18 Ngicinisile, ngicinisile ngitsi kuwe: Ngesikhatsi usemusha, bewutigcokisa uphindze uye lapho ufuna kuya khona. Kodvwa utawutsi nasewukhulile welule tandla takho, lomunye umuntfu akugcokise, akuyise nalapho ungatsandzi khona.” 19 Jesu washo lamavi kuze avete indlela Phetro lebekatawufa ngayo, nekutsi loko bekutawukhatimulisa Nkulunkulu. Nasekakushito loko, watsi kuye: “Chubeka ungilandzela.”+
20 Watsi Phetro nakagucuka, wabona kuta lomfundzi lobekatsandvwa+ nguJesu, loyo lobekahleti eceleni kwaJesu esidlweni sakusihlwa, futsi lowatsi: “Nkhosi, ngubani lona lotakutsengisa?” 21 Ngako ngesikhatsi Phetro ambona, watsi kuJesu: “Nkhosi, lona-ke kutawentekani kuye?” 22 Jesu wamphendvula watsi: “Nangabe kuyintsandvo yami kutsi ahlale ngize ngifike, loko kukuhluphe ngani wena? Chubeka ungilandzela.” 23 Ngenca yaloko, lenkhulumo yekutsi lomfundzi ngeke afe yefika nakulabanye bafundzi. Kodvwa Jesu bekangakasho kutsi lomfundzi ngeke afe, esikhundleni saloko bekatsite: “Nangabe kuyintsandvo yami kutsi ahlale ngize ngifike, loko kukuhluphe ngani wena?”
24 Lona ngulomfundzi+ lowafakaza ngaletintfo nalowabhala ngato, siyati nekutsi bufakazi bakhe buliciniso.
25 Ecinisweni, tinyenti letinye tintfo letentiwa nguJesu, futsi ngicabanga kutsi kube tabhalwa tonkhe, bekungeke kube nendzawo leyenele yekugcina yonkhe lemiculu lebeyingabhalwa.+