Tihlabelelo
Ingoma yekulila Davide layihlabelela Jehova ngenca yemavi labekashiwo nguKushe umBhenjamini.
7 Awu Jehova Nkulunkulu wami, ngiphephele kuwe.+
Ngisindzise kubo bonkhe labangihluphako futsi ungikhulule.+
2 Nawungangikhululi, batangidzabudzabula ngibe ticucu kube shengatsi ngibanjwe libhubesi,+
Bangibambe kube kute nalotangikhulula.
3 Awu Jehova Nkulunkulu wami, nangabe licala likimi,
Nakukhona lokungakalungi lengikwentile,
4 Nangabe ngente lokubi kumuntfu longentele lokuhle,+
Nobe nangabe ngemuke sitsa sami tintfo taso ngaphandle kwesizatfu,*
5 Sitsa sami asingigijimise size singibambe;
Asingigcobagcobe* ngize ngife
Futsi sente ludvumo lwami luphelele elutfulini. (Sela)
6 Awu Jehova, sukuma ngentfukutselo yakho;
Vuka umelane nentfukutselo yetitsa tami;+
Sukuma ungisite, ulwele kutsi kwentiwe kulunga.+
7 Tive atikutungelete;
Futsi wena utawumelana nato usendzaweni lephakeme.
8 Jehova utawehlulela bantfu.+
Awu Jehova, ngehlulele ngekuvumelana nekulunga kwami
Nangekuvumelana nebucotfo bami.+
9 Ngicela kutsi uticedze tento letimbi talababi.
Kodvwa ubemise bacine labalungile,+
Njengobe wena unguNkulunkulu lolungile+ lohlola tinhlitiyo+ kanye nemiva lejulile.*+
10 Nkulunkulu ulihawu lami,+ unguMsindzisi walabo labacotfo enhlitiyweni.+
11 Nkulunkulu unguMehluleli lolungile,+
Futsi ubehlulela onkhe malanga lababi.
12 Nangabe lotsite angaphendvuki,+ Nkulunkulu ulola inkemba yakhe;+
Ugoba butjoki bakhe alungele kudubula.+
13 Ulungisa tikhali takhe letibulalako;
Alungise imicibisholo yakhe levutsa emalangabi.+
14 Asewubuke umuntfu lonemacebo lamabi;
Uhlela kwenta lokubi bese ukhuluma emanga.+
15 Umba umgodzi, awumbe ushone,
Kodvwa kuphindze kugcumkele yena kulomgodzi lawumbile.+
16 Tinkinga latibangako titawutfola yena;+
Nebudlova labentako butawehlela yena.