Joshuwa
18 Sonkhe sive sema-Israyeli sabese sihlangana eShilo,+ futsi samisa lithende lekuhlangana kuleyondzawo+ njengobe lelive beselincotjiwe embikwaso.+ 2 Kodvwa bekusasele tive letingu-7 tema-Israyeli lebetisengakabelwa lifa lato. 3 Ngako Joshuwa watsi kuma-Israyeli: “Kutawuze kube ngunini solo nihudvula tinyawo, ningayi kuyotsatsa lelive Jehova Nkulunkulu wabokhokho benu laninike lona?+ 4 Letsani emadvodza lamatsatfu esiveni ngasinye lengitawatfuma; kufanele ahambe adzabule lonkhe lelive futsi advwebe libalave lalo kuze lehlukaniswe libe lifa laletive. Nakacedza kufanele abuye lapha kimi. 5 Abokwehlukaniselana lelive libe tincenye letingu-7.+ Sive sakaJuda sitawuchubeka sihlala endzaweni yaso leseningizimu,+ nendlu yaJosefa ichubeke ihlala endzaweni yayo lesenyakatfo.+ 6 Nine kufanele nidvwebe lelive libe tincenye letingu-7 bese niletsa lelibalave lapha kimi, futsi ngitanentela inkatho+ embikwaJehova Nkulunkulu wetfu. 7 Kodvwa emaLevi ete lifa emkhatsini wenu,+ ngobe lifa lawo kwenta imisebenti yaJehova yebuphristi,+ kantsi sive sakaGadi, sakaRubeni nencenye yesive sakaManase+ sebavele balitsetse lifa labo emphumalanga yeJordane, lelo Mosi inceku yaJehova labanika lona.”
8 Lamadvodza alungela kuhamba, futsi Joshuwa watjela lawo labekatawudvweba lelive watsi: “Hambani nidzabule lelive, nilidvwebe bese nibuya kimi, futsi mine ngitawubese nginentela inkatho lapha eShilo embikwaJehova.”+ 9 Ngako lamadvodza ahamba adzabula lelive, advweba libalave lalo alehlukanisa ngemadolobha laba tincenye letingu-7, futsi loko akubhala encwadzini. Ngemuva kwaloko abuyela kuJoshuwa endzaweni lebekuhlalwa kuyo eShilo. 10 Joshuwa wabese wentela letive inkatho embikwaJehova eShilo.+ Kuleyondzawo Joshuwa wehlukanisela ema-Israyeli lelive ngetabelo tawo.+
11 Inkatho yaya esiveni sakaBhenjamini ngemindeni yaso, futsi indzawo lesanikwa yona beyisemkhatsini wendzawo yesive sakaJuda+ neyesitukulwane saJosefa.+ 12 Enyakatfo, umncele walesive bewucala eJordane, wenyukele endzaweni leyewukelako yaseJerikho+ lesenyakatfo, bese wenyukela enshonalanga kubheka entsabeni futsi uchubekele ehlane laseBhethi-aveni.+ 13 Nawusuka lapho lomncele bewuchubekela eLuzi, endzaweni leyewukelako yaseLuzi leseningizimu, lokuyiBetheli.+ Bewubese wehlela e-Atharothe-adari+ entsabeni leseningizimu yeBhethi-horoni Lengentasi.+ 14 Lomncele wasikwa enshonalanga futsi wajikela ngaseningizimu nawusuka entsabeni lebukene neBhethi-horoni kuye eningizimu. Bewuphelela eKhiriyathi-bhali, lokuyiKhiriyathi-jeyarimu,+ lelidolobha lakaJuda. Lolu-ke luhlangotsi lwasenshonalanga.
15 Luhlangotsi lwaseningizimu belusukela emaphetselweni eKhiriyathi-jeyarimu, futsi lomncele wawuchubekela enshonalanga, uhambe uze uyofika emtfonjeni wemanti aseNefithowa.+ 16 Bewubese wehlela emaphetselweni entsaba lebukene neSigodzi seNdvodzana yaHinomu,+ futsi leseSihosheni* semaRefa+ enyakatfo, wehlele eSigodzini saHinomu uye endzaweni leyewukelako yemaJebhusi+ leseningizimu, bese wehlela e-Eni-rogeli.+ 17 Lomncele wasikwa enyakatfo, wachubekela e-Eni-shemeshi waze wayofika eGelilothi, lesembikwemgwaco lowenyukelako wase-Adumimu,+ futsi wehlela etjeni+ laBohani+ indvodzana yaRubeni. 18 Wachubekela endzaweni leyewukelako lesenyakatfo, embikwe-Arabha wabese wehlela e-Arabha. 19 Lomncele wachubekela nasendzaweni leyewukelako yaseBhethi-hogla+ lesenyakatfo, futsi waphelela elugwini lweLwandle Lweluswayi*+ lolusenyakatfo, emkhawulweni weJordane loseningizimu. Lona-ke bekungumncele waseningizimu. 20 IJordane beyingumncele walesive eluhlangotsini lolusemphumalanga. Leli bekulifa lebantfwana baBhenjamini ngemindeni yabo, nangemincele yabo kuto tonkhe tinhlangotsi.
21 Emadolobha esive sakaBhenjamini ngemindeni yaso bekungulawa: IJerikho, iBhethi-hogla, i-Emeki-khesisi, 22 iBhethi-arabha,+ iSemarayimu, iBetheli,+ 23 i-Avi, iPhara, i-Ofra, 24 iKhefari-amoni, i-Ofni neGeba.+ Bekungemadolobha langu-12 nemadolobhana awo.
25 Bekukhona neGibeyoni,+ iRama, iBherothi, 26 iMispa, iKhefira, iMoza, 27 iRekhemu, i-Iripheyeli, iTharala, 28 iZela,+ iHelefu, iJebhusi, lokuyiJerusalema,+ iGibeya+ neKhiriyathi. Bekungemadolobha langu-14 nemadolobhana awo.
Leli-ke bekulifa lebantfwana baBhenjamini ngemindeni yabo.