Incwadzi Yekucala YemaKhosi

8 Ngaleso sikhatsi Solomoni wahlanganisa+ emadvodza lamadzala aka-Israyeli, bonkhe baholi betive kanye netinhloko temindeni yaka-Israyeli.+ Beta eNkhosini Solomoni eJerusalema batoletsa libhokisi lesivumelwane saJehova, besuka nalo eDolobheni laDavide,+ iSiyoni.+ 2 Onkhe emadvodza aka-Israyeli ahlangana embikweNkhosi Solomoni emkhosini* ngenyanga ya-Ethanimu,* lokuyinyanga yesi-7.+ 3 Ngako onkhe emadvodza lamadzala aka-Israyeli efika futsi baphristi baphakamisa leLibhokisi.+ 4 Baletsa Libhokisi LaJehova, lithende lekuhlangana+ kanye nato tonkhe titja letingcwele lebetikulelithende. Baphristi nemaLevi ngibo labeta nako. 5 INkhosi Solomoni kanye naso sonkhe sive saka-Israyeli lebesibitwe ngiyo kuze ibambe umhlangano naso, bebasembikwaleLibhokisi. Ngako kwentiwa umhlatjelo+ ngetimvu nangetinkhomo letinyenti kakhulu kangangekutsi bekulukhuni kutibala.

6 Baphristi babese bangenisa lelibhokisi lesivumelwane saJehova endzaweni yalo,+ ekamelweni lelingekhatsi lalendlu, lokuyiNgcwelengcwele. Balibeka ngephansi kwetimphiko temakherubhi.+

7 Ngaleyondlela, letimphiko talamakherubhi betivulekele ngetulu kwalendzawo yeLibhokisi, kangangekutsi lamakherubhi bekambonya leLibhokisi kanye netibambo talo.+ 8 Letibambo+ betitindze kangangekutsi incenye lesekugcineni yato beyibonakala nawuseNgcwele embikwelikamelo lelingekhatsi kodvwa tingabonakali nawungephandle kwalo. Letibambo solo tilapho nalamuhla. 9 KuleLibhokisi bekutfolakala kuphela ematje lamabili latibhelekece+ lafakwa nguMosi+ eHorebe ngesikhatsi Jehova enta sivumelwane+ nebantfu baka-Israyeli nabaphuma eveni laseGibhithe.+

10 Ngesikhatsi baphristi baphuma endzaweni lengcwele, lifu+ lagcwala lendlu yaJehova.+ 11 Baphristi abakhonanga kuchubeka benta imisebenti yabo ngenca yalelifu, ngobe inkhatimulo yaJehova yagcwala lendlu yaJehova.+ 12 Ngaleso sikhatsi, Solomoni watsi: “Jehova watsi utawuhlala ebumnyameni lobukhansa phansi.+ 13 Ngiphumelele kukwakhela indlu lephakeme, indzawo yakho lotawuhlala kuyo kuze kube phakadze.”+

14 Ngemuva kwaloko, inkhosi yagucuka yabusisa sonkhe sive saka-Israyeli ngesikhatsi sonkhe lesive sisemile.+ 15 Yatsi: “Shengatsi Jehova Nkulunkulu wema-Israyeli angadvunyiswa, yena ngemlomo wakhe wetsembisa babe wami Davide futsi ngesandla sakhe ukugcwalisile loko, watsi, 16 ‘Kusukela ngelilanga lengakhipha ngalo bantfu bami ema-Israyeli eGibhithe angikaze ngikhetse lidolobha kuto tonkhe tive taka-Israyeli lokutakwakhiwa kulo indlu letawubitwa ngelibito lami kuze lihlale lapho,+ kodvwa ngikhetse Davide kutsi abuse bantfu bami ema-Israyeli.’ 17 Bekusifiso senhlitiyo yababe wami Davide kwakha indlu letawubitwa ngelibito laJehova Nkulunkulu wema-Israyeli.+ 18 Kodvwa Jehova watsi kubabe wami Davide, ‘Bekusifiso senhlitiyo yakho kwakha indlu letawubitwa ngelibito lami, futsi wente kahle kakhulu ngekuba naleso sifiso enhlitiyweni yakho. 19 Nome kunjalo, angeke uyakhe lendlu kodvwa indvodzana yakho letawutalwa nguwe,* ngiyo letakwakha lendlu letawubitwa ngelibito lami.’+ 20 Jehova usifezile setsembiso lasenta ngobe sengilandzele babe wami Davide futsi ngihleti esihlalweni sebukhosi saka-Israyeli njengobe Jehova etsembisa. Ngiphindze ngakha lendlu lebitwa ngelibito laJehova Nkulunkulu wema-Israyeli+ 21 futsi kulendlu ngilungise indzawo yaleLibhokisi lelinesivumelwane+ lesentiwa nguJehova nabokhokho betfu ngesikhatsi abakhipha eveni laseGibhithe.”

