Kulandzisa KwaMakho
13 Watsi nakaphuma ethempelini, lomunye webafundzi bakhe watsi kuye: “Mfundzisi, buka kutsi mahle kanjani lamatje naletakhiwo!”+ 2 Kodvwa Jesu watsi kuye: “Uyatibona yini letakhiwo letinkhulu? Kute litje lelitawushiywa etikwalelinye lingakadzilitelwa phansi.”+
3 Asehleti eNtsabeni Yemincumo, abukene nelithempeli, boPhetro, Jakobe, Johane kanye na-Andreya bambuta babodvwa batsi: 4 “Sitjele, titawenteka nini letintfo, futsi sitawubona ngani nasekusikhatsi sekuphela kwato?”+ 5 Ngako Jesu watsi kubo: “Caphelani kutsi kube bete lonidukisako.+ 6 Bantfu labanyenti batawuta basebentisa libito lami batsi: ‘Nginguye,’ futsi batawudukisa incumbi yebantfu. 7 Ngetulu kwaloko, naniva ngetimphi etindzaweni letehlukahlukene, ningesabi; ngobe letintfo kufanele tenteke, kodvwa kuphela kutawube kusengakefiki.+
8 “Ngobe sive sitawuvukela lesinye sive, nembuso uvukele lomunye umbuso;+ kutawuba khona kutamatama kwemhlaba etindzaweni letehlukahlukene, futsi kutawuba khona nendlala.+ Tonkhe letintfo titawube tikucala kwemihelo.+
9 “Ngako caphelani; bantfu batawunifaka etinkantolo,+ banibhambabule emasinagogeni,+ futsi niyawumiswa embikwebabusi nasembikwemakhosi ngenca yami, kuze kube bufakazi kubo.+ 10 Netindzaba letimnandzi kufanele tishunyayelwe etiveni tonkhe kucala.+ 11 Nabaniyisa etinkantolo, ningakhatsateki ngekutsi nitawutsini, kodvwa nibokhuluma loko lenitawunikwa kona ngaleso sikhatsi, ngobe kutawube kungakhulumi nine kodvwa kutawube kukhuluma umoya longcwele.+ 12 Ngetulu kwaloko, umuntfu utawunikela umnakabo kutsi abulawe, kanjalo nababe anikele umntfwanakhe, nebantfwana batawuvukela batali babo futsi banikele ngabo kutsi babulawe.+ 13 Nitawutondvwa bantfu bonkhe ngenca yelibito lami.+ Kodvwa loyo lotawucinisela* kuze kube sekugcineni,+ utawusindziswa.+
14 “Ngako nanibona intfo leyenyanyekako, futsi lebangela imbhubhiso+ ime endzaweni lokungakafaneli ime kuyo (lofundzako akasebentise kucondza), labo labaseJudiya babobalekela etintsabeni.+ 15 Umuntfu losetikwendlu akangehli nobe abuyele endlini ayotsatsa lokutsite, 16 naloyo losemasimini akangabuyeli emuva ayotsatsa ingubo yakhe yangetulu. 17 Maye kulabo labatawube batetfwele nakulabo labatawube bamunyisa ngaleso sikhatsi!+ 18 Thantazelani kutsi loku kungenteki ebusika, 19 ngobe lawo malanga kutawuba ngemalanga ekuhlupheka lokukhulu+ lokungazange sekube khona kusukela ekucaleni kwendalo leyadalwa nguNkulunkulu, kuze kube nguleso sikhatsi, futsi lokungayuphindze kube khona.+ 20 Ngaphandle kwekutsi Jehova* awafinyete lawo malanga, kute umuntfu lobekangasindza. Kodvwa ngenca yalabo labakhetsiwe, lawo malanga atawufinyetwa.+
21 “Nangabe umuntfu atsi kini: ‘Bukani, nangu Khristu!’ nobe atsi: ‘Bukani, nanguya lapha!’ ningamkholwa loyo muntfu.+ 22 Ngobe kutawuvela boKhristu mbumbulu nebaphrofethi bemanga,+ bente tibonakaliso netimangaliso kuze badukise labakhetsiwe nakungenteka. 23 Ngako-ke caphelani;+ mine senginecwayisile.
24 “Kulawo malanga, nasetendlulile leto tinhlupheko, lilanga litawuba mnyama, inyeti ngeke ikhanyise,+ 25 tinkhanyeti titakuwa esibhakabhakeni, netintfo letinemandla tasemazulwini titawunyakatiswa. 26 Lapho-ke batawubona iNdvodzana yemuntfu+ ita isemafini, inemandla nenkhatimulo lenkhulu.+ 27 Itawutfumela tingilosi tayo tiphume, futsi tigcogcele ndzawonye labo labakhetsiwe emagumbini lamane emhlaba;* kusukela emhlabeni kuze kube sezulwini.+
28 “Fundzani sifundvo esihlahleni semkhiwa: Ngekushesha nasesihluma emagala lamasha futsi siveta emacembe, nivele nati kutsi lihlobo selifikile.+ 29 Ngalokufanako, nanibona tonkhe letintfo tenteka, kufanele nati kutsi iNdvodzana yemuntfu seyisemnyango.+ 30 Ngicinisile ngitsi kini: Lesitukulwane ngeke siphele tingakenteki tonkhe letintfo.+ 31 Lizulu nemhlaba kutawendlula,+ kodvwa emavi ami wona ngeke aze endlule.+
32 “Macondzana nalelolanga neli-awa, kute lowatiko, tingilosi ezulwini atati ngisho neNdvodzana ayati, kodvwa nguBabe kuphela lowatiko.+ 33 Hlalani nicaphele futsi nihlale nilindzile,+ ngobe anati kutsi sinini sikhatsi lesibekiwe.+ 34 Kunjengalapho umuntfu ahamba aya khashane bese ushiya indlu yakhe netisebenti takhe,+ atibeke etikhundleni, nguleso naleso asinike umsebenti waso, futsi atjele logadza emnyango kutsi ahlale alindzile.+ 35 Ngako-ke hlalani nilindzile, ngobe anati kutsi umnikati wendlu utawufika nini,+ kungaba kunasekuhwalala, ekhatsi nebusuku, ngaphambi kwekutsi kudzabuke kusa,* nobe ekuseni,+ 36 kuze kutsi nakefika ningakagadzi anganitfoli nilele.+ 37 Loku lengikusho kini ngikusho kubo bonkhe: Hlalani nilindzile.”+