Tihlabelelo
Sicondziso lesiya kumcondzisi: Kufanele ihlatjelwe ngendlela letsi: “Timbali.”* Ingoma yaDavide.
69 Awu Nkulunkulu, ngisindzise ngobe sengiyamita.+
2 Ngicwile eludzakeni lolushonako, lapho kute khona umhlaba lowomile.+
Ngisekhatsi emantini lashonako,
Futsi nemfula sewungikhukhulile.+
3 Sengimemete ngaze ngadzinwa;+
Livi lami seliyahoshota.
Emehlo ami sekaze akasaboni kahle ngobe solo ngilindzele Nkulunkulu wami.+
Labo labafuna kungibulala,
Lokutitsa tami letingitondzela lite, sebanyenti.
Bangiphocelela kutsi ngibhadale tintfo lengingakatebi.
5 Awu Nkulunkulu, wena uyatati tintfo letibulima lengitentile,
Nesono sami asikafihleki kuwe.
6 Shengatsi bantfu labetsembele kuwe bangete bahlazeka ngenca yami,
Awu Jehova wemabutfo, wena loyiNkhosi Lephakeme.
Shengatsi labo labakukhontako bangete bahlazeka ngenca yami,
Awu Nkulunkulu wema-Israyeli.
8 Bomnaketfu sebangitsatsa njengemuntfu labangamati,
Sengifanana nemuntfu wekuhamba kubantfwana bakitsi.+
9 Kushisekela indlu yakho kuvutsa njengemlilo ngekhatsi kimi,+
Nekuhlambalata kwalabo lebebakuhlambalata kwehlele kimi.+
10 Nangititfoba kuwe ngekutsi ngizile kudla,*
Bengetfukelwa kona loko.
11 Bengitsi nangigcoka indvwangu yelisaka,
Bahlekise ngami.
12 Bantfu labahleti esangweni lelidolobha bakhuluma ngami,
Futsi tidzakwa tihlabela ngami.
13 Kodvwa shengatsi umthantazo wami ungawuva
Ngesikhatsi sakho lesikahle Jehova.+
Awu Nkulunkulu, njengobe unemusa* lomkhulu,
Ngiphendvule futsi ukhombise kutsi ungumsindzisi mbamba.+
14 Ngikhiphe eludzakeni;
Ungavumi kutsi ngicwile kulo.
Ngikhulule kubantfu labangenyanyako
Futsi ungikhiphe nasemantini lashonako.+
15 Ungavumi kutsi emanti angikhukhule,+
Ungavumi nekutsi ngimite emantini lashonako,
16 Awu Jehova, ngiphendvule ngobe uyangitsandza.*+
Ngiphendvule masinyane ngobe ngicindzetelekile.+
18 Sondzela kimi futsi ungisindzise;
Ngikhulule etitseni tami.
19 Wena uyati kutsi ngiyahlanjalatwa, ngedzelelwe futsi ngihlazwe.+
Utibona tonkhe titsa tami.
20 Tinhlamba tiyephulile inhlitiyo yami, futsi sengiphelelwa litsemba.
Bengetsembe kutsi ukhona lotangihawukela, kodvwa kwaba bete,+
Bengetsembe kutsi ukhona lotangidvudvuta, kodvwa kwaba bete ngisho namunye.+
21 Esikhundleni sekunginika kudla banginikete shevu,+
Futsi ngesikhatsi ngomile banginatsise liwayini lelimunyu.+
22 Shengatsi ematafula abo angaba lugibe kubo,
Nekuphumelela kwabo kube sitsiyo kubo.+
23 Akube mnyama emehlweni abo kuze bangaboni,
Nemilente yabo ayichachatele siphelane.
24 Yehlisela intfukutselo yakho kubo,
Nelulaka lwakho loluvutsako alube setikwabo.+
25 Shengatsi indzawo labahlala kuyo ingasala ingenamuntfu;
Shengatsi kungaba bete lohlala emathendeni abo.+
26 Ngobe bagijimisa umuntfu lomjezisile,
Futsi bachubeka bakhuluma ngebuhlungu lobuviwa ngulabo lobajezisile.
27 Shengatsi ungabajezisa kakhulu ngesono labasentile,
Ubatsatse njengebantfu labangakalungi.
29 Kodvwa mine ngicindzetelekile futsi ngiva buhlungu.+
Awu Nkulunkulu, ngisindzise futsi ungivikele.
30 Ngitawuhlabela ngidvumise libito laNkulunkulu,
Ngitamdvumisa ngekumbonga.
31 Loku kutamjabulisa Jehova kwendlula kwenta umhlatjelo ngenkunzi,
Kwendlula umhlatjelo lowentiwe ngenkunzana lenetimphondvo nemasondvo.+
32 Labatfobekile batabubona buhle baNkulunkulu futsi bajabule.
Shengatsi ningakhutsateka nine lenikhonta Nkulunkulu.
34 Shengatsi lizulu nemhlaba kungamdvumisa,+
Kanye nelwandle nako konkhe lokukulo.
35 Ngobe Nkulunkulu utayisindzisa iSiyoni+
Akhe kabusha emadolobha akaJuda,
Futsi bantfu bakhe batawuhlala khona kube yindzawo yabo.