22 Solomoni wabese uma embikweli-al’thare laJehova, embikwaso sonkhe lesive saka-Israyeli, futsi waphakamisela tandla takhe emazulwini,+ 23 watsi: “Awu Jehova Nkulunkulu wema-Israyeli, kute Nkulunkulu lonjengawe+ etulu emazulwini nobe phansi emhlabeni, logcina sivumelwane futsi lotitsandza ngelutsandvo lolucotfo+ tinceku takhe letihamba embikwakhe* ngayo yonkhe inhlitiyo yato.+ 24 Usigcinile setsembiso lowasenta encekwini yakho Davide, babe wami. Wenta lesetsembiso ngemlomo wakho futsi lamuhla usigcwalisile ngesandla sakho.+ 25 Manje-ke, Jehova Nkulunkulu wema-Israyeli, gcina setsembiso lowasenta encekwini yakho Davide, babe wami ngalesikhatsi utsi: ‘Angeke kwenteke kutsi kungabi nendvodza esitukulwaneni sakho letawuhlala embikwami esihlaweni sebukhosi saka-Israyeli, kuphela nje nangabe emadvodzana akho akucaphelisisa konkhe lakwentako, ngekuhamba embikwami njengobe nawe uhambile embikwami.’+ 26 Awu Nkulunkulu wema-Israyeli, nyalo ngicela usente sifezeke lesetsembiso lowasenta encekwini yakho Davide lengubabe wami.

27 “Kodvwa Nkulunkulu angahlala yini emhlabeni?+ Ngisho emazulu, emazulu laphakeme kakhulu angeke akwetfwale;+ kangakanani-ke lendlu lengiyakhile!+ 28 Awu Jehova Nkulunkulu wami, lalela umthantazo wenceku yakho nekuncusa kwayo kwekucela umusa uphindze ulalele nayicela lusito, ulalele umthantazo inceku yakho lewuthantaza embikwakho lamuhla. 29 Shengatsi emehlo akho angahlale abuke lendlu busuku nemini, shengatsi angahlale abuke lendzawo lowatsi ngayo, ‘Libito lami liyohlala lapho,’+ kute ulalele umthantazo inceku yakho lewuthantaza ibuke kulendzawo.+ 30 Lalela nemthantazo wenceku yakho nayicela umusa, ulalele neticelo tebantfu bakho ema-Israyeli nabathantaza kulendzawo, shengatsi ungeva usendzaweni lohlala kuyo emazulwini;+ shengatsi ungeva futsi utsetselele.+

31 “Nangabe umuntfu aphoce umuntfu wakubo wase uyafungiswa* futsi kwatsiwa utawulandzisa nakangakwenti loko lakufungile,* futsi atsi asente leso sifungo* ete embikweli-al’thare lakho kulendlu,+ 32 shengatsi wena ungabese uyeva usemazulwini, utsatse sinyatselo futsi wehlulele tinceku takho ngekutsi umlahle ngelicala umuntfu lomubi bese uyamjezisa ngesento sakhe, kodvwa kulolungile wena Nkulunkulu ubotsi umsulwa futsi umnikete umvuzo, kuye ngekulunga kwakhe.+

33 “Nangabe bantfu bakho ema-Israyeli bancotjwa sitsa ngenca yekutsi bebasolo bona kuwe,+ bese bayaphendvuka baphindze bakhatimulise libito lakho,+ bathantaze futsi bakuncenge kutsi ubentele umusa nabathantaza bakulendlu,+ 34 shengatsi wena ungabese uyeva usemazulwini futsi utsetselele sono sebantfu bakho ema-Israyeli uphindze ubabuyisele eveni lowalinika bokhokho babo.+

35 “Nangabe emazulu avaliwe futsi sekute imvula+ ngenca yekutsi bachubeka nekona kuwe,+ bese bayathantaza bakulendzawo futsi bakhatimulise libito lakho baphindze baphendvuke esonweni sabo ngobe wena sewubatfobisile,*+ 36 shengatsi ungabese uyeva usemazulwini futsi utsetselele sono setinceku takho, lokubantfu bakho ema-Israyeli, ngobe utabafundzisa+ indlela lengiyo lokufanele bahambe ngayo; bese unisa imvula eveni lakho+ lowalinika bantfu bakho kutsi libe lifa labo.

37 “Nakwenteka lelive lihlaselwa somiso,+ nobe sifo lesibulalako, sifo lesicotfulako setilimo, sifo lesibulala titjalo,+ libulo letintsetse, nome sikhonyane* lesishwabadzelako; nangabe sitsa sabo sibavimbetela kunome ngabe nguliphi lidolobha leliseveni labo* nome nangabe kuvela nobe ngabe ngusiphi sishayo nobe sifo,+ 38 ngisho nome bathantazela ini, benta nome ngusiphi sicelo semusa+ lesingentiwa ngunoma ngabe ngubani nobe ngibo bonkhe bantfu baka-Israyeli (ngoba nguloyo naloyo uyabati buhlungu lobusenhlitiyweni yakhe)+ nabaphakamisa tandla tabo babuke kulendlu, 39 shengatsi ungalalela usemazulwini, indzawo lohlala kuyo,+ futsi shengatsi ungacolela,+ utsatse nesinyatselo; unike umuntfu umvuzo kuye ngato tonkhe tindlela takhe+ ngobe uyayati inhlitiyo yakhe (nguwe kuphela loyati kahle inhlitiyo yemuntfu nemuntfu)+ 40 kuze bakwesabe onkhe emalanga labatawaphila eveni lowalinika bokhokho babo.

41 “Mayelana nemuntfu wakulesinye sive, longesiyo incenye yebantfu bakho ema-Israyeli futsi lochamuka eveni lelikhashane ngenca yelibito lakho*+ 42 (ngobe batawukuva ngelibito+ lakho lelikhulu nangesandla sakho lesinemandla, kanye nangemikhono yakho leyelulekile), lofike athantaze kulendlu, 43 shengatsi ungabese uyalalela usemazulwini, indzawo lohlala kuyo,+ wente konkhe lokucelwa ngulomuntfu walesinye sive kuze bonkhe bantfu labasemhlabeni balati libito lakho, bakwesabe,+ njengobe bantfu bakho ema-Israyeli benta futsi shengatsi bangati kutsi lendlu lengiyakhile ibitwa ngelibito lakho.

44 “Nakwenteka bantfu bakho baya emphini bayokulwa netitsa tabo ngendlela lobatfumele ngayo,+ bathantaze+ kuJehova babuke lelidolobha lolikhetsile+ kanye nalendlu lengiyakhele libito lakho,+ 45 shengatsi ungayiva imithantazo yabo usemazulwini kanye neticelo tabo futsi ubancobele.

46 “Nangabe bakona (ngobe kute umuntfu longoni),+ bese uyabatfukutselela futsi ubanikele esitseni, labo lababatfumbile bahambe nabo baye eveni lesitsa, lelikhashane nobe lelisedvute;+ 47 bese bayasanguluka eveni labatfunjelwe kulo,+ babuyele kuwe+ baphindze bacele umusa baseveni labatfunjelwe kulo+ batsi, ‘Sonile futsi sente liphutsa; sente lokubi,’+ 48 babuyele kuwe ngenhlitiyo+ yabo yonkhe nangemphefumulo* wabo wonkhe baseveni lesitsa sabo lesabatfumba, bathantaze kuwe babuke live labo lowalinika bokhokho babo futsi bathantaze babuke lidolobha lolikhetsile nalendlu lengiyakhele libito lakho,+ 49 shengatsi ungalalela usemazulwini, indzawo lohlala kuyo,+ umthantazo wabo nekucela kwabo umusa futsi ubancobele 50 futsi ucolele bantfu bakho labakonile, ucolele tonkhe tiphambeko tabo. Wena utakwenta lababatfumbile babe nemusa kubo futsi batawubavela buhlungu+ 51 (ngobe balifa lakho+ nebantfu bakho, lowabakhipha eGibhithe,+ emlilweni loncibilikisa ngisho insimbi).+ 52 Shengatsi tindlebe takho tingasiva sicelo semusa+ senceku yakho nesicelo semusa sebantfu bakho ema-Israyeli ngekutsi ulalele nome nini nabakubita.*+ 53 Ngobe wabakhetsa kubo bonkhe bantfu labasemhlabeni+ wabenta baba lifa lakho njengoba wamemetela ngaMosi inceku yakho ngesikhatsi ukhipha bokhokho betfu eGibhithe, wena Nkhosi Lephakeme Jehova.”

54 Ngekushesha nje Solomoni nakacedza kwenta wonkhe lomthantazo kuJehova kanye nekwenta sicelo semusa, wasukuma embikweli-al’thare laJehova lapho bekasolo aguce khona, tandla takhe atiphakamisele emazulwini.+ 55 Wabese uyema wabusisa lonkhe lelibandla lema-Israyeli ngelivi lelikhulu watsi: 56 “Akadvunyiswe Jehova lonikete bantfu bakhe ema-Israyeli indzawo yekuphumula njengobe etsembisa.+ Kute ngisho nalinye livi lelingakagcwaliseki kuto tonkhe tetsembiso takhe letinhle latenta ngaMosi inceku yakhe.+ 57 Shengatsi Jehova Nkulunkulu wetfu angaba natsi njengoba aba nabo bokhokho betfu.+ Shengatsi angete asishiya futsi angasilahli.+ 58 Shengatsi angadvonsela tinhlitiyo tetfu kuye+ kuze sihambe etindleleni takhe sigcine imiyalo yakhe, imitsetfo yakhe kanye netehlulelo takhe latinika bokhokho betfu kutsi batigcine. 59 Shengatsi lamavi ami lengicele ngawo Jehova kutsi asentele umusa, angahlale awakhumbula Jehova Nkulunkulu wetfu imini nebusuku, kuze aphindziselele inceku yakhe nebantfu bakhe ema-Israyeli njengobe kudzingeka lilanga nelilanga, 60 kuze bonkhe bantfu emhlabeni bati kutsi Jehova unguNkulunkulu weliciniso.+ Kute lomunye!+ 61 Ngako shengatsi tinhlitiyo tenu tingaphelela*+ kuJehova Nkulunkulu wetfu ngekutsi nihambe ngemiyalo yakhe nangekutsi nigcine imitsetfo yakhe njengobe nentile lamuhla.”

62 Inkhosi kanye nawo onkhe ema-Israyeli babese banikela ngemihlatjelo leminyenti embikwaJehova.+ 63 Solomoni wanikela kuJehova ngemihlatjelo yekuthula:+ Wanikela ngetinkhomo letingu-22 000 nangetimvu letingu-120 000. Inkhosi kanye nawo onkhe ema-Israyeli bayivula kanjalo-ke lendlu yaJehova.+ 64 Ngalelolanga, inkhosi bekufanele ingcwelise incenye lesemkhatsini yelibala lelalisembikwendlu yaJehova ngobe kuleyondzawo bekufanele yente imihlatjelo yekushiswa, iminikelo yalokutinhlavu kanye nemanoni emihlatjelo yekuthula, ngobe li-al’thare lelitfusi+ lelalisembikwaJehova belilincane kakhulu kutsi lingetfwala lemihlatjelo yekushiswa, neminikelo yalokutinhlavu kanye nalamanoni+ emihlatjelo yekuthula. 65 Ngaleso sikhatsi Solomoni wenta umkhosi+ akanye nawo onkhe ema-Israyeli embikwaJehova Nkulunkulu wetfu, kwaba ngiso sonkhe sive lesisuka eLebo-hamathi* kwehle kuze kuyofika eSihosheni* saseGibhithe.+ Lomkhosi waba ngemalanga langu-7 nalamanye futsi langu-7, aba ngu-14 nasekaphelele. 66 Ngelilanga lelilandzelako,* inkhosi yabakhulula labantfu futsi bayibusisa base babuyela emakhaya abo bajabule kakhulu ngenca yato tonkhe tintfo letinhle+ Jehova latentela Davide inceku yakhe kanye nebantfu bakhe ema-Israyeli